Cada año, manada beses ta tene temblor. Maskin pa hinay lang el mayoria de ese, el maga fuerte temblor puede causa grande destrozo, sufrimiento y muerte. Tiene vez, ta causa se maga tsunami que donde ta sale afectao el maga lugar que cerca na mar y manada el quien ta muri. Ya predicta ba el Biblia que hay tene maga fuerte temblor?

Na este articulo

•  Ya predicta ba el Biblia que hay tene maga temblor?

•  El maga temblor ba na diaton tiempo amo cumplimiento del profecia na Biblia?

•  Cosa quierre decir para kanaton del profecia na Biblia acerca na maga temblor?

•  Maga gendeh justo idea acerca na profecia na Biblia y maga temblor

 Ya menciona el Biblia que hay tene maga temblor na un profecia que ya dale si Jesus. Puede kita le con el de suyu maga palabra na siguiente tres libro del Biblia:

 “Maga nacion ay man guerra contra otro maga nacion, y maga reino ay man guerra contra otro maga reino. Ay tene donde-donde . . . maga temblor.”—Mateo 24:7, El Nuevo Testamento.

 “Maga nacion ay man guerra contra otro maga nacion, y maga reino contra otro maga reino. Ay tene donde-donde maga temblor y maga calamidad de hambre.”—Marcos 13:8.

 “Ay tene donde-donde maga grande temblor, peste y hambre.”—Lucas 21:11.

 Si Jesus ya predicta que el “maga grande temblor” hay sucede “donde-donde” na tiempo que ta sucede tambien el maga guerra, escasez de comida y enfermedad. Este maga suceso que ta sucede junto-junto ta dale mira que ta vivi ya kita na fin de este sistema de maga cosas o “ultimo maga dia.” (2 Timoteo 3:1; Mateo 24:3) Asegun na cronologia del Biblia, el “ultimo maga dia” ya principia del 1914 y ta continua pa este hasta ahora.

 Si. El profecia de Jesus, incluido ya el cosa le ya habla acerca na maga temblor, ta sucede ya na diaton tiempo. Desde 1914, tiene ya mas de 1,950 fuerte temblor ya sucede que ya resulta na muerte del mas de dos millon gente. a Considera con el cuanto maga temblor que ya sucede del ya pasa maga año.

 2004—Indian Ocean. El 9.1-magnitude temblor ya causa un tsunami que ya alcanza na manada nacion y ya puede mata maga 225,000 gente.

 2008—China. El 7.9-magnitude temblor ya destroza con el maga barrio y ciudad. Ya carcula que tiene maga 90,000 gente el ya muri, maga 375,000 el yan injured y millones el ya queda nuay casa.

 2010—Haiti. El 7.0-magnitude temblor que tiene maga fuerte aftershock ya puede mata mas de 300,000 gente y mas de un millon el ya queda nuay casa.

 2011—Japan. Ya carcula que el 9.0-magnitude temblor y maga tsunami ya resulta na muerte del maga 18,500 gente y mas de cien mil el ya queda nuay casa. Yan damage el Fukushima power plant y ya causa se para man leak el maga peligroso radiation estaba na planta. Diez año despues, nuay pa siempre puede bira el maga 40,000 gente na diila maga casa cerca na power plant por causa na contaminacion de maga peligroso radiation.

 El profecia na Biblia acerca na maga temblor ta dale kanaton aviso si cosa el cerca ya sucede na futuro. Si Jesus ya habla: “Si ta mira ustedes este maga cosa-cosa, sabe ya ustedes cay el Reino de Dios cerca ya.”—Lucas 21:31.

 El Biblia ta explica kanaton que el Reino del Dios amo un deverasan gobierno na cielo donde si Jesucristo amo el Rey. Ese Reino amo el cosa ya enseña si Jesus con el de suyu siguidores que inclui na rezo.—Mateo 6:10.

 Si el Reino del Dios ya el rula na entero mundo, el Dios hay quita con el maga calamidad, incluido ya el maga temblor y gendeh mas este causa peligro na maga gente. (Isaias 32:18) Omento pa, hay solva le con el maga problema que ya causa el maga temblor na fisical y emocion del maga gente. (Isaias 65:17; Revelacion 21:3, 4) Para sabe pa mas, le con el articulo “Cosa Hace el Reino del Dios?”