El maga Testigo de Jehova ta hace maga importante trabajo que ta puede ayuda con el maga gente na mas de 200 lugar. Pero, maga 35 lang de ese maga lugar el ta ricibi bastante donacion para usa na diila maga gastos. Paquemodo ta puede paga con el maga gastos na maga nacion que tormento na financial?

 El Cuerpo Gobernante del maga Testigo de Jehova ta examina con el espiritual necesidad y actividad del maga hermano na entero mundo. Tan budget y ta usa enbuenamente con el maga pondo. Si el un branch ta ricibi pondo que mas pa na cosa sila necesita, el sobra de este ta dale na maga lugar que nuay bastante pondo. Este arreglamiento ta sigui con el ejemplo del maga Cristiano del primer siglo quien ya ayuda con uno y otro para “ay sale igual el maga cosas material” diila. (2 Corinto 8:14, El Nuevo Testamento) El maga sobra ya usa sila para tapa con el cosa falta del otro maga Cristiano.

 Cosa ya sinti el diaton maga hermano quien ya ricibi con el maga sobra pondo estaba na otro maga branch? Por ejemplo, na Tanzania donde mas de media na populacion el ta incuntra nuay pa llega cien peso cada dia, ese maga pondo ya usa para man renovate con el Kingdom Hall que ta usa el congregacion de Mafinga. El congregacion ya escribi: “Desde yan renovate con el diamon Kingdom Hall, ya subi el numero del maga quien ta atende! Ta rindi gayot kame gracias na organizacion de Jehova y con el maga hermano na entero mundo por causa na diila pagka-bondadoso que ya puede hace posible para tiene kame un bonito lugar de adoranza.”

 El cuanto del diaton maga hermano na Sri Lanka ya experiencia escasez de comida por causa na COVID-19 pandemic. Incluido kanila si Imara Fernando y de suyu anak, si Enosh. Pero por causa na maga donacion estaba na otro lugar, ya puede sila ricibi ayuda. Ya hace sila un card y ya escribi: “Ta rindi kame gracias con el maga hermano quien ya dale mira amor kanamon na este dificil tiempo. Bien alegre gayot kame queda parte de este familia y ta continua kame reza con Jehova que ayuda con el todo diaton maga hermano durante na este ultimo maga dia.”

 Maskin onde pa man ta queda el diaton maga hermano y hermana, alegre sila dale con el cosa sila tiene. Por ejemplo, si Enosh, ya hace un diutay cajon de contribucion para puede tambien le dona que puede ayuda con el maga familia que tiene necesidad. Bondadoso tambien si Guadalupe Álvarez. Ta queda le na un lugar na Mexico donde el mayoria del maga gente diutay lang el sueldo y el otro nuay pa gane regular incuntrada. Pero, ta contribui le con el cosa le puede dale. Ele ya escribi: “Ta rindi gayot yo gracias con Jehova na de suyu pagka-bueno y amor leal. Sabe yo que el de mio maga donacion puede omenta con el donacion del otro y puede usa para ayuda con el de mio maga hermano quien tiene necesidad.”

 Alegre el maga branch office que imbia sen con el maga lugar que tiene maga necesidad. “Por manada año, el trabajo na diamon nacion ta necesita con el financial suporta del otro maga nacion,” ya habla si Anthony Carvalho, quien ta sirvi como un Branch Committee na Brazil. “Por causa con este suporta, ya puede kame mira con el grande progreso. Ahora, el diamon financial situacion ya cambia ya y tiene kame el privilegio que ayuda con otro. El maga hermano aqui ta mira si paquemodo sila puede ayuda na trabajo predicacion na entero mundo y si cosa sila puede hace como maga dicipulo de Jesus.”

 Cosa el de con todo buen manera que el maga Testigo de Jehova puede suporta con el diila maga hermano y hermana quien tiene necesidad? Gendeh por medio na directa imbiada de sen na otro maga branch office sino por medio na diila contribucion na trabajo na entero mundo. Puede se hace por medio na cajon de contribucion na congregacion que ya marca “Worldwide Work” o por medio na donate.pr418.com. Ta aprecia gayot con ese maga donacion.