Posible Ba Tene un Buen Sistema de Economia?

MAN PLAY

Na manada nacion, el maga gente tan protesta cay ta sinti sila que tiene injusticia na sistema de economia. Ya queda mas grabe este maga problema por causa na COVID-19 pandemic. Ya tiene maga protesta cay ya puede mira el maga gente con el grande diferencia entre na maga rico y pobre por causa na maga lockdown, escasez y cay limitao lang el quien ta puede ricibi medical ayuda.

Hay tene ba fin el maga problema na economia que ta causa sufrimiento na maga gente? Si. El Biblia ta menciona si cosa hay hace el Dios para solva con el maga problema que ta enfrenta kita.

Maga problema na economia que hay solva el Dios

Problema: El maga gente gendeh ta puede establicia un sistema de economia que ta puede satisfecha con el necesidad del todo gente.

Solucion: El Dios hay cambia con el maga gobierno del gente por medio na de suyu mismo gobierno que ta llama como el Reino del Dios. Hay rula este estaba na cielo con el entero tierra.—Daniel 2:44; Mateo 6:10.

Resulta: Ciendo el Reino del Dios hay rula con el entero tierra, hay goberna este con el tierra na perfecto manera. El maga gente gendeh mas queda pobre o man lingasa acerca na financial. (Salmo 9:7-9, 18) Sino, hay man enjoy sila con el resulta del diila trabajo y tene un productivo y alegre vida junto con el diila maga familia. El Biblia ya promete: “Hay planta sila maga casa y queda sila alla y hay siembra sila maga uvas y come con el fruta de ese. Gendeh sila planta casa y otro el queda ni siembra sila y otro el come.”—Isaias 65:21, 22.

Problema: El maga gente gendeh ta puede evita con el maga situacion que ta causa kanila sufrimiento y escasez.

Solucion: Por medio na de suyu Reino, el Dios hay quita con el todo cosas que ta causa lingasa na financial.

Resulta: Bajo na cuidada del Dios, el maga gente gendeh mas experiencia maga cosas que hay causa kanila para man dificil na diila maga necesidad. Por ejemplo, gendeh mas tene maga guerra, escasez de comida y pandemia. (Salmo 46:9; 72:16; Isaias 33:24) El Dios ya habla: “El de mio maga gente hay esta na lugar que tiene paz, na maga residencia que tiene seguridad y na maga lugar de descanzo que tranquilo.”—Isaias 32:18.

Problema: Aquellos canalla y hambriento ta toma ventaja con otro.

Solucion: Aquellos quien hay queda bajo na Reino del Dios hay aprende dale mira amor y hace una con otro en vez el diila mismo cuerpo.—Mateo 22:37-39.

Resulta: Bajo na Reino, el todo hay imita con el amor del Dios que “gendeh ta hace una el [de suyu] mismo bien.” (1 Corinto 13:4, 5, NWT) El Biblia ta habla: “Gendeh sila causa maskin cosa peligro o destrozo na de mio sagrao monte, cay el tierra hay llena na saber de Jehova a igual con el agua ta tapa con el mar.”—Isaias 11:9.

El Biblia ta indica que ta vivi ya kita ahora na ultimo maga dia de este sistema de maga cosas y gendeh dura, el Dios hay cumpli con el de suyu promesa que hay termina le con el todo maga problema na economia. b (Salmo 12:5) Mientras nuay pa se sucede, el maga principio na Biblia puede ayuda contigo para enfrenta con el maga problema na economia que ta experiencia tu ahora. Por ejemplo, mira con el articulo “How to Live on Less” y “A Balanced View of Money.”

Gendeh justo idea acerca na Biblia y economia

Gendeh justo idea: Gendeh hay termina el pobreza cay ya habla si Jesus: “El maga pobre ay esta firmi junto con ustedes.”—Mateo 26:11, El Nuevo Testamento na Chavacano.

Verdad: Ta habla lang si Jesus el realidad: Mientras ta existi el injusticia na mundo, hay tene siempre maga pobre. Pero, el mensaje que ya predica si Jesus ya sirvi como “Buen Noticia con el maga pobre.” Incluido na cosa le ya habla amo el promesa que el Reino del Dios hay termina con el pobreza hasta para cuando.—Lucas 4:18, 43.

Gendeh justo idea: Aquellos quien quierre hace alegre con Dios debe queda pobre cay si Jesus ya habla: “Anda y vende todo el que tiene tu, y dale el sen con el maga pobre.”—Mateo 19:21.

Verdad: Na cosa le ya habla, gendeh si Jesus ta establicia un manera de vida que debe sigui el de suyu maga siguidores. Sino, ta dale le un especifico instruccion con el un joven hombre quien ya queda ocupao na de suyu maga riqueza. Ya anima si Jesus con el hombre que hace simple con el de suyu vida y acepta con el invitacion que queda uno del maga siguidores de Jesus.

Gendeh justo idea: Ta dale el Dios material riqueza con el maga gente si ta bendici le kanila cay el Biblia ya habla: “El bendicion de Jehova amo el ta hace rico con el un persona.”—Proverbio 10:22.

Verdad: Na Biblia, mas mucho, “el bendicion de Jehova” ta refiri na maga espiritual riqueza igual na alegre vida, un buen relacion con Dios y un bonito esperanza para na futuro. (Salmo 25:14; Juan 17:3) Deverasan, ya bendici el Dios material riqueza con el cuanto del de suyu maga siervo, pero mayoria de aquellos quien ya queda Cristiano gendeh rico. (Genesis 24:34, 35; Santiago 2:5) Gane, maskin si Jesus nuay tene manada material cosas.—Mateo 8:20.

Gendeh justo idea: El Biblia ta enseña acerca na un clase de comunismo cay este ya habla acerca na maga Cristiano del primer siglo: “Todo sila ta man compartihan el maga cosa-cosa sila tiene; ta vende sila el diila maga bienes y maga propiedad.”—Maga Actividad 2:44, 45.

Verdad: Este maga versiculo ta discuti acerca el temporario arreglamiento que ya hace de antes para dale el material necesidad del cuanto quien nuevo lang ya queda maga Cristiano. Este maga individual ya viaja para na Jerusalem para atende con el fiesta de Pentecostes del maga Judio. (Maga Actividad 2:5) Pero cuando ya queda sila maga Cristiano, ya esta pa sila na Jerusalem por largo tiempo para aprende pa mas acerca na diila nuevo creencia. Poreso, el otro maga Cristiano voluntario ya dona con el diila maga material cosas para tiene comida y lugar onde para esta este maga nuevo Cristiano.—Maga Actividad 2:41, 42, 46, 47.

a Jehova el nombre del Dios como cosa ta revela na Biblia.—Salmo 83:18.

b Para sabe si porque tu puede confia con el Biblia, mira con el articulo “The Bible—A Reliable Source of Truth.”

OTRO MAGA TOPICO