Un especial ocasion na diaton historia el 2020 asemblea de region. Este el diaton primer asemblea que yan record para na entero mundo y ya hace available na Internet! Pero na Malawi y Mozambique, mayoria del diaton maga hermano y hermana ya puede man access con el asemblea maskin nuay Internet. Paquemodo se ya queda posible?

 Ya aproba el Coordinators’ y Teaching Committee del Cuerpo Gobernante que man broadcast con el asemblea na television y radio na Malawi y Mozambique. Porque este necesita? El Malawi amo uno na tiene de con todo carro Internet na entero mundo. Poreso, poco lang del diaton maga hermano y hermana alla el tiene Internet. Como ya habla si William Chumbi, un miembro del Malawi Branch Committee: “Puede man access el maga hermano y hermana con el asemblea por medio lang na radio y TV.” Ya habla tambien si Luka Sibeko, quien ta sirvi tambien na Malawi Branch Committee: “Si gendeh kame puede man access na TV y radio, poco lang del maga hermano na teritorio del diamon branch el puede beneficia con el asemblea.” Na Mozambique tambien, poco lang del maga hermano y hermana el quien tiene sen para cumpra gadget, mas malo ya para paga Internet.

 Por causa con el COVID-19 pandemic, el cuanto estacion de TV y radio tan broadcast ya daan con el maga miting de congregacion. a Ya pidi pabor el maga hermano con este maga estacion que omenta con el hora para man broadcast con el asemblea.

 Na Malawi, ya tiene problema el maga hermano. Mas mucho, el maga broadcasting station ta dale lang un hora na diila maga customer. Tan lingasa este maga estacion que si queda largo el programa, baka perde el gana del maga audience. Pero el diaton maga hermano ya habla que el diaton trabajo ta puede ayuda con el comunidad. Maskin tiene lockdown, ta dale kita con el maga gente maga buen noticia estaba na Biblia que puede ayuda kanila para queda buen gente na comunidad y para tene alegre familia. Cuando ya oi sila con este, el maga estacion ya permiti que dale con el maga hermano omento hora para man broadcast con el asemblea.

 Na Malawi, el asemblea ya puede man broadcast na un estacion de TV y na un estacion de radio que ta puede alcanza con el millones de maga gente na entero nacion. Na Mozambique, el asemblea ya puede man broadcast na un estacion de TV y 85 maga estacion de radio.

 Na este dos nacion, $28,227 b el ya puede gasta para man broadcast con el asemblea na TV y cerca $20,000 para man broadcast na radio. Otro-otro el pagada para na maga estacion de radio—tiene $15 para na maga diutay estacion y $2,777 para na nationwide maga estacion.

 El maga hermano ya hace esfuerzo para puede usa enbuenamente con el maga donacion. Por ejemplo, na Malawi, ya puede sila convinci con el maga estacion que dale kanila discount y gane, tiene quien kanila ya dale 30 por ciento discount. Por causa con este maga discount, ya puede sila man save $1,711. Na Mozambique, el cuanto maga estacion ya permiti que menora con el precio por causa na diaton buen reputacion de pagka-honesto y cay na hora kita ta paga.

 Alegre gayot el maga hermano cay ya puede sila mira o oi con el asemblea na maga estacion na diila lugar. Si Patrick, un anciano de Malawi, ya habla: “Ta rindi ga’t kame gracias con el Cuerpo Gobernante na todo cosa sila ya hace para kanamon durante este pandemic.” Ya habla si Isaac que de Malawi tambien: “Nuay kame otro gadget poreso ta aprecia gayot kame con el especial provision estaba na organizacion de Jehova que oi con el asemblea na radio. Como resulta de este provision, el de mio entero familia ya beneficia con el asemblea. Prueba este que ta ama si Jehova con el de suyu maga siervo.”

 El 2020 asemblea de region amo el primer asemblea del un publisher na Mozambique. Ele ya habla: “El arreglamiento que mira con el asemblea na TV ta hace acorda conmigo que si Jehova el Dios Todopoderoso. Nuay con ele puede sangga el pandemic para dale espiritual comida y adentro pa mismo na diamon casa. Ya puede ga’t yo mira el amor entre na maga siervo de Jehova. Convincido yo que este el verdadero religion.”

 El un anciano que si Wyson ya habla: “Quierre yo rindi gracias para na cuidada del fiel esclavo durante este pandemic. Grande ayuda este provision que man broadcast con el asemblea na radio y TV. Maskin pobre lang kame y taqui na pobre nacion, ya puede siempre kame beneficia con el programa.”

 Para na 2021 asemblea de region, ya aproba otravez el Coordinators’ Committee y Teaching Committee que man broadcast con el asemblea na TV y radio na cuanto comunidad. Paquemodo kita ta puede suporta con el maga gasto na este manera de asemblea? Por medio na maga donacion para na worldwide work que mayoria ya dale por medio na diferente maga manera que ya menciona na donate.pr418.com. Gracias na de ustedes maga donacion.