“Posible manada de aquellos quien ta le con el diaton maga publicacion tiene conoce bulak,” ya habla el Junio 1, 1912, issue del The Watch Tower. “Tiene libre publicacion para kanila . . . . Yan print con este publicacion que tiene maga abultao caracter que puede le el maga bulak.” El The Watch Tower ya omenta: “Manada maga bulak el ta aprecia gayot con el mensaje que tiene bonito bendicion que hay llega na mundo.”

 Cuando ya escribi con ese maga palabra, nuay pa un comon braille system para na maga nacion que ta converza English. Pero aquel tiempo, el maga Testