El musica amo un bonito regalo estaba con Jehova. Puede este afecta con el diaton pensamiento, emocion y puede este motiva kanaton. Ansina el cosa ta puede hace el diaton maga original cancion. Gane, mas pa con ese el cosa este ta puede hace: ta hace este mas cerca kanaton con Jehova.

 Desde 2014, mas de 70 original cancion ya el ya produci. Ahora, uno na ese maga cancion o mas pa el available ya na mas de 500 maga lengguaje! Pero baka pensa tu, ‘Quien ta hace con este maga cancion y paquemodo con este ta produci?’

 El music team del Audio/Video Services el quien ta produci con el maga original cancion bajo na direccion del Teaching Committee del Cuerpo Gobernante. Tiene 13 maga hermano y hermana na music team quien ta ayuda na composition, music engineering, scheduling y otro pa necesita trabajo. Omento pa, el Teaching Committee ya aproba con el cuanto maga remote volunteer na entero mundo para asisti con este trabajo, incluido el maga composer, musician y singer. Este maga humilde hermano y hermana ta usa con el diila maga talento pero no quierre sila alaba kanila na cosa sila ta hace.

 Paquemodo ta produci con el un original cancion? Una, el Teaching Committee ta decidi si na cosa maga texto debe man base el cancion y si cosa emocion debe sinti el quien ta oi con este. Despues, el music team ta man assign si quien man compose con el musica y escribi con el lyrics. Ta hace sila un sample recording. Tan review con ese el Teaching Committee y ta dale sila omento direccion. Despues, tan adjust el music team con el cancion y tan record con el final version de este. Ta hace con el maga recording na diferente maga locacion, igual na maga facilidad del branch y maga casa donde tiene maga recording equipment.

 Para man compose y man record con el maga original cancion, el diaton maga hermano ta usa maga digital audio workstation, un music notation program, maga audio library y otro pa. Ta usa tambien sila maga musical instrument, mixing console, amplifier, speaker y maga microphone. El precio del cada uno microphone puede llega $100 para $1,000 (U.S.). Del 2020, ya gasta kita $116,000 (U.S.) para na music-recording equipment.

 Cosa maga esfuerzo ta hace para menora el gasto? En vez tiene grande music team na Bethel para hace con el trabajo, ta usa con el manada remote volunteer. Puera con ese, en vez de invita con el manada individual para man recording na personal, mas mucho, el diaton maga hermano tan compose y ta produci musica usando el un computer program.

 Quierre-quierre oi el maga hermano y hermana con el maga original cancion. Si Tara, quien ta queda na Germany, ya habla: “El maga cancion ta ayuda conmigo para man relax si tan lingasa yo. Si ta oi yo con este na de mio mismo lengguaje, ta sinti yo que dol ta abraza conmigo si Jehova.” El un hermano de Kazakhstan, si Dmitry, ya habla: “Quierre-quierre yo oi con el maga cancion y gendeh mas yo necesita pensa si harmonia ba se na maga principio na Biblia. Mas pa, el maga cancion ta ayuda conmigo para esta focus na maga espiritual cosas.”

 Si Delia, de South Africa, ya habla si cosa le ta sinti acerca na maga original cancion: “Un ayuda na espiritual este para conmigo. Si triste yo o ta enfrenta un probanza, pirmi tiene un cancion que tupao na de mio situacion. Mas mucho, el musica pa lang ta puede ya cambia con el cosa yo ta sinti!”

 Ya queda favorito del cuanto el maga original cancion. Si Lerato, quien ta queda tambien na South Africa, ya habla: “El maga cancion ‘Bien Cerca ya el Dia’ y ‘Un Mundo Nuevo Ya’ ya ayuda conmigo para imagina yo con el tiempo que puede yo mira otravez con el de mio nana. Cada vez yo oi con ese maga cancion, dol ta mira yo con ele que ta atraca conmigo para abraza.”

 Ya puede ayuda con el un teenager de Sri Lanka el un original cancion. Ele ya habla: “El de mio maestra na science ya regaña conmigo enfrente na otro maga estudiante cay uno yo del maga Testigo de Jehova. Ya tiene yo miedo y no sabe yo si cosa habla. Cuando ya bolbe yo, el de mio nana ya anima conmigo que oi con el cancion ‘Study Makes You Strong.’ El cancion ya ayuda conmigo para mira que necesita yo man research y prepara si cosa yo contesta. Alamañana, ya converza yo con el de mio maestra. Ya oi le conmigo y ya habla que ahora mas ta entende ya le con el maga creencia del maga Testigo de Jehova. Ta rindi yo gracias na organizacion de Jehova cay ya dale este maga cancion que puede anima kanaton.”

 Onde estaba el pondo que ta usa para produci con este maga cancion? Na maga donacion que ta dale para na trabajo que ta hace na entero mundo que mas mucho ta dale por medio na maga manera que ya menciona na donate.pr418.com. Gracias con ustedes na con todo corazon maga donacion.