Posible tiene maga cinco billon gente el quien hay mira con el FIFA World Cup que hay hace principia Noviembre 20 hasta Deciembre 18, 2022. Manada ta pensa que este sport event puede hace unido con el maga gente gendeh lang durante el tiempo que ta mira sila con el juego.

•   “El sport tiene poder para cambia con el mundo. Tiene tambien este poder para dale inspiracion con otro. Mas pa, tiene este el poder para hace unido con el maga gente na manera que gendeh puede hace el otro cosas.”—Nelson Mandela, presidente del South Africa de antes.

•   “El football . . . ta hace unido con el maga gente cay igual el cosa sila ta esperanza, igual sila alegre y con gana, igual sila ta ama con otro y tiene cosa comon kanila.”—Gianni Infantino, presidente del FIFA. a

 El World Cup ba o el maskin cosa sport event puede hace unido con el maga gente? Tiene pa ba esperanza que tene kita paz y unidad?

 El World Cup na este año ya causa con el maga gente para pensa gendeh lang con el football. El maga gente ta discuti acerca na maga issue na comunidad y politica que donde envuelto el human rights, discriminacion y el problema na economia.

 Maskin pa ansina, manada siempre el quierre-quierre mira maga international sport event igual con el World Cup. Pero el realidad, este maga event gendeh puede hace permanente unido con el maga gente. Gane na este maga ocasion, puede mira el maga umalin custumbre y accion que asegun na Biblia amo el indicacion que ta vivi ya kita na tiempo que ta llama el “ultimo maga dia.”—2 Timoteo 3:1-5, El Nuevo Testamento na Chavacano.

 El Biblia ta dale mira si quien el deverasan puede kanaton dale unidad. Ya promete el Dios que el todo maga gente na tierra hay queda unido bajo na un gobierno na cielo que ta llama “Reino de Dios.”—Lucas 4:43; Mateo 6:10.

 El Rey de ese Reino que si Jesucristo hay asigura que hay tene paz na entero mundo. El Biblia ya habla:

•   “Hay florea el maga recto, y el paz queda abundancia.”—Salmo 72:7.

•   “Hay salva le con el pobre quien ta pidi ayuda . . . Hay salva le kanila desde na mal tratamiento y na violencia.”—Salmo 72:12, 14.

 Maskin ahora pa lang, el maga enseñanza de Jesus ya puede ya hace unido con el millones de maga gente que estaba na 239 nacion. Ya aprende sila si paquemodo quita el rabia con otro. Para sabe mas, le con el serie de maga articulo que tiene titulo “Breaking the Cycle of Hatred.”