Del año 2020, manada calamidad el ya sucede y ya principia el COVID-19 pandemic na entero mundo. Paquemodo el maga Testigo de Jehova ya ayuda con aquellos quien ya sale afectao?

 Durante el 2020 service year, a el Coordinators’ Committee del Cuerpo Gobernante ya aproba que usa 28 millon dollar b na disaster relief. Ya puede este dale el necesidad del maga victima del mas de 200 calamidad que ya sucede—incluido el COVID-19 pandemic, maga tifun, avenida na Africa, escasez de comida na Venezuela y secas na Zimbabwe. El maga donacion ya usa para cumpra comida, agua, onde queda, camisa y para na curada. Ya usa tambien con este para cumpra maga materiales que ta usa para limpia, para compone y para construi otravez maga casa y facilidad. Considera con el cuanto ejemplo de relief work.

 COVID-19. Na entero mundo, el pandemia ya afecta con el diaton maga hermano y hermana na fisical, emocional y financial. Para ayuda kanila, ya forma maga 800 Disaster Relief Committee (DRC) na entero mundo. El maga hermano na este committee ta mira con el necesidad del diaton maga hermano y hermana y ta reporta dayun na Coordinators’ Committee para sabe sila si paquemodo dale el diila necesidad.

 Na entero año, ya ayuda el DRC con el manada para obtene comida, agua, maga cosas necesita para usa man sanitize y medicina. Na cuanto maga lugar, ya ayuda tambien el maga DRC con el maga anciano na congregacion para ayuda con el maga hermano si paquemodo ricibi ayuda estaba na gobierno.

 El maga gendeh Testigo de Jehova ya puede nota con el diaton relief work. Por ejemplo, si Field Simwinga, el district commissioner na Nakonde, Zambia, ya habla con el diaton maga hermano: “Ta rindi gayot kame gracias con el ayuda que ya dale ustedes na tiempo que bien necesita el maga familia quien ya sale afectao.”

 Escasez de Comida na Angola. Por causa na COVID-19 pandemic, ya menora el supply de comida na Angola y ya queda este bien caro. Manada del diaton maga hermano y hermana el yan dificil compra comida.

 Ya pidi ayuda na Branch de Brazil que imbia comida con el diaton maga hermano na Angola. Para usa enbuenamente con el diaton donacion, yan research el maga hermano si paquemodo cumpra y imbia con el comida. Como resulta, ya decidi que bultu cumpra con el maga comida. El cada pack de comida que ya cumpra y ya imbia, ya llega maga $22 lang y tiene ya este maga 20 Kilo (44 lb) de comida igual na arroz, beans y aceite. Na este tiempo, ya puede ya imbia 33,544 pack de comida que tiene pesades de 654 tonelada (721 U.S. tonelada). Todo-todo, incluido el local comida, este provision ya puede dale come con el mas de 50,000 gente!

 Cosa ya sinti el diaton maga hermano acerca na este ayuda? Si Alexandre, quien ta queda na lejos lugar na Angola, ya habla: “Evidencia este que ta ama conmigo si Jehova y gendeh yo solo. Valoroso yo na organizacion de Jehova!” Si Mariza que un solo nana, ya habla: “Ya oi si Jehova con el de mio rezo. Ta rindi yo gracias con ele y na de suyu organizacion!”

 Ayuda na Tiempo de Secas na Zimbabwe. Durante el 2020 service year, el Zimbabwe ya enfrenta grabe secas y millones de gente el ya sufri na hambre. Manada na maga Testigo de Jehova na Zimbabwe el ya falta comida.

 Ya forma cinco DRC para ayuda dale comida con el diaton maga hermano. Manada del maga hermano y hermana ya ayuda man pack con el maga comida y ya pone se na maga vehiculo. El otro tambien, ya dale presta con el diila vehiculo. c Durante el 2020 service year, ya usa $691,561 para dale come con el mas de 22,700 gente!

 Na cuanto situacion, ya acaba ya el comida del maga hermano cuando ya llega el ayuda estaba na organizacion. Poreso, el diaton maga hermano ya rindi gayot gracias con Jehova cuando ya llega el comida. El cuanto, ya principia pa gane canta maga Kingdom song.

 Na un lugar, el dos viuda que maga Testigo de Jehova ya atende na miting que ya organiza na comunidad para discuti acerca na ayuda estaba na un privado organizacion (NGO). Pero ya mezcla ya politica na miting, poreso el maga hermana ya decidi que gendeh sila man uyun con el cosa sila necesita hace para obtene con el ayuda. Cuando ya sale sila, ya gangguia kanila el maga gente y ya habla: “No mas kamo qui bira para pidi kanamon comida!” Pero dos semana lang despues, el diaton maga hermano ya llega na ese lugar y ya dale comida con el diaton maga hermana—antes pa llega el ayuda del NGO!

 El disaster relief na Zimbabwe ya tiene tambien buen resulta. Por ejemplo, considera con el experiencia de Prisca, quien ta queda na un diutay comunidad. Ya enfrenta maga dificultad si Prisca por causa na secas pero ya dedica le siempre el de suyu tiempo na ministerio cada Miercoles y Viernes, maskin pa durante el tiempo que necesita ara con el tierra para na siembrada. El maga gente na de suyu lugar ya gangguia con ele y ya habla: “Por causa na de tuyu predicacion, hay pasa hambre el de tuyu familia.” Pero, si Prisca ta habla kanila: “Nunca deja si Jehova con el de suyu maga siervo.” Nuay dura despues quel, ya ricibi le ayuda estaba na diaton organizacion. Ya dale se positivo impresion na cuanto del maga vecinos de Prisca. Sila ya habla: “Nuay gayot deja el Dios contigo poreso quierre kame aprende mas acerca con ele.” El maga siete vecinos de suyu ahora ta oi na maga miting de congregacion que tan broadcast na radio.

 Mientras ta queda kita cerca na fin, hay continua kita enfrenta maga calamidad. (Mateo 24:3, 7) Ta aprecia gayot con el de ustedes pagka-bondadoso por medio na de ustedes maga donacion na diferente manera que puede mira na donate.pr418.com. Puede gayot con ese usa enbuenamente para dale ayuda na justo tiempo na diaton maga hermano.