“Hay tene lang paz si el maga gente hay tolera con uno y otro.”—UNESCO Declaration of Principles on Tolerance, 1995.

 Pero si gendeh kita tolera con otro, hay puede se kanaton causa para gendeh dale mira respeto y odia pa gane con otro. Si tiene el maga gente este maga sentido, posible hay principia ya sila habla maga duele palabra, discrimina con otro y queda violente.

 Pero, otro-otro el idea del maga gente acerca si cosa quierre decir que tolera con otro. El cuanto ta creé que si ta tolera tu con otro, ta aproba tu con el todo cosa sila ta hace y el diila custumbre. El otro ta creé que si ta tolera tu con otro, ta respeta tu con el derecho del cada uno para iscuji si cosa sila creé maskin pa otro se na cosa tu ta creé. Y amo se el uyun na enseñanza na Biblia.

 Puede ba ayuda el Biblia con el maga gente para tolera con otro na diaton tiempo?

El razon na Biblia si porque kita tolera con otro

 Ta anima kanaton el Biblia que tolera con otro. Este ta habla: “Dale mira el de tuyu pagka-razonable na todo gente.” (Filipo 4:5, NWT) El Biblia ta anima kanaton que dale mira consideracion y respeto con todo. Aquellos quien ta aplica con este consejo posible gendeh tan uyun o ta copia con el cosa ta hace el otro persona pero ta permiti sila con el persona que hace si cosa le quierre.

 Pero, el Biblia ta revela que el Dios tiene maga principio que debe sigui el maga gente. Este ta habla: “Ya habla [el Dios] contigo, O gente, si cosa el bueno.” (Miqueas 6:8) Ta revela este con el direccion del Dios que ta ayuda con el maga gente para tene el de con todo alegre vida.—Isaias 48:17, 18.

 El Dios nuay kanaton dale autoridad para juzga con otro. Asegun na Biblia, “Quien ta dale el Ley y quien ta juzga uno lang . . . Quien man tu para condena con el dituyo maga vecinos?” (Santiago 4:12, El Nuevo Testamento na Chavacano) El Dios ya dale con el cada uno kanaton el libertad para hace maga decision y kita mismo el responsable con ese.—Deuteronomio 30:19.

Si cosa ta habla el Biblia acerca na respeto

 El Biblia ta habla que debe kita “respeta con todo.” (1 Pedro 2:17) Poreso, aquellos quien ta iscuji que vivi asegun na principio del Biblia ta trata con todo con respeto maskin cosa pa el diila creencia o manera de vida. (Lucas 6:31) Gendeh este quierre decir que aquellos quien ta sigui con el principio na Biblia tan uyun na cada creencia o opinion que tiene el otro o ta suporta con el cada decision que ta hace sila. Pero en vez de maltrata kanila, ta hace sila el todo para imita si paquemodo si Jesus ya trata con otro.

 Por ejemplo, ya conoce si Jesus un mujer que ta participa na un religion que gendeh aceptable con Jesus. Este mujer ta queda tambien junto na un hombre que gendeh de suyu marido y un manera este de vida que gendeh tan uyun si Jesus. Pero, yan cuento lang siempre le con el mujer con respeto.—Juan 4:9, 17-24.

 Igual con Jesus, el maga Cristiano preparao explica con el maga razon del diila creencia con aquellos quien quierre oi pero ta hace sila se “con respeto.” (1 Pedro 3:15, 16) El Biblia ya dale instruccion con el maga Cristiano que no forza con otro que acepta con el diila opinion. Ta habla este que el maga siguidores de Jesus “no conviene . . . queda peleador, sino [queda] amable con todo,” incluido ya con aquellos quien tiene diferente creencia.—2 Timoteo 2:24.

Cosa ta habla el Biblia acerca na odio

 El Biblia ta habla kanaton que “precura tene paz con todo el maga gente.” (Maga Hebreo 12:14) Aquellos quien ta pricura tene paz gendeh ta odia con otro. Gendeh sila tan compromiso con el diila mismo creencia pero ta hace sila esfuerzo para mentena buen relacion con otro. (Mateo 5:9) Gane, el Biblia ta anima con el maga Cristiano que ama con el diila maga enemigo por medio que trata kanila enbuenamente.—Mateo 5:44.

 Deverasan, el Biblia ya habla que el Dios “ta odia” o “detestable [para] con ele” el maga accion que ta hace bajo o ta causa peligro con otro. (Proverbio 6:16-19) El Biblia ya usa con el palabra “odia” para dale mira que no quierre gayot si Jehova con ese maga mal accion. Pero, ta dale este mira que preparao el Dios que perdona y ayuda con aquellos quien quierre cambia con el diila manera de vida y vivi asegun na de suyu maga principio.—Isaias 55:7.

Maga texto na Biblia acerca si porque tolera y dale mira respeto con otro

 Tito 3:2: “Tene buen custumbre y queda respetoso con todo el maga gente.”

 Mateo 7:12: “Hace con otros el cosa ustedes quiere que sila ay hace con ustedes.”

 Josue 24:15: “Iscuji ustedes ahora si con quien ustedes quierre sirvi.”

 Maga Actividad 10:34: “El Dios noay favorito [o gendeh parcial].”

 Habacuc 1:12, 13: “Gendeh [el Dios] ta tolera con el maldad.”

 Roma 12:19: “No venga . . . Deja se con el Rabia del Dios, cay escribido na Escritura: El Señor ta habla: Dimio el venganza. Yo amo quien ay dale el pago que conviene canila.”

 Nuay dale el derecho si Dios Jehova a con maskin quien para vengga. Hay asigura le que tene justicia na de suyu mismo tiempo. Para aprende pa mas, le con el articulo “Will the Cry for Justice Be Heard?”