Del Mayo 23, 2023, el un alto oficial de salud del United States ya habla na publico que tiene negativo efecto el social media na manada maga jovenes.

•   “Maskin tiene maga beneficio el social media na cuanto maga bata y jovenes, tiene tambien manada maga evidencia que el social media puede causa manada peligro na mental y fisical salud del maga bata y jovenes.”—Social Media and Youth Mental Health: The U.S. Surgeon General’s Advisory, 2023.

 El oficial ya habla si porque kita debe queda con cuidao na usada del social media.

•   El maga jovenes que edad 12 hasta 15 “quien ta usa con el social media por mas de 3 hora cada dia tiene doble posibilidad que experiencia problema na mental salud, igual na depression y sobra de lingasa.”

•   Si el maga jovenes de edad 14 “ta usa mas grande tiempo na social media, mas mucho falta el diila durmida, tan bully kanila online, gendeh sila alegre na diila ichura, ta sinti sila nuay valor y depress, y mayoria ta sucede este na maga mujer compara na maga hombre.”

 Paquemodo puede protege el maga mayores con el diila maga anak na este maga peligro? Ta dale practical consejo el Biblia.

 No deja kanila. Como mayores, considera el maga peligro y decidi si debe ba el de tuyu anak usa social media.

•   Principio na Biblia: “Enseña con el bata na justo camino.”—Proverbio 22:6.

•   Para aprende pa mas, le con el articulo “Should My Child Use Social Media?”

 Si permiti tu con el de tuyu anak usa social media, queda alerto na maga posible peligro y pricura sabe si cosa ta hace el de tuyu anak online. Paquemodo?

 Protege con el de tuyu anak na maga gendeh buen informacion. Man train con el de tuyu anak para puede sabe y evita con el maga gendeh buen informacion.

•   Principio na Biblia: “Por causa del maga immoralidad, o maskin cosa clase de pendejadas o cabit, no ustedes permiti maskin nombra lang con esos entre con ustedes. . . . No ustedes man cuento por causa del maga cuchinadas o tonterias. No hace maga broma pesao.”—Efeso 5:3, 4, El Nuevo Testamento na Chavacano.

•   Para na maga practical sugestion, le con el articulo “Teaching Your Teenager Social Media Safety.”

 Pone limitacion. Por ejemplo, habla si cuando y paquemodo de tarda puede usa social media el de tuyu anak.

•   Principio na Biblia: “Bicia si cosa clase de vida ta vivi ustedes . . . como maga gente con buen juicio quien ta usa el tiempo embuenamente.”—Efeso 5:15, 16.

•   Usa con el whiteboard animation Con Cuidao na Usada de Social Network para ayuda con el de tuyu anak entende si porque importante que pone limitacion na usada del social media.