“Cuando bata yo, ya abusa conmigo el de mio hermano cada dia na fisical y na palabra. Cuando casao ya yo, ese tambien el cosa ya hace conmigo el de mio suegra. Ele y el de mio suegro ya trata conmigo como esclavo. Poreso, ya pensa yo man suicide.”—Madhu, a India.

 “Comon na entero mundo el abuso na maga mujer,” ya habla el World Health Organization. Asegun pa con este, cerca uno na cada tres mujer el ya experiencia fisical o sexual abuso na diila vida.

 Si ya sucede se contigo, posible sinti tu que maskin onde tu anda, hay experiencia tu abuso na fisical, sexual o na palabra. Por causa con ese abuso y maltratamiento na maga mujer, posible sinti tu que mayoria del maga gente ta pensa, ‘Gendeh importante el maga mujer.’ Pero ese ba tambien el mirada del Dios?

 Texto: “Hombre y mujer [el Dios] ya crea kanila.”—Genesis 1:27.

 Si cosa quierre decir: Ya crea el Dios hombre y mujer con quien conviene respeta. Mas pa, ta expecta le que el un marido hay “ama con el disuyo mujer como ta ama le con el disuyo mismo cuerpo” y gendeh le usa maga gendeh buen palabra o queda violente para pricura controla con este. (Efeso 5:​33, El Nuevo Testamento na Chavacano; Colosa 3:19) Claro que importante con Dios el maga mujer.

 “Cuando bata yo, ya experiencia yo sexual abuso na de mio maga pariente. Cuando 17 año yo, ya habla conmigo el de mio boss que quita le conmigo na trabajo si gendeh yo conforma man sex con ele. Cuando adulto ya yo, ta hace conmigo de menos el de mio marido, maga mayores y maga vecinos. Pero na uliji, ya sabe yo acerca con Jehova, b el Creador. Ta respeta le con el maga mujer. Ya dale se conmigo asiguranza que ta ama le conmigo y que precioso yo con ele.”—Maria, Argentina.

 Texto: “Tiene . . . un amigo que leal pa na un hermano.”—Proverbio 18:24.

 Si cosa quierre decir: El un deverasan amigo hay suporta contigo. Si ta sinti tu que puede este ayuda contigo, habla si cosa tu ta sinti na un persona con quien tu ta confia.

 “Por 20 año, nuay yo con quien ya habla que ya molestia conmigo. Como resulta, ya engranda yo que gendeh alegre, malingasa y depress. Pero cuando ya habla ya yo con el un persona el cosa yo ya experiencia y ya oi le conmigo, ya sinti gayot yo alivio.”—Elif, Türkiye.

 Texto: “Deja todo el de ustedes maga lingasa con [Dios], cay Ele ta cuida con ustedes.”—1 Pedro 5:7.

 Si cosa quierre decir: Si reza tu, hay oi gayot contigo el Dios. (Salmo 55:22; 65:2) Cay ta ama le contigo, hay ayuda le contigo realiza que bien importante tu.

 “Cuando ya aprende yo acerca con Jehova, ya ayuda se conmigo que man recover na bien duele suceso que ya experiencia yo. Ahora, ta puede yo habla con Dios na rezo el todo cosa yo ta sinti. Igual le na un amigo quien ta entende gayot con el de mio sentido.” —Ana, Belize.

 Texto: “Hay dale [si Jehova] justicia con el maga nuay tata y con aquellos con quien ta maltrata, para gendeh mas kanila hace miedo el maga gente na tierra.” —Salmo 10:18.

 Si cosa quierre decir: Gendeh dura, hay termina el Dios con el todo injusticia, incluido el maltratamiento y violencia na maga mujer.

 “Ya dale gayot conmigo alivio cuando ya sabe yo que gendeh dura, hay termina si Jehova con el maltratamiento na maga mujer. Ya dale este conmigo paz na pensamiento.”—Roberta, Mexico.

 Para aprende mas si paquemodo el Biblia ta dale esperanza, si porque puede tu confia con el maga promesa de este y si paquemodo el maga Testigo de Jehova ta ayuda con otro usando el Biblia, puede tu man request que visita contigo.

Man download un copia de este articulo que puede tu man print.