Na entero mundo, manada maga gente el ta clama que ta sigui con Jesucristo pero ta entramete na politica. El cuanto ta suporta na maga candidato o maga partido de politica para hace popular con el diila creencia acerca na religion y moralidad. Despues, el maga politico ta usa con el maga issue acerca na moralidad o si cosa ta sucede na comunidad para ganá con el suporta del maga religioso gente. Comon tambien ahora que ta corre el maga lider de religion para na posicion na gobierno. Y gane, na cuanto maga nacion, ta considera con el “Cristiano” religion como el religion del nacion.

 Para contigo, debe ba entramete el maga siguidores de Jesucristo na politica? Puede tu sabe el contestacion si considera tu el ejemplo de Jesus. Ele ya habla: “Ya dale ya yo con ustedes el ejemplo para ay hace tamen ustedes como ya hace yo con ustedes.” (Juan 13:15, El Nuevo Testamento na Chavacano) Si acerca na politica, cosa ejemplo el ya dale si Jesus?

 Nuay entramete si Jesus na politica de este mundo.

 Nuay desea si Jesus un posicion na politica. Nuay le conforma queda lider del maga gobierno del gente cuando ya ofrece con ele si Satanas Diablo “todo el maga reino na mundo.” (Mateo 4:8-10) a Na otro ocasion, ya puede mira el maga gente que tiene si Jesus el maga calidad del un buen lider y ya pricura sila forza con ele para queda envuelto na politica. El Biblia ya habla: “Si Jesus ya sabe cay quiere sila saca con Ele forzao para proclama con Ele rey. Poreso, ya anda Le otra vez na monte solo-solo.” (Juan 6:15) Nuay hace si Jesus con el cosa quierre el maga gente. Nuay le conforma queda envuelto na politica.

 Nuay suporta si Jesus con el maskin cosa opinion na maga issue de politica. Por ejemplo, na tiempo de Jesus rabiao el maga Judio cay debe sila paga maga impuesto na gobierno de Roma y para kanila, injusticia este. Cuando ya pricura sila saca el suporta de Jesus na este issue, nuay le man comento acerca si justo ba paga con ese maga impuesto o gendeh. Ele ya habla kanila: “Devolve ustedes con Caesar el cosa de Caesar, y devolve con Dios el cosa de Dios.” (Marcos 12:13-17) Ya esta le neutral na issue de politica pero ya dale le mira que debe paga con el maga impuesto que ta pidi el gobierno de Roma que ta representa con Cesar. Pero, ya dale tambien le mira que tiene limitacion el obediencia na secular autoridad. El un persona gendeh debe dale con el gobierno el cosa que para con Dios lang, incluido el devocion y adoranza.—Mateo 4:10; 22:37, 38.

 Si Jesus ya suporta y ya enseña con otro acerca na un gobierno na cielo—el Reino del Dios. (Lucas 4:43) Nuay le entramete na politica cay sabe le que el Reino del Dios el puede cumpli con el cosa quierre el Dios para na tierra y gendeh el maga gobierno del gente. (Mateo 6:10) Sabe le que gendeh usa el Reino del Dios con el maga gobierno del gente sino hay destroza con este.—Daniel 2:44.

 Nuay. El maga siguidores de Jesus ya sigui con el cosa le ya habla que sila “gendeh del mundo.” (Juan 15:19) Ya sigui sila el ejemplo de suyu y ya esta separtao na politica del mundo. (Juan 17:16; 18:36) En vez de queda envuelto na maga issue de politica, ya hace sila el trabajo que ya manda kanila si Jesus—el predicacion y enseñada acerca na Reino del Dios.—Mateo 28:18-20; Maga Actividad 10:42.

 El de con todo importante cosa na vida del maga Cristiano del primer siglo amo que obedece con Dios pero sabe tambien sila que debe sila respeta con el maga secular autoridad. (Maga Actividad 5:29; 1 Pedro 2:13, 17) Ya obedece sila con el maga ley y ya paga maga impuesto. (Roma 13:1, 7) Nuay sila queda envuelto na politica pero ya puede sila beneficia na proteccion y servicio que ya dale el gobierno.—Maga Actividad 25:10, 11; Filipo 1:7.

 Claro ya dale mira el Biblia que nuay entramete si Jesus y el de suyu maga siguidores na politica. Por causa con este, como maga Cristiano, el maga Testigo de Jehova na entero mundo ta esta neutral. Igual con el maga Cristiano del primer siglo, ta hace sila con el trabajo que ya manda si Jesus—ta predica sila con el “Buen Noticia acerca el Reino.”—Mateo 24:14.