Del Domingo, Noviembre 20, 2022, ya termina el COP27 United Nations Climate Change Conference. Yan uyun el maga lider y experto que hay ayuda sila na financial con el maga pobre nacion para puede este enfrenta con el maga tragedia por causa del clima. Pero, manada el ta admiti que gendeh este puede solva con el problema de climate change.

•   “Alegre yo cay ya decidi kita que man pondo sen para ayuda con aquellos quien ta sufri por causa na climate change,” ya habla si António Guterres, secretary-general de United Nations, del Noviembre 19, 2022. “Pero sabe kita que gendeh este bastante . . . Na peligro siempre el diaton planeta.”

•   “Grande siempre el posibilidad que hay tene grabe tragedia na diaton mundo por causa na climate change.”—Mary Robinson, presidente de Ireland de antes y UN High Commissioner for Human Rights de antes, Noviembre 20, 2022.

 Manada el tan lingasa si cosa sucede na diaton planeta, especialmente el maga jovenes. Pero, puede ba gayot man ayudajan el maga nacion y cumpli con el diila promesa que solva con el climate change? Cosa ta habla el Biblia?

 El Biblia ta habla kanaton que maskin pa na sincero esfuerzo del maga gobierno, limitao siempre el cosa sila puede hace para solva con el problema na clima. Nota el dos razon si porque:

•   “El tiku gendeh mas puede hace derecho.”—Eclesiastes 1:15.

   Si cosa quierre decir: Limitao el cosa puede hace el maga gobierno cay nuay diseña con el maga gente para rula con el diila mismo cuerpo. (Jeremias 10:23) Maskin pa hay queda unido el maga nacion, gendeh siempre sila puede solva con el maga problema del mundo, maskin cosa pa sila hace.

•   “Cay el maga gente hay ama lang con el diila mismo cuerpo y con el sen. . . . Gendeh [sila] ta conforma man arreglo.”—2 Timoteo 3:2, 3, NWT.

   Si cosa quierre decir: Ya habla ya daan el Biblia que manada gente na diaton tiempo ahora el queda canalla y no quierre man ayudajan para na bien del todo.

 Pero, el futuro del diaton planeta gendeh ta depende na maga promesa del maga gobierno del gente. Ya iscuji el Dios un buen Rey quien hay rula na mundo, si Jesucristo. El Biblia ta habla acerca con ele:

•   “Hay tene le autoridad para rula. Llama con ele Bueno Dale Consejo, Poderoso Dios, Tata Eterno, Principe de Paz.”—Isaias 9:6.

 Si Jesus el Rey del Reino o del gobierno del Dios na cielo. (Mateo 6:10) Tiene le el poder y el sabeduria, y bien quierre le protege con el diaton planeta y con el maga gente. (Salmo 72:12, 16) Bajo na de suyu rulanza, el gobierno del Dios na cielo hay destroza con el “maga destrozador del mundo” y hay compone con el diaton planeta.—Revelacion 11:18, El Nuevo Testamento na Chavacano; Isaias 35:1, 7.

 Para aprende pa mas acerca si cosa el deverasan solucion para na climate change, le con el articulo “Climate Change and Our Future—What the Bible Says.”