Na entero mundo, manada gente el interesao na veganism.

•   “El veganism amo un manera de vida donde el maga gente ta hace el todo para evita hace sinti duele o usa maga animal para na comida, ropa o otro pa maga cosas.”—The Vegan Society.

 El cuanto maga gente ya iscuji queda vegan gendeh lang por causa cay quierre sila protege con el maga animal, sino cay quierre tambien sila cuida con el tierra, con el diila salud o por causa na diila religion.

•   “Diferente el veganism na mayoria na maga diet del maga gente cay ta considera sila con este como un creencia, un justo decision y un cosa que puede hace el cada persona para cambia y hace enbuenamente con el mundo.”—Britannica Academic.

 El veganism ba el solucion na maga problema del tierra? Cosa ta habla el Biblia?

 El Biblia ta indica que el diaton Creador, si Dios Jehova, a ta mira con el maga gente que mas alto compara na maga animal y que bajo na autoridad del gente el maga animal. (Genesis 1:27, 28) Ya llega el tiempo, ya permiti el Dios con el maga gente que come maga animal. (Genesis 9:3) Pero, no quierre le que maltrata con el maga animal.—Proverbio 12:10.

 Asegun na Biblia, un personal decision si come ba kita carne o gendeh. b Gendeh kita ta queda mas buen gente na mirada del Dios por causa na diaton decision acerca na comida. (1 Corinto 8:8) Nuay quien debe juzga con el un persona por causa lang na cosa le ta iscuji come.—Roma 14:3.

 El Biblia ta dale mira que el diaton manera de vida gendeh puede solva con el maga problema na mundo. Manada na maga problema amo resulta del gendeh bueno sistema na politica, comunidad y economia de este mundo y nuay gente quien puede compone con ese maga sistema. El Biblia ta habla:

•   “El tiku gendeh mas puede hace derecho.”—Eclesiastes 1:15.

 El diaton Creador hay solva con el maga problema que ta experiencia kita. El Biblia ya usa maga figurativo palabra para dale mira si cosa le hay hace.

•   “Despues, ya puede yo mira un nuevo cielo y un nuevo mundo, cay el primer cielo y el primer mundo [“el cielo y mundo de antes, ” NWT], ya desaparece ya y el mar noay mas ya.”—Revelacion 21:1, El Nuevo Testamento na Chavacano.

 El Dios hay cambia con el maga gobierno del gente o “el cielo . . . de antes” na un “nuevo cielo,“ el de suyu Reino na cielo. El de suyu Reino hay quita con el “mundo de antes,” aquellos maga malo y hay rula este con el “un nuevo mundo” o aquellos quien conforme somete na de este autoridad.

 Bajo lang na rulanza del Reino del Dios el maga gente puede vivi con paz junto na maga animal y completamente puede cuida con el tierra.—Isaias 11:6-9.