Durante el ya pasa 30 año, manada el ya sinti que tiene ya paz entre na maga nacion y dol ta queda ya mas bueno el situacion. Pero posible ta sinti el cuanto que gendeh se deverasan por causa na maga reciente suceso.

•   “Tan lingasa el maga gente cay posible man umit el otro maga nacion na guerra na Gaza cay el Israel y Hezbollah ta principia ya man guerra na border de Lebanon.”—Reuters, Enero 6, 2024.

•   “El maga grupo que bajo na control del Iran ta ataca con el cuanto maga lugar. Mas pa, este nacion ya principia tambien hace otravez maga bomba nuclear y ahora, aliado ya de este el Russia y China. Por causa con ese, ya queda alarmao el maga nacion na Oeste.”—The New York Times, Enero 7, 2024.

•   “El ataque de Russia ta continua causa grande destrozo na Ukraine.”—UN News, Enero 11, 2024.

•   “Ta progresa el economia del China y ta omenta el fuerza militar de este. El Taiwan tambien mas determinao que esta como un independiente nacion. Mas pa, tiene tambien tension entre na China y U.S. Por causa con ese maga situacion, mas grande el posibilidad que tiene guerra que hay sucede.”—The Japan Times, Enero 9, 2024.

 Tiene ba cosa ya habla el Biblia acerca na ese maga suceso que ta sucede ahora? Hay resulta ba se na un guerra mundial?

 El Biblia nuay especifico menciona si cosa maga nacion el man guerra. Pero ya predicta este que na diaton tiempo, hay tene maga guerra y hay causa se “gulu na mundo.”—Revelacion 6:4, El Nuevo Testamento na Chavacano.

 El libro de Daniel ya predicta que “na tiempo del fin,” el maga poderoso nacion hay “man rimpujajan” o pricura domina con uno y otro. Hay dale sila mira si paquemodo de poderoso el diila maga fuerza militar y gasta grande cantidad de maga “tesoro” o sen.—Daniel 11:40, 42, 43.

 El Biblia ta habla que queda pa mas grabe el situacion na mundo. Si Jesus ya predicta que “ay tene . . . un grande calamidad [“grande tribulacion,” NWT] como noay pa tene desde el principio del mundo.” (Mateo 24:21) Despues, hay termina se na un guerra que ta llama Armagedon que amo el “guerra del Grande Dia del Dios todopoderoso.”—Revelacion 16:14, 16.

 Por medio na ese guerra, el Dios hay termina con el todo maga gobierno del gente que amo el causa del manada maga guerra. Entonces por causa na Armagedon, hay salva el maga gente. Para sabe si paquemodo el Armagedon hay lleva deverasan paz na tierra, le con el siguiente maga articulo:

•   “Cosa el Guerra de Armagedon?”

•   “Un Buen Noticia el Armagedon!”