Del Febrero 24, 2022, el Russia ya ataca con el Ukraine. Por causa con este, millones del maga gente el ya evacua dayun cay na peligro el diila vida. a

 “Tiene maga rebentada de bomba. Dificil explica si paquemodo quel de maka-miedo. Cuando ya puede kame sabe que tiene maga tren que ta lleva con el maga ta evacua, ya decidi kame que sale na diamon lugar. Necesita kame deja con el todo cosa cay el cada persona puede lang carga un diutay backpack. Puede lang kame lleva maga papeles, medicina, agua y un poco comida. Despues, ya anda kame na estacion del tren mientras tiene maga bomba ta rebenta alrededor kanamon.”—Nataliia, de Kharkiv, Ukraine.

 “Gendeh gayot kame ta pensa que hay sucede el guerra. Ya oi yo maga rebentada na cuanto parte del ciudad y tan uyuk el maga bentana. Poreso, ya decidi yo evacua. Ya lleva yo el cosa lang yo necesita. Ya sale yo na casa 8:00 del aga y ya munta tren para na Lviv y despues, yan bus para na Poland.”—Nadija, de Kharkiv, Ukraine.

Na este articulo

•  Cosa el deverasan causa si porque ta tene maga refugee?

•  Onde puede incuntra esperanza el maga refugee?

•  Puede ba ayuda el Biblia con el maga refugee ahora?

 Cosa el deverasan causa si porque ta tene maga refugee?

 El razon si porque ya tiene maga refugee estaba na Ukraine amo por causa cay el Russia ya ataca con ese nacion. Pero, el Biblia ta revela si cosa gayot el razon si porque ta tene maga refugee:

•   El maga gobierno del gente na entero mundo nuay puede dale el necesidad del maga gente. Mas mucho, aquellos na autoridad ta usa con el diila poder para controla y maltrata con otro.—Eclesiastes 4:1; 8:9.

•   Si Satanas Diablo, “el principe de este mundo,” tiene mal influencia con el maga gente. Poreso el Biblia ta habla: “Si Satanas tiene poder na entero mundo.”—Juan 14:30; 1 Juan 5:19, El Nuevo Testamento.

•   Puera con el maga problema que ta experiencia el maga gente por cuanto siglo, ta vivi ya kita ahora na tiempo que ya predicta el Biblia que donde “ay tene maga dificultad na ultimo maga dia.” (2 Timoteo 3:1) Gane, el maga guerra, natural calamidad, escasez de comida y epidemia amo el ta indica que ta vivi ya kita na ese tiempo—maga suceso que ta causa con el maga gente para evacua.—Lucas 21:10, 11.

 Onde puede incuntra esperanza el maga refugee?

 El Biblia ta revela que el diaton Creador, si Jehova, b amo un Dios quien ta ama y tiene compasion con el maga refugee y con aquellos quien forzao ya sale na diila lugar. (Deuteronomio 10:18) Ya promete le que hay solva le con el maga problema del maga refugee por medio na de suyu gobierno na cielo que ta llama Reino del Dios. Ese gobierno amo hay cambia con el maga gobierno del gente aqui na tierra. (Daniel 2:44; Mateo 6:10) Hay usa si Jehova con el de suyu Reino para quita con Satanas Diablo. (Roma 16:20) Ese Reino hay queda el gobierno de entero mundo y como resulta hay queda nuay division entre na maga nacion. El maga gente hay queda como un unido familia na entero mundo. Na ese tiempo, nunca mas el maga gente evacua na diila lugar cay el Biblia ya promete: “Hay sinta el cada uno kanila, abajo del de suyu pono de uvas y abajo del de suyu pono de higo, y nuay maskin quien hay hace miedo kanila, cay si Jehova del maga soldao el quien ya habla con este.”—Miqueas 4:4.

 El Reino del Dios lang el quien puede dale solamente solucion con aquellos quien ta queda maga refugee na diaton tiempo ahora. Hay usa si Jehova con el de suyu Reino para quita con el maga problema que ta causa con el maga gente para queda maga refugee. Considera con el cuanto ejemplo:

•   Guerra. “Hay termina [si Jehova] con el maga guerra na entero mundo.” (Salmo 46:9) Para sabe si paquemodo se puede hace el Dios, le con el articulo “Paz na Mundo—Paquemodo Puede Obtene?”

•   Maltratamiento y violencia. “Hay salva [si Jehova] kanila desde na mal tratamiento y na violencia.” (Salmo 72:14) Para sabe si paquemodo el maga gente puede cambia con el diila mal custumbre que ya dura ya sila tiene, le con el serie de maga articulo que tiene titulo “Breaking the Cycle of Hatred.”

•   Pobreza. “Hay salva [si Jehova] con el pobre quien ta pidi ayuda.” (Salmo 72:12) Para mira si paquemodo el Dios hay quita con el maga causa del pobreza, le con el articulo “Is a Fair Economic System Possible?”

•   Escasez de comida. “Hay tene abundancia de grano na tierra.” (Salmo 72:16) Para sabe si paquemodo el Dios asigura que nuay ni un gente quien hay queda con hambre, le con el articulo “A World Without Hunger?”

 Puede ba ayuda el Biblia con el maga refugee ahora?

 Si. Puera que ta dale este un asigurao esperanza na futuro con el maga refugee, el Biblia puede ayuda kanila para enfrenta con el maga dificultad ahora.

 Principio na Biblia: “No ustedes man lingasa. Pero si tiene ustedes necesidad, manda sabe con ese con el Dios por medio del de ustedes maga rezo y peticion junto con maga dalida de gracias. Y entonces el paz del Dios, ese paz que noay quien ta puede entende, ay guarda el de ustedes maga corazon y maga pensamiento.”—Filipo 4:6, 7.

 Si cosa quierre decir: Pidi con Dios paz na pensamiento y corazon na maskin cosa situacion tu ta enfrenta. Le con el articulo “Philippians 4:6, 7—‘Do Not Be Anxious About Anything.’”