Quierre gayot el Cuerpo Gobernante que usa con el maga donacion para tene maga facilidad que puede ayuda kanaton para cumpli con el trabajo predicacion. Por ejemplo, durante el 2023 service year, el maga corporacion que ta usa el maga branch office del maga Testigo de Jehova ya gasta mas de 500 millon dollar para cumpra, construi, man renovate y mentena con el maga Kingdom Hall y Assembly Hall na entero mundo. a Gendeh pa incluido alli el gasto del maga congregacion na entero mundo para mentena con el diila maga Kingdom Hall.

 Mas pa, ta usa tambien con el maga donacion para construi y mentena con el maga facilidad del branch que ta ayuda para organiza y suporta con el trabajo predicacion. Ya hace kita simple con el maga trabajo na branch para puede usa con el pondo na construida y renovation de maga Kingdom Hall y Assembly Hall. Maskin pa ansina, grande cantidad siempre el necesita para compone, man renovate o cambia con el locacion del maga branch facility. Porque importante este maga proyecto? Paquemodo el maga branch ta suporta con el trabajo predicacion? Mira kita.

 Manada na maga branch office mas de 30 o 40 año ya! Si Nicholas, quien ta sirvi na Worldwide Design/Construction Department, ya habla: “Maskin enbuenamente ya mentena con el un building, ta queda siempre este daan y ta principia tene maga serioso problema mientras ta pasa el tiempo. Si tan renovate con el building, ta puede este ayuda para mas tarda con este puede usa.”

 Necesita tambien man adjust con el maga facilidad de Bethel para puede este suporta con el maga necesidad del organizacion. Desde ya construi con el manada maga branch, ya subi gayot el numero del maga publisher na entero mundo. Por causa con ese, necesita kita mas manada maga voluntario para trabaja na este maga oficina del branch. Como resulta, gendeh mas bastante el grandor del maga facilidad de Bethel.

 Importante tambien el safety! Mientras ta queda kita cerca na fin del ultimo maga dia, ta enfrenta kita mas manada maga natural calamidad. (Lucas 21:11) Si usa kita con el maga nuevo manera de construida durante el renovation, puede se hace mas safe con el maga facilidad para con aquellos quien ta trabaja alla. Mas facil tambien puede usa el maga hermano con este maga facilidad para organiza con el maga relief work y continua suporta con el trabajo na field despues sucede el un natural calamidad.

 Bajo na direccion del Cuerpo Gobernante, tiene maga grande proyecto de construida na 43 facilidad de maga branch durante el 2023 service year. Este quierre decir que cerca media de maga facilidad de Bethel na entero mundo el yan renovate o ya construi. Pabor nota con el cuanto maga ejemplo que ta dale mira el importancia de este proyecto.

 Angola. Si Matt, un miembro de Angola Branch Committee, ya habla: “Ya tiene kame privilegio que mira que ya cumpli el Haggeo 2:7 na especial manera. Adentro lang na diez año, 60 por ciento el ya omenta na numero de maga publisher! Por causa con ese, necesita queda triple de manada el maga voluntario na Bethel. Pero por causa na grandor del diamon maga facilidad, limitao lang el numero de maga voluntario que puede kame invita para trabaja aqui. Como resulta, manada na maga Bethelite el ya tiene pesao trabajo y necesita trabaja overtime.”

 Yan assign cuanto maga hermano para mira si paquemodo puede hace mas grande con el branch. Del primero, ya sinti sila que mas pronto y practical si man renovate con el mismo facilidad. Pero despues del manada research, ya puede sila realiza que tiene pa mas buen manera para usa con el maga donacion en vez de man renovate. Ya recomenda sila que cumpra y man renovate con el un building que cerca na branch. “Cuando ya presenta na Branch Committee el sugestion que cumpra y man renovate con el un building, yan lingasa kame cay baka gendeh igual el calidad de este na maga building que kita mismo el ya construi,” ya habla si Matt. “Pero ahora ta puede kame mira que exacto gayot el building na diamon maga necesidad. Ya bendici si Jehova con este decision.”

