Mas de 60 por ciento del diaton full-time translation team, ta trabaja na maga remote translation office (RTO). Cosa el beneficio de este arreglamiento? Cosa equipment necesita el maga translator para puede sila trabaja enbuenamente na RTO? Y na cosa manera el locacion del maga translation team ta afecta na calidad del diila translation?

 Por medio na RTO, el maga translator ta puede queda na lugar que donde manada gente ta converza el diila lengguaje. Si Karin, un translator na Low German, ya explica: “Desde ya cambia kame na RTO na Cuauhtémoc, Chihuahua, Mexico, pirmi kame ta converza Low German na diamon maga uban translator, na ministerio y maskin si tan compra kame. El maga gente alrededor kanamon ta converza diamon lengguaje. Ta puede kame oi maga idiom que ya dura ya kame nuay puede oi y ta puede kame sabe si tiene ba cambio na vocabulario que ta usa el maga gente.”

 Si James que ta trabaja na Frafra translation team na Ghana, ya admiti que tiene vez tan miss ele asocia na familia Bethel na branch. Pero ya habla le: “Quierre-quierre yo trabaja na RTO. Alegre yo predica na lengguaje del maga gente y mira con el diila reaccion na buen noticia.”

 Paquemodo el diaton maga hermano ta decidi si onde pone con el RTO? “El uno na maga dificultad que ta enfrenta kame amo que na cuanto maga locacion pirmi ta perde el corriente o nuay bastante agua o mahina el coneccion del internet para ricibi maga file para man translate,” ya habla si Joseph, un miembro del Worldwide Design/Construction Department na Warwick, New York, U.S.A. “Poreso si ta decidi kame si onde pone con el RTO, ta considera kame gendeh lang un locacion onde ta usa con el lengguaje.”

 Mas mucho, el de con todo pronto y menos na gasto opcion amo que pone con el RTO na un Assembly Hall, Kingdom Hall o na casa de misionario que donde el maga translator facil para anda. Si nuay ansina facilidad na lugar, el maga hermano puede cumpra maga apartment y oficina que donde el maga translator puede queda y trabaja. Si cambia el necesidad del translation team, facil lang puede vende con este facilidad y usa con el sen onde mas necesita este.

 Durante el 2020 service year, ya gasta kita 13 millon dollar (U.S.) para continua el trabajo na maga RTO. El maga translator na RTO necesita maga computer, maga especifico software, equipment para man recording, coneccion de internet y otro pa maga necesidad. Por ejemplo, el mayoria del maga computer setup tiene valor de maga $750 (U.S.) cada uno. El maga computer tiene maga software que ya cumpra kita y el Watchtower Translation System, un program que ta ayuda con el maga translator organiza con el diila trabajo y obtene maga referencia.

 El maga translator ya ricibi tambien maga equipment para na recording que puede sila usa para man record na oficina. Grande este ayuda cuando ya principia el COVID-19 pandemic cay manada maga translator ya puede lleva con el maga equipment na diila casa y ya puede continua man record con el diila translation del maga publicacion y video.

 El maga hermano tan voluntario para ayuda man review con el maga publicacion que yan translate y mentena con el maga facilidad na RTO. “Tiene oportunidad el maga publisher y regular pioneer para usa el diila talento aqui,” ya habla si Cirstin, quien ta sirvi na Afrikaans RTO na Cape Town, South Africa.

 Alegre el maga hermano que puede man voluntario. El un hermana ya habla que ta puede con ele anima y ta dale alegria si tan voluntario ele na RTO. El cuanto maga hermano y hermana ta participa na maga audio recording. Si Juana que un Totanac translator na Veracruz, Mexico, ya habla: “Ahora cay taqui ya kame na lugar onde ta usa el diamon lengguaje, facil ya lang na maga hermano y hermana que ayuda na maga audio y video recording.”

 El maga RTO ya ayuda para mejora el calidad del translation. Uyun con ese el manada na millones quien ta le con el diaton maga publicacion. Si Cédric, quien ta trabaja na Kongo team na Democratic Republic of Congo, ya relata: “El cuanto maga hermano y hermana ta llama con el diamon translation como ‘el Kongo de Watch Tower,’ cay gendeh se el natural manera si paquemodo el maga gente ta converza Kongo. Pero ahora, ta habla sila que moderno ya el translation del diaton maga publicacion na Kongo cay asegun este na manera si paquemodo el maga gente ta converza cada dia.”

 Si Andile, quien ta trabaja na Xhosa translation team, ya puede oi semejante comento na South Africa. “Manada ya habla que ya puede sila nota que tiene cambio na translation,” ya habla le. “Maskin el maga bata quien ta le El Torre de Guardia na Ingles de antes, ta le ya ahora na lengguaje Xhosa. Quierre-quierre sila especialmente si paquemodo de natural el translation del revised New World Translation.”

 El todo gasto que ya usa para prepara, mentena y suporta con el maga voluntario na RTO amo estaba na donacion para na trabajo que ta hace na entero mundo, incluido el maga donacion que ya dale por medio na donate.pr418.com.