El maga Testigo de Jehova ahora ta ricibi mas manada publicacion y video que base na Biblia na digital format. Pero na manada lugar na entero mundo, el diaton maga hermano nuay sen para tiene Internet. El otro ta queda na maga lugar que donde pirmi ta queda nuay corriente, mahina o nuay Internet.

 Maskin pa ansina, manada na diaton maga hermano y hermana ta puede ya ahora man download maga publicacion na digital format maskin nuay coneccion na Internet. Paquemodo se ya queda posible?

 El JW Box amo un diutay device que ya dale na maga congregacion donde mahina el coneccion de Internet. Ta contene este un router que ya compra kita, software que ya hace el Computer Department na Bethel y tiene este maga publicacion y video que puede mira na jw.org. El cada JW Box maga $75 U.S. el valor.

 Na Kingdom Hall, el maga hermano y hermana puede conecta con el diila maga gadget na JW Box y despues, puede sila man download maga publicacion y video. Puede conecta con este maskin el maga gadget que de antes el model o de barato lang. Pero si el congregacion nuay Internet, paquemodo ta tene nuevo publicacion el JW Box? El branch regular ta imbia maga USB que maga $4 U.S. el valor del cada uno y ta contene este el maga cosas nuevo na jw.org que puede pone na JW Box.

 Paquemodo el JW Box ya puede ayuda con el diaton maga hermano? Si Nathan Adruandra, un tata quien ta queda na Democratic Republic of Congo, ya habla: “Ya dura ya yo ta pricura man download con el drama ‘O Jehovah, . . . I Trust in You’ y con el Remember the Wife of Lot. Pero nuay gayot yo puede man download con ese y ya descanza ya lang yo. Ahora, puede ya yo man download con ese maga video na de mio cellphone y ta puede este ayuda kanamon como mayores para enseña enbuenamente con el diamon maga anak.”

 El un hermano quien ta ayuda man set up con el JW Box na maga congregacion na Nigeria, ya habla: “Para na diaton maga hermano, el JW Box amo un especial regalo estaba con Jehova. Alegre sila que facil ya lang para kanila ahora que man download con el maga publicacion y video estaba na Teaching Toolbox.”

 Mas de 1,700 maga JW Box el ya imbia na diaton maga hermano na Africa, Oceania y South America, y ta plaña tambien con este imbia na mas manada congregacion. Onde estaba el sen que ya usa para con este? Estaba se na donacion para na trabajo que ta hace para na entero mundo que mas mucho ta dale por medio na donate.pr418.com. Gracias na de ustedes suporta y pagka-bondadoso.