ESTA ALERTO!
Violencia Por Causa na Politica—Cosa el Biblia Ta Habla?
Manada maga violencia na politica el ta sucede na entero mundo.
Durante el tiempo del 2023-2024 eleccion na Mexico, ya mata con el 39 candidato y ya sucede el otro pa maga clase de violencia por causa na politica. Mas ya agraba el violencia na ese nacion compara de antes.
Nuevo lang, na Europe, ya sucede el manada violencia que tiene que hace na politica. Gane, ya pricura mata con el prime minister de Slovakia del Mayo 15, 2024.
Ya espanta gayot el maga gente na United States cuando tiene quien ya pricura mata con el presidente de antes que si Donald Trump del Julio 13, 2024.
Porque ta sucede este maga violencia? Llega pa ba el tiempo que perde este? Cosa ta habla el Biblia?
Ya predicta ya daan que hay causa division el politica
Ya habla ya daan el Biblia que na diaton tiempo que ta llama como “ultimo maga dia,” manada maga gente hay tene maga custumbre que hay causa violencia y division.
“Hay tene maga dificultad na ultimo maga dia. Cay el maga gente . . . hay queda . . . nuay apresacion, gendeh leal, . . . no quierre man arreglo, . . . violente, . . . traidor, duro cabeza.”—2 Timoteo 3:1-4, NWT.
Ya habla tambien el Biblia que durante este tiempo, hay tene rebellon contra na gobierno y gulu na politica. (Lucas 21:9) Pero, gendeh este esta hasta para cuando.
Hay perde ya el violencia que tiene que hace na politica
El Biblia ya habla que por medio na gobierno del Dios na cielo, hay quita le con el todo gobierno del maga gente.
“El Dios na cielo hay forma un reino que . . . hay machaca y termina con este todo maga reino, y este solamente hay esta hasta para cuando.”—Daniel 2:44.
El Reino del Dios hay hace unido con el maga gente y lleva paz na entero tierra.
El Rey de este, si Jesucristo, amo el “Principe de Paz” y hay asigura le que “el paz hay esta hasta para cuando.”—Isaias 9:6, 7.
Maskin ahora pa lang, el maga gente quien bajo na ese Reino ta aprende ya si paquemodo vivi con paz. Como resulta, el Biblia ya habla: “Hay hace sila pilo de arrao con el diila maga espada y con el diila maga lanza hace sila sanggut. El maga nacion gendeh mas alza espada contra otro nacion ni aprende pa sila man guerra.”—Isaias 2:3, 4.
Para sabe pa mas, le con el articulo “Cosa Hace el Reino del Dios?” y mira con el video Cosa el Reino del Dios?
Baka Gusta Tambien Tu
ESTA ALERTO!
Nuay Mas Confianza el Maga Gente na Maga Politico—Cosa el Biblia Ta Habla?
El Biblia ta anima kanaton que debe kita queda con cuidao si con quien kita confia. Ta menciona tambien este si quien lang el deverasan puede dale mas bonito futuro.
ESTA ALERTO!
Porque Ta Causa Grabe Division el Politica?—Cosa el Biblia Ta Habla?
Mas ta queda dividido el maga gente por causa na politica. El Biblia ya menciona si cosa el solucion—un lider quien puede hace unido con el todo maga gente.
ENSEÑANZA DEL BIBLIA
Pruba con el Libre Estudiada
Pruba con el diamon libre estudiada de Biblia junto con el un Testigo de Jehova.
