Cada año, manada maga special full-time servant estaba na entero mundo el ta invita para atende na Watchtower Bible School of Gilead que ta hace na Watchtower Educational Center na Patterson, New York. a Na este escuela, el maga estudiante ta aprende si paquemodo queda mas efectivo na diila diferente assignment na organizacion de Jehova. Este training ta puede ayuda kanila para anima y hace fuerte con el maga congregacion y maga branch na entero mundo.

 Claro que un international escuela el Gilead. Por ejemplo, el ika-147 clase que ya hace del 2019, tiene 56 estudiante que ya sale na 29 nacion. El maga estudiante quien ya atende na Gilead ta sirvi como maga special full-time servant igual como maga Bethelite, circuit overseer, misionario o special pioneer.

 Ta hace ya maga preparacion antes pa principia el primer clase. Por ejemplo, el World Headquarters Travel Department (WHQ Travel) ta cumpra maga ticket de eroplano para con aquellos ya invita atende na escuela. Del ika-147 clase de Gilead, tiene maga $1,075 (U.S.) el ya gasta na cada estudiante que estaba na otro nacion para anda y bolbe estaba na Patterson. El maga estudiante estaba na Solomon Islands ta necesita munta eroplano cuatro beses para llega na Patterson y despues munta ya tambien sila tres beses para puede bolbe—tiene distancia mas de 35,400 kilometro (22,000 milla) todo-todo! Aquel maga ticket ta alcanza $2,300 (U.S.) cada estudiante. Para menora el gastos, el WHQ Travel ta usa un computer tool para busca ticket que mas barato. Y maskin ya puede ya sila man reserve un ticket, el computer program ta continua siempre busca por cuanto semana y por cuanto mes pa gane para mira si ya abaja ba el precio. El WHQ Travel ta usa tambien maga airline voucher que ya dona para cumpra ticket.

 Manada estudiante el ta necesita visa para puede anda na United States. Poreso, el World Headquarters Legal Department ta ayuda kanila para tene student visa. El visa y el registration fee ta alcanza maga $510 (U.S.) cada estudiante.

 Paquemodo kita ta beneficia na training que ya recivi este maga estudiante? Si Hendra Gunawan ta sirvi como un anciano na Southeast Asia. Uban de suyu na congregacion el man maridable quien ya gradua na Gilead. Ya habla le: “Del antes, nuay regular pioneer na diamon congregacion. Pero cuando ya llega el man maridable, el diila pagka-activo y pagka-preparao ayuda ya puede afecta con otro quien ya decidi man pioneer. Na uliji, el un hermana na diamon congregacion ya puede pa gane atende na School for Kingdom Evangelizers!”

 Si Sergio Panjaitan ta sirvi junto na maga ya gradua na Gilead na Bethel na Southeast Asia. Ya habla le: “El training que ya recivi sila gendeh lang un bendicion para kanila; sino un bendicion tambien este para kanamon. Manada gayot sila cosa ya aprende! Pero en vez de dale mira que mas importante sila con otro, yan share sila con el cosa sila ya aprende. Ya puede este anima kanamon y ya puede tambien kame anima con otro.”

 Paquemodo el organizacion ta suporta con el gasto de este escuela? Por medio na maga donacion na worldwide work que ya hace el manada por medio na uno na maga manera que puede incuntra na donate.pr418.com. Gracias con el de ustedes maga contribucion que ta suporta con este escuela donde el maga estudiante estaba na entero mundo.