Como cosa ya reporta el United Nations:

•   Principia del Octubre 7 hasta Octubre 23, 2023, mas de 6,400 el ya muri y 15,200 el ya sale irido na guerra entre na Gaza y Israel, y maga civilian el mayoria kanila. Omento pa, miles el forzao ya deja con el diila casa.

•   Del Septiembre 24, 2023, por causa na guerra na Russia y Ukraine, 9,701 civilian el ya muri y 17,748 el ya sale irido na Ukraine.

 Cosa esperanza ta dale el Biblia con aquellos quien ta sufri por causa na Guerra?

 El Biblia ta habla que el Dios “hay termina . . . con el maga guerra na entero mundo.” (Salmo 46:9) Usa le con el de suyu reino o gobierno na cielo para cambia con el todo gobierno del gente. (Daniel 2:44) El Reino del Dios hay lleva paz na maga gente.

 Nota si cosa hace si Jesucristo, el Rey del Reino del Dios:

•   “Salva le con el pobre quien ta pidi ayuda, con el maka-lastima y con aquellos nuay quien ta ayuda. Tene le compasion con el maka-lastima y pobre, y hay salva le con el maga pobre. Hay salva le kanila desde na mal tratamiento y na violencia.”—Salmo 72:12-14.

 Por medio del de suyu Reino, el Dios hay quita con el sufrimiento que ta causa el maga guerra y violencia.

•   “Ay limpia Le el lagrimas na diila maga ojos y nunca mas ay tene muerte, ni dolor, ni tristeza, cay el mundo de antes ya acaba ya.”—Revelacion 21:4, El Nuevo Testamento na Chavacano.

 Gendeh tarda el Reino del Dios hay hace maga cambio na mundo. Ya menciona ya daan el Biblia acerca na “maga guerra y maga noticia de guerra” que ta sucede ahora. (Mateo 24:6) Este y el otro pa maga suceso ta indica que ta queda ya kita na “ultimo maga dia” del rulanza del maga gente.—2 Timoteo 3:1.