 Posible necesita pa omento facilidad el Angola branch na futuro. Pero, el nuevo building, el modular housing na Bethel y el maga apartment que tan renta el branch bastante ya ahora para suporta con el grande progreso na nacion.

 Japan. Cerca ya 40 año el ya pasa desde ya construi con el maga primer building del branch y el mayoria de ese nuay pa pasa grande renovation. Ya hace gayot esfuerzo el maga hermano para mentena con el facilidad poreso ya puede con este usa por largo tiempo; gane mas pa na maga año que debe usa con este. Por causa con ese, tiene ahora un grande proyecto de renovation na branch.

 Ya pasa el maga año, ya cambia tambien el vida na Bethel. Antes el 2015, ta prepara con el todo comida para na maga Bethelite. Poreso, diutay lang el cucina na maga cuarto na Bethel na Japan. Pero ahora, mas mucho, el maga Bethelite ya el ta prepara con el diila comida. Poreso cuando yan renovate con el facilidad, ya pone mas usable cucina na cada cuarto para mas facil puede cuci el maga Bethelite. Si Kumiko, un hermana quien ta sirvi na Japan branch, ya habla, “Ta sinti yo comfortable na este nuevo cucina y ta ayuda este conmigo para puede suporta con el maga nuevo arreglamiento na Bethel.”

 El trabajo que ta hace na Japan branch amo bien importante parte del trabajo que ta hace kita na entero mundo. (Mateo 28:19, 20) Uno este na dos branch que tan print con el completo Biblia. Poreso, incluido na proyecto de construida ahora alla amo que pone un system que ta colecta maga papel y polvos para esta safe aquellos quien ta trabaja alla na Printery. Cerca un millon dollar el gasto para na cumprada y ponida de este system pero ta ayuda este para asigura que el branch puede continua man print y distribui espiritual comida.

 Prioridad del maga hermano que puede continua produci Biblia durante el construida. Si Trey, un miembro del Japan Branch Committee, ya menciona: “Durante el construida, el diaton organizacion tan release mas manada translation del Biblia y na entero mundo, mas manada el necesita maga Biblia. Manada maga departamento y persona el necesita trabaja junto para man schedule si cuando pone con el nuevo equipment y si cuando man print maga publicacion.” Maskin pa na maga dificultad, cerca 220,000 Biblia el ta puede man print cada mes desde Marzo hasta Agosto 2023—cuando grande el trabajo de construida na Printery. Ya puede completa con este todo trabajo que nuay omento gasto.

 Importante parte tambien del proyecto de renovation amo que puede conserva corriente. Hay pone maga nuevo solar panel poreso hay menora maga $120,000 el gasto para na corriente cada año. Hay pone tambien maga especial clase de bentana que puede menora con el consumo de corriente y puede se menora con el gasto maga $10,000 cada año. Maskin pa caro este maga cosas, ya puede carcula que durante el tiempo que puede usa con el maga solar panel y bentana, hay menora el diaton gasto por mas de 3.5 millon dollar. Y por causa tambien con este, gendeh gayot tanto grande el efecto del maga building na maga cosas alrededor.

 Este dos proyecto de branch ta dale mira si paquemodo de grande trabajo el necesita para asigura que el diaton maga facilidad de Bethel ta puede suporta con el necesidad del maga hermano na field. Pero, nuay pa acaba el trabajo. “Manada ya kita cosa ya puede cumpli pero manada pa tambien cosa necesita hace,” ya habla si Aaron, quien ta sirvi na Worldwide Design/Construction Department. Paquemodo puede cumpli con este maga trabajo? Ele ya continua habla: “Puera con el maga donacion que ta puede ayuda na gasto de este maga importante proyecto, ta aprecia tambien kame con aquellos quien preparao yan voluntario de antes y aquellos quien ta hace maga cambio na diila vida para puede man voluntario na futuro. El fisical y financial suporta del maga hermano amo un claro prueba del bendicion de Jehova.”—Salmo 110:3.

 Ta puede suporta con el todo maga proyecto de construida y renovation por causa na maga voluntario donacion y manada de ese el ya hace por medio na donate.pr418.com. Gracias gayot cay ta continua ustedes queda bondadoso.