Ya habla ya daan el Biblia que na diaton tiempo, hay tene maga guerra, temblor, epidemia y otro pa “maga cosa-cosa bien maca-miedo gayot.” (Lucas 21:10, 11, El Nuevo Testamento) Ya continua cumpli ese profecia durante el 2022 service year. a Por ejemplo, ta continua el guerra na Ukraine que ta afecta con el vida del millones de maga gente. El mayoria del maga gente na mundo ta continua siempre experiencia con el COVID-19 pandemic. Mas pa, bien manada el ya queda victima del maga natural calamidad, igual na maga temblor na Haiti, y maga tifun na Central America, Pilipinas y na southeast parte del Africa. Paquemodo el maga Testigo de Jehova ya ayuda con aquellos quien ya sale afectao?

 Durante el 2022 service year, el diaton organizacion ya dale ayuda con el maga victima de maga 200 calamidad! Todo-todo, ya gasta kita cerca 12 millon dollar para con ese. b Considera si paquemodo ya usa con el de tuyu maga donacion para ayuda con el maga victima del dos calamidad.

 Del Agosto 14, 2021, ya tiene magnitude 7.2 temblor na sur parte del Haiti. Maka-triste cay tres Testigo el ya muri—dos hermana y un hermano. Aquellos quien ya salva ya sufri siempre na fisical y na emocional. El un hermano que si Stephane ya habla: “Bien manada gente el ya muri na entero ciudad poreso por mas de dos meses, pirmi tiene intierro ta hace cada semana.” El otro hermano que si Éliézer ya habla: “Manada maga Testigo el nuay casa, camisa, sapatos y otro pa maga necesidad. Por manada meses, ta tiene sila miedo cay pirmi ta tiene aftershock.”

 Ya ayuda dayun el diaton organizacion. El Haiti branch ya dale mas de 53 tonelada de comida y maga tent, tarpaulin, corchon y solar charger para na cellphone. Mas pa, durante el 2022 service year, mas de 100 casa el ya puede compone o ya construi otravez. Mas de un millon dollar el ya usa para con este.

 Ya aprecia gayot el diaton maga hermano y hermana con el ayuda que ya dale kanila. Si Lorette ya habla: “Por causa na temblor, ya queda gayot destrozao el diamon casa y el diamon negocio. Nuay kame cosa para come pero el organizacion de Jehova ya ayuda kanamon y ya dale el todo cosa kame necesita. Si Micheline ya habla: “El temblor ya destroza con el casa onde kame ta esta del de mio maga anak. No sabe mas yo si cosa hace poreso ya pidi yo ayuda con Jehova na rezo y ya contesta le por medio na de suyu organizacion. Tiene ya kame ahora un durable casa onde kame ta queda. Determinao yo para hace el todo para dale mira el de mio apresacion con Jehova.”

 El maga local autoridad ya puede nota con el cosa kita ta hace. El quien ta mira na city hall de L’Asile ya habla: “Ya puede yo mira que dayun ustedes ya anda aqui para ayuda. Ya puede tambien yo observa que tiene gayot ustedes grande respeto na maga autoridad. Alegre yo cay gendeh ustedes interesao na sen. Sino, quierre gayot ustedes ayuda con el maga gente. Claro gayot que tiene ustedes amor.”

 Del Enero 24, 2022, el Tifun Ana ya tupa na Mozambique y despues na Malawi. Ese maga lugar ya experiencia fuerte ulan y viento—hasta 100 kilometers per hour. Como resulta, ya queda nuay corriente, ya queda destrozao el maga fuente y ya tiene grande avenida.

 Mas de 30,000 Testigo na Malawi y Mozambique el ya sale afectao na este calamidad. Si Charles, un hermano quien ya ayuda na disaster relief work, ya habla: “Cuando ya mira yo que ta sufri el maga hermano y si paquemodo de grande el ya perde kanila, ya queda gayot yo bien triste.” Y ya queda pa mas grabe el situacion cay yan anud el diila comida y el maga cosa sila ya siembra. Manada maga hermano el ya queda nuay casa. Maka-triste cay ya muri el mujer del un hermano y el de suyu dos anak mujer cay yan lumus sila cuando yan baliscat el rescue boat onde sila ta munta.

 Makamiedo quel tiempo. Cuando ala-una de aga na Nchalo, Malawi, el familia Sengeredo ya puede oi con el fuerte corentazo de agua. Ya subi gale el agua na dos rio! Si Hermano Sengeredo ya decidi que debe ya sila evacua. Un buen decision quel cay nuay tarda ya tumba el diila casa por causa na avenida. Yan anud el diila maga gamit y el otro ya queda destrozao. Ya decidi el diila familia que anda na Kingdom Hall que maga 30 minuto de lejos sale na diila casa si camina. Pero na aquel tiempo, ya alcanza kanila dos hora antes llega. Maskin pa bien muhao sila y cansao, safe sila ya llega.

 El maga branch na Malawi y Mozambique ya hace dayun manera para ayuda. Ya dale sila direccion con el maga circuit overseer y maga anciano que mira si cosa el necesidad del maga hermano alla, y dale espiritual y emocional suporta con el maga victima. Yan assign con el manada Disaster Relief Committee (DRC) para mira con el relief work y este maga committee ya principia dayun ayuda con el maga hermano para puede sila ricibi comida y otro pa maga necesidad. Mas de $33,000 el ya gasta para ayuda con el maga hermano y mas de $300,000 para compone y construi otravez con el diila maga casa.

 El maga DRC ya usa enbuenamente con el maga pondo y bien importante este cay ya subi el precio del maga cosas. Por ejemplo, na primer siete meses del relief work, el precio del harina de maiz que amo el comon comida na Malawi, ya subi maga 70 por ciento. Ya subi tambien el precio del gasolina. Para gendeh gasta grande, el maga hermano ya cumpra bultu de comida y maga materiales de casa alla mismo na diila lugar. Ya tiene sila maga discount y ya evita gasta grande na transportacion.

 Ya aprecia gayot el maga siervo de Jehova con el ayuda que ya ricibi sila. Si Felisberto, un hermano na Mozambique, ya habla: “Nuay otro organizacion el ya dale bien manada ayuda: maga materiales para construi casa, transportacion, maga voluntario, comida y amable guia. Un ejemplo gayot este del amor que ya menciona si Jesus na Juan 13:34, 35.” Si Ester, un viuda na Malawi de quien casa ya sale destrozao, ya habla: “Ya sinti yo que dol nuay ya yo esperanza cay nuay yo sen para construi otravez otro casa. Poreso cuando ya llega el maga hermano y ya construi otravez con el de mio casa, ya sinti yo que dol na Paraiso ya yo.”

 Mientras ta queda kita mas cerca na nuevo mundo, hay continua kita experiencia mas manada calamidad. (Mateo 24:7, 8) Pero por causa na de ustedes pagka-bondadoso, asigurao kita que el maga siervo de Jehova hay ricibi el ayuda que necesita sila. Puede mira na donate.pr418.com si paquemodo ustedes puede dona. Gracias na de ustedes pagka-bondadoso.