Bien manada ta bautiza cada año poreso necesita kita omento maga teocratico facilidad. Por causa con ese, el Local Design/Construction Department na entero mundo ya plaña construi o man renovate mas de 2,700 lugar de adoranza durante el 2020 service year. a

 Makatriste cay nuay porsigui ese maga plano por causa na COVID-19 pandemic. Para protege con el diaton maga hermano y hermana y sigui con el maga regulacion del gobierno, el Publishing Committee del Cuerpo Gobernante temporario ya hace descanza con el mayoria de maga proyecto de construida na entero mundo. Maskin pa ansina, durante el 2020 service year, mas de 1,700 lugar de adoranza el ya construi y yan renovate antes pa el pandemia. Omento pa, mas de 100 grande proyecto de branch el ya completa. Considera kita si paquemodo el maga hermano ya beneficia na dos proyecto de construida que ya completa.

 Cameroon branch. El branch del Cameroon del una que talli na Douala amo bien diutay y necesita hace manada cambio na facilidad. El Publishing Committee ya considera man renovate con el branch pero bien grande el gasto de ese compara na valor del maga facilidad de este. Ya mira tambien sila el posibilidad que construi na un nuevo propiedad o cumpra facilidad y man renovate con ese, pero todo se maga opcion nuay sucede.

 Mientras tanto ya sabe el maga hermano que na norte parte del Douala, el gobierno ya plaña hace calzada que cerca na uno del diaton maga Assembly Hall. Por causa con ese, mas pronto ya puede anda alli y mas facil obtene el maga cosa necesita para na ese facilidad. Ese el cosa gayot necesita el branch. Poreso, el Cuerpo Gobernante ya aproba que construi con el un nuevo branch adentro na tierra del Assembly Hall.

 El maga Testigo de Jehova y el maga pagao contractor ya trabaja junto na este proyecto. Como resulta, mas pronto ya acaba el proyecto y ya menora el gasto. Gane, ya completa el proyecto que mas de dos millon dollar (U.S.) menos compara na valor que ta expecta sila! El familia Bethel ya puede cambia na ese nuevo facilidad nuay lang dura antes man calayat el COVID-19.

 El maga Bethelite na Cameroon ya beneficia na este nuevo facilidad cay mas enbuenamente onde sila ta queda y ta trabaja, y para kanila un regalo estaba con Jehova este nuevo branch. El un maridable ya habla, “Ya manda este move kanamon que trabaja pa mas enbuenamente y dale mira si paquemodo kame ta aprecia con este regalo.”

 Tojolabal Remote Translation Office (RTO), Mexico. Por manada año, el Tojolabal translation team talla na Central America branch, cerca na Mexico City. Pero, ta usa con el lengguaje Tojolabal na Altamirano y Las Margaritas—cerca 1,000 kilometro (620 milla) de lejos na branch! Como resulta, el maga translator tan dificil asigura si updated pa ba el maga palabra que ta usa sila na diila translation. Tan dificil tambien el branch para busca maga cualificao hermano y hermana quien ta queda cerca para ayuda na translation y maga audio recording na lengguaje de Tojolabal.

 Por causa con este, el Writing Committee del Cuerpo Gobernante quierre pone con el translation team na lugar onde ta usa con el lengguaje Tojolabal. Para puede se hace, el branch ya decidi cumpra un facilidad y man renovate con ese. Mas menos se na gasto compara si construi o man renta maga oficina.

 El un translator ya habla si paquemodo le ya beneficia: “Adentro de diez año que ta trabaja yo como translator na branch, nuay yo puede conoce maskin un familia quien ta queda cerca y ta converza Tojolabal. Ahora, el diamon oficina na lugar ya onde el maga gente ta converza Tojolabal. Cada dia, ta puede yo converza na maga gente na de mio lengguaje. Ya puede se ayuda para omenta el de mio vocabulario y ya mejora el calidad del de mio trabajo.”

 Para na 2021 service year, tiene maga plano para construi 75 maga RTO y maga Bible school facility, si hay permiti el circumstancia. Hay continua el trabajo na ocho grande proyecto del branch, incluido el nuevo proyecto del world headquarters na Ramapo, New York y man relocate tambien con el branch de Argentina y Italy. Puera con ese, mas de 1,000 nuevo Kingdom Hall el necesita, mas de 6,000 lugar de adoranza el necesita cambia y 4,000 Kingdom Hall el necesita man renovate.

 Onde estaba el pondo para na este proyecto de construida y renovation? Si Hermano Lázaro González, un miembro del Branch Committee de Central America, ya contesta con este pregunta cuando ta discuti le acerca na proyecto de Tojolabal Remote Translation Office. “Si aqui lang na diamon branch territory, limitao lang el pondo. Poreso si nuay el suporta del diaton maga hermano y hermana na entero mundo, imposible para kanamon construi un translation office para na diaton maga hermano y hermana quien ta queda na maga lejos lugar. El maga donacion del maga hermano y hermana na entero mundo ya hace posible para queda cerca el maga translator na maga gente quien ta converza con el diila lengguaje. Ta rindi gayot kame gracias con el diaton maga hermano y hermana por causa na diila pagka-bondadoso y suporta.” Si, por causa na de ustedes maga donacion para na trabajo que ta hace na entero mundo que mas mucho ta dale por medio na donate.pr418.com, ya queda posible este maga proyecto.