Considera con el siguiente maga prominente lider del religion y el guerra na Ukraine:

•   “El lider del Iglesia de Orthodox de Russia, si Patriarch Kirill, nuay cosa ya habla contra na cosa ta hace el Russia . . . . El diila Iglesia ta continua hace calayat propaganda acerca na Ukraine y ya usa con ese si Putin como razon na este guerra.”—EUobserver, Marzo 7, 2022.

•   “Si Patriarch Kirill . . . ya suporta con el ataque del Russia na Ukraine y asegun con ele, parte este del esfuerzo para ganá contra con el pecado.”—AP News, Marzo 8, 2022.

•   “El lider del Iglesia del Orthodox na Ukraine, si Metropolitan Epiphanius I de Kyiv, ya bendici con el maga gente na diila lugar del Lunes para ‘man guerra contra na maga soldao de Russia’ . . . Ya menciona tambien [ele] que gendeh culpa que mata maga soldao de Russia.”—Jerusalem Post, Marzo 16, 2022.

•   “Ta suporta kame [el Ukrainian Council of Churches and Religious Organizations (UCCRO)] con el maga soldao de Ukraine y con el todo quien ta defende con el diamon nacion. Ta bendici kame con el diila esfuerzo que defende con el Ukraine contra na maga enemigo y ta reza kame para kanila.”—UCCRO, a Febrero 24, 2022.

 Para contigo, debe ba anima el maga religion con el diila maga miembro que participa na guerra maskin pa ta clama sila que ta sigui sila con Jesucristo? Cosa el Biblia ta habla?

El history del religion na guerra

 El history ta dale mira que el religion mas mucho ta consinti, ta defende o ta anima pa gane con el maga gente que participa na guerra mientras ta pretende sila que quierre sila tene paz. Por cuanto decada, el maga Testigo de Jehova ya ayuda con otro para mira con el hipocresia de ese maga religion. Considera con el cuanto ejemplo que ya menciona na diaton maga publicacion.

•   El articulo “The Crusades—A ‘Tragic Illusion’” ta dale mira si porque el Iglesia de Romano Catolico amo el responsable na matanza que ta clama sila que ya hace para con Dios y con el Cristo.

•   El articulo “The Catholic Church in Africa” ya dale mira un ejemplo si paquemodo el religion nuay cosa ya puede hace para descanza el guerra entre na maga tribo.

•   El maga articulo “Is Religion to Blame?,” “Religion’s Role in Man’s Wars” y “Religion Takes Sides” ta explica si paquemodo el maga lider de Catolico, Orthodox y Protestante ya suporta con el todo quien envuelto na manada guerra.

Debe ba participa na guerra el maga religion quien ta clama Cristiano?

 Si cosa ya enseña si Jesus: “Ama con el dituyo vecinos, como ta ama tu con el dituyo mismo cuerpo.” (Mateo 22:39, El Nuevo Testamento na Chavacano) “Ama con el de ustedes maga contrario.”—Mateo 5:44-47.

 Si cosa ya habla si Jesus: “El dimio Reino gendeh de este mundo. Si el dimio Reino de este mundo, mi maga siguidores ay pelea era para gendeh conmigo entrega.” (Juan 18:36) “Todo quien ta agarra espada, ta muri na espada.”—Mateo 26:47-52.

 Pensa este: Si el maga Cristiano gendeh puede pelea maskin pa para protege con Jesus, justo ba que hace sila se por causa na otro razon? Le con el articulo “Is War Compatible With Christianity?” para sabe si paquemodo el maga Cristiano de antes fiel ya sigui con el ejemplo y enseñanza de Jesus.

Cosa hay pasa na maga religion quien ta suporta na guerra?

 El Biblia ta enseña que gendeh aceptable con Dios el maga religion quien ta clama que ta representa este con Jesus pero gendeh ta sigui con el de suyu maga enseñanza.—Mateo 7:21-23; Tito 1:16.

•   El libro de Revelacion ta dale mira que responsable ese maga religion con Dios na muerte “de todo aquellos con quien ya mata aqui na mundo.” (Revelacion 18:21, 24) Para sabe si porque, le con el articulo “What Is Babylon the Great?”

•   Ya dale mira si Jesus que hay destroza con el todo religion que gendeh aceptable con Dios por causa na diila maga mal trabajo, igual si paquemodo “ay corta y ay buta na fuego” con el maga buluk pono que ta produci buluk fruta. (Mateo 7:15-20) Le con el articulo “The End of False Religion Is Near!” para sabe si paquemodo este hay sucede.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images