El Biblia ya habla que el “maga nacion ay man guerra contra otro maga nacion” y hay tene maga calamidad durante el “fin del mundo.” (Mateo 24:3, 7, El Nuevo Testamento na Chavacano) Ya puede kita mira que ta continua cumpli este profecia durante el 2023 service year. a Pero, maskin pa tiene maga guerra y natural calamidad na cerca 100 maga nacion, ya puede demonstra el maga Testigo de Jehova el amor del Dios. Paquemodo?

 Durante el 2023 service year, el diaton maga hermano ya sale afectao na mas de 200 natural calamidad o otro pa maga tragedia que ya causa el gente. Todo-todo, el maga Testigo de Jehova ya gasta mas de diez millon dollar b estaba na maga donacion para na worldwide work para ayuda con aquellos quien ya sale afectao na maga calamidad. Puera con ese, el maga hermano y hermana ta usa tambien con el diila personal sen para ayuda con aquellos quien ta necesita na diila lugar. Considera si paquemodo ya usa con el de tuyu maga donacion para ayuda con el maga hermano y hermana quien ya sale afectao na dos maga calamidad.

 Regular tiene avenida na cuanto lugar na Nigeria. Pero, el avenida del Octubre 2022 amo el de con todo grabe del ya pasa diez año. Mas de 676,000 hectarea de simentera el ya destroza y mas de dos millon gente el ya evacua. El Nigeria branch ya forma dayun maga Disaster Relief Committee para organiza con el relief work y dale espiritual ayuda na maga hermano y hermana.

•   7,505 publisher el quien ya evacua

•   860 casa el yan damage o ya destroza

•   90 Kingdom Hall y un Assembly Hall el ya entra agua

 Mas de $250,000 el ya gasta para na disaster relief. Incluido na gasto el:

•   Comida igual na arroz, beans y noodles

•   Maga gamit na casa igual na corchon y mosquitero

•   Componida del maga casa que yan damage

 Paquemodo el diaton maga hermano ta asigura que ta usa enbuenamente con el maga donacion? El un manera amo ta chequia sila con el cada building para mira si puede pa ba con este compone. Si necesita ya gayot hace nuevo, ta construi sila maga building que simple el diseño y comon na diila lugar.

 Ta rindi gayot gracias el diaton maga hermano y hermana na ayuda que ya ricibi sila. El un hermana ya habla: “Ya queda gayot trambulicao el diamon vida cay ya destroza el todo diamon maga simentera y ya queda kame nuay casa. Grande alivio cuando ya anda el maga hermano y hermana aquel mismo dia para ayuda kanamon y dale lugar onde kame puede esta. Ya ricibi tambien kame maga comida estaba na branch office. Yan bilib gayot kame cuando ya puede kame mismo mira el cumplimiento del Juan 13:34, 35. . . . Ta existi gayot el deverasan amor. Iyo y el de mio entero familia ta rindi gayot gracias na maga hermano cay ya anda sila ayuda kanamon na tiempo que necesita kame.”

 Ya puede tambien nota el otro na comunidad con el diaton relief work. El un lider de comunidad na Sabagreia, Bayelsa, ya habla: “Manada maga organizacion o religion na entero mundo pero el maga Testigo de Jehova lang el ya puede hace ansina. . . . [El de ustedes] organizacion amo uno na de con todo bueno na entero mundo.”

 Del Febrero 2023, tiene mas de 400 quema que ya causa grande destrozo na Chile. Mas de 430,000 hectarea de tierra, incluido el maga importante facilidad na Chile, el ya sale destrozao. Maga 8,000 gente el ya acaba evacua. Nuay dura despues del calamidad, el branch office ya principia organiza con el trabajo para dale ayuda.

•   222 publisher el quien ya evacua

•   20 casa el ya sale destrozao

 Mas de $200,000 el ya gasta para na disaster relief. Incluido na gasto el:

•   Comida y agua

•   Gasolina, maga gamit para na limpiada y medicina

•   Construida del maga casa que yan damage

 Ya espanta el un familia cuando ya sabe sila que destrozao ya el todo cosa sila tiene, incluido el diila casa y negocio. Por causa con ese, nuay mas sila lavida. Na primer cuanto dia despues del tragedia, bien triste el familia cuando ya puede sila mira que destrozao ya el diila casa. Pero cuando ya puede sila mira que ta construi otravez con el diila casa, hinay-hinay sila ya sinti alivio. Cuando ya puede sila mira el amor del maga voluntario, ya puede quel ayuda kanila para enfrenta con el situacion. Ya puede quel manda move kanila para man voluntario tambien na construida del maga casa del otro pa maga hermano.

 Manada maga hermano y hermana el ya aprecia gayot con el relief work que ta hace. El un hermano ya habla: “Bonito gayot el arreglamiento de Jehova que forma maga Disaster Relief Committee. Un dia lang despues del tragedia, talli ya sila para dale el necesidad del maga hermano y hermana. Deverasan, ta puede anima kanaton si ta le kita acerca na maga disaster relief na otro maga lugar. Pero bien diferente gayot si kanaton mismo se sucede. Ta puede tu mas aprecia con el organizacion; si paquemodo el maga hermano y hermana ta imita con el maga calidad de Jehova; y si paquemodo sila de interesao na material, espiritual y emocional necesidad diaton. Ta puede gayot kita mismo mira con el amor de Jehova.”

 Mientras ta vivi kita na fin de este sistema, hay expecta kita mas manada calamidad. (Lucas 21:10, 11) Pero, por medio na Cristiano congregacion, puede kita mira que junto kanaton el diaton amable Rey, si Jesucristo, “todo el dia hasta na fin del mundo.” (Mateo 28:20) Por causa cay bondadoso tu ta dona para na worldwide work por medio na donate.pr418.com y na otro pa maga manera y ta dale tu el de tuyu tiempo y fuerza, ta dale tu mira que ta suporta tu con el Reino y con el amable Rey de este. Gracias na de tuyu pagka-bondadoso.