Maga cinco billon gente el ya mira con el 2024 Summer Olympics, donde tiene maga atleta que estaba na 206 maga nacion quien ya participa na maga juego. “Parte kita del un ocasion que ta hace unido con el maga gente na entero mundo,” ya habla si Thomas Bach, el presidente del International Olympic Committee. “Celebra kita y suporta con el goal del Olympics que dale paz y hace unido con el maga gente maskin diferente kita con uno y otro.”

 Puede ba el Olympics alcanza con ese goal? Puede pa ba el maga gente tene deverasan paz y unidad?

 Gendeh lang acerca na maga juego el Olympics este año. Yan focus tambien este na maga problema na politica y comunidad que ta causa division na maga gente. Incluido alli el maga issue acerca na derecho del maga gente y discriminacion por causa na raza, religion y sexo o gender del un persona.

 Un entretenimiento para na maga gente el maga ocasion igual na Olympics. Pero na maga juego, ta puede tambien kita mira el maga custumbre y accion del maga gente que ta resulta na division en vez na paz y unidad.

 El Biblia ya habla que na diaton tiempo, el maga gente hay tene maga custumbre que hay causa kanila para man dificil tene unidad. (2 Timoteo 3:1-5) Para sabe pa mas acerca na ese profecia, le con el articulo “Did the Bible Predict the Way People Think and Act Today?”

 Asegun na Biblia, tiene gayot esperanza el maga gente que experiencia paz y unidad na entero mundo. Ta promete este que el todo maga gente na tierra hay queda unido bajo na gobierno del Dios na cielo que ta llama “Reino de Dios.”—Lucas 4:43, El Nuevo Testamento na Chavacano; Mateo 6:10.

 El Rey de ese Reino, si Jesucristo, hay lleva paz na entero mundo. El Biblia ta habla:

•   “Hay florea el maga recto y el paz hay queda abundancia.”—Salmo 72:7.

•   “Salva le con el pobre quien ta pidi ayuda . . . Salva le kanila desde na mal tratamiento y na violencia.”—Salmo 72:12, 14.

 Ahora pa lang, millones ya de maga gente que estaba na 239 nacion el ya queda unido por causa na maga enseñanza de Jesus. Como maga Cristiano, el maga Testigo de Jehova na entero mundo ya aprende si paquemodo mentena paz con uno y otro. Para sabe si paquemodo se sila ya hace, le con el issue de Watchtower que tiene titulo “Breaking the Cycle of Hatred.”