Del Marzo 2020, cuando el World Health Organization ya declara con el COVID-19 como un pandemic, nuay pensa el manada que tarda este mas de un año. Millones de maga gente, incluido ya el maga Testigo de Jehova, ya experiencia el efecto del pandemic na fisical, emocional y financial. Paquemodo el maga Testigo de Jehova ta dale material ayuda durante este crisis?

 Bajo na direccion del Coordinators’ Committee del Cuerpo Gobernante del maga Testigo de Jehova, mas de 950 Disaster Relief Committee (DRC) el ya establicia na entero mundo por causa na COVID-19. Na cuanto situacion, ya hace sila manera para puede ayuda el maga local hermano y hermana con aquellos quien ya sale afectao na pandemic. Mientras el otro ta puede ricibi ayuda estaba na gobierno. Ya organiza tambien el maga DRC que dale maga material ayuda na manada lugar.

 Por ejemplo, considera con el situacion na Paraguay. Asegun na un diario, por causa na efecto del pandemic na economia, “manada de Paraguay el nuay bastante comida.” Pero el DRC na Paraguay ya distribui ya maga ayuda que bastante para na dos semana—bastante comida, maga gamit para limpia na casa y maga gamit para na personal hygiene para na familia que tiene cuatro miembro. Maga $30 (U.S.) el valor del cada pack de ayuda.

 Cosa ta hace el maga ta man voluntario para protege con el diila mismo cuerpo y con el otro na COVID-19? Ta usa sila maga mask y ta sigui con el physical distancing. Ta asigura tambien sila que limpio el facilidad del maga compania quien ta man supply comida y ta sigui gayot este na maga safety guideline. Ta asigura tambien sila que el todo quien ta prepara con el maga ayuda ta usa personal protective equipment, ta limpia y ta man disinfect con el diila maga vehiculo, y ta pone con el maga pack de ayuda na maga lugar que ya man disinfect ya. Y mas pa, aquellos quien tan deliver con el maga ayuda ta mentena con el physical distancing entre na maga hermano y hermana quien ta ricibi con este.

 Del Enero 2021, mas de 25 millon dollar (U.S.) ya el ya aproba el Coordinators’ Committee para na COVID-19 relief. El maga branch y maga DRC ta usa enbuenamente con este maga donacion y ta pricura saca con el maga supply na mas bajo precio. Por ejemplo, na Chile, el maga hermano quien ta organiza con el relief work quierre cumpra 750 kilo de lentils (que dol igual na maga beans). Pero el precio de lentils ya dobla adentro lang na un mes! Ya decidi sila que cumpra con el lentils na alto precio. Pero despues del dos hora, ya habla kanila el quien ta vende que tiene buyer ya debolbe con el de suyu order. Poreso, en vez paga grande, el maga hermano ya puede cumpra con el lentils base na precio del ya pasa mes!

 Pero cuando ya bira otravez el maga hermano para saca con el lentils, no quierre ya este dale el quien ta vende cay ta pensa le que man favor-favor sila na dalida de comida, igual na otro maga organizacion. Despues del un corto y silencio rezo, uno del maga hermano ya habla con el quien ta vende que ya man survey ya daan con el maga congregacion si quien gayot deverasan ta necesita ayuda. Ya explica tambien el maga hermano que por causa cay otro-otro el cultura del quien hay ricibi, el cada pack hay contene maga producto base na necesidad del cada familia. Despues, ya asigura sila con el quien ta vende que voluntario el todo donacion y ayuda na maga Testigo de Jehova. Ya man bilib gayot le. Puera que ya conforma le dale na mas bajo precio para con el lentils, ya dona pa le 400 kilo de lentils na sunod order del maga hermano.

 Si Lusu, un de edad viuda de Liberia, ta queda junto con el cinco miembro del diila familia. Un aga mientras ta almorza y ta considera con el texto de aquel dia, ya puede nota el siete año apu de Lusu que nuay mas sila comida. El bata ya pregunta, “Cosa pa man kita hay come?” Ya habla si Lusu que ya reza ya le y asigurao le que dale si Jehova el diila necesidad. Na aquel mismo tarde, ya llama el maga anciano con Lusu y ya manda saca con el supply de comida. Ele ya relata: “El de mio apu ya habla que sabe ya le ahora que si Jehova ta oi y ta contesta con el maga rezo cay ya contesta si Jehova con el de mio rezo.”

 El un mujer na Democratic Republic of Congo tiene vecinos que maga Testigo de Jehova. Despues le mira que ese familia ya puede ricibi comida estaba na diila maga hermano y hermana na fe, ele ya habla, “Despues el pandemic, hay queda ya kita maga Testigo de Jehova cay nuay gayot sila deja con el diila maga hermano y hermana durante este dificil tiempo.” El de suyu marido ya pregunta, “Queda tu Testigo de Jehova por causa lang na un saco de arroz?” Ele ya contesta, “Siempre gendeh pero aquel un saco de arroz amo un prueba que deverasan el diila amor.”

 El maga Testigo de Jehova ya puede dayun dale el necesidad del maga hermano y hermana durante este tiempo de pandemic por causa na de ustedes maga donacion. Gracias na maga donacion que ya dale ustedes por medio na maga manera que ya menciona na donate.pr418.com.