ESTA ALERTO!
Porque Ta Causa Grabe Division el Politica?—Cosa el Biblia Ta Habla?
Na manada nacion na entero mundo, tiene division el maga gente por causa na politica. Asegun na un survey del Pew Research Center del 2022, “65% del maga adulto na 19 nacion el ya habla que grabe el peleajan na diila nacion entre na maga gente quien ta suporta na diferente partido.”
Ya puede ba tu nota que el maga gente na de ustedes lugar mas dividido ya por causa na politica? Cosa el razon? Tiene ba solucion? Considera si cosa ta habla el Biblia.
Maga custumbre que ta causa division
Ya habla ya daan el Biblia que na diaton tiempo que ta llama “maga ultimo dias del mundo,” manada gente el tiene maga custumbre que ta hace imposible para tene unidad.
“Na maga ultimo dias del mundo, . . . el situacion ay queda bien dificil. El maga gente ay ama lang gayot canila mismo . . . Bien dificil para apasigua canila.”—2 Timoteo 3:1-3, El Nuevo Testamento.
Maskin pa na esfuerzo del manada gente, gendeh siempre ta tene buen resulta el cosa ta hace el maga gobierno. El maga gente quien ta suporta diferente maga partido tan dificil o gaha gendeh gayot tan ayudajan para solva con el problema. El cosa ta sucede na mundo ta dale mira que deverasan el cosa ya habla el Biblia de antes pa.
“El gente ya domina con el gente para na de suyu perjuicio.”—Eclesiastes 8:9.
Pero, ya habla el Biblia que tiene solucion. Tiene un gobierno que hay quita con el maga problema del todo maga gente ahora.
Un amable lider
El Biblia ya menciona acerca na un lider quien puede solva con este maga problema: si Jesucristo. Si Jesus tiene el poder, autoridad y querrer que lleva unidad y paz na mundo.
“Na de suyu tiempo, hay florea el maga recto, y el paz queda abundancia.”—Salmo 72:7.
“Todo maga nacion hay sirvi con ele.”—Salmo 72:11.
Un buen lider si Jesus cay ta ama y quierre le ayuda con el maga gente, especialmente con aquellos quien ya experiencia injusticia.
“Hay salva le con el pobre quien ta pidi ayuda, y con el maka-lastima y con el maskin quien que nuay ta ayuda. Ele hay tene lastima con el maka-lastima y pobre, y el vida del maga pobre hay salva le. Hay salva le kanila desde na mal tratamiento y na violencia.”—Salmo 72:12-14.
Aprende mas acerca na Reino del Dios—el gobierno na cielo donde si Jesus el Rey. Sabe si paquemodo tu puede beneficia y suporta con el de suyu rulanza.
Mira con el video Cosa el Reino del Dios?
Le con el articulo “God’s Kingdom—A Government With No Corruption.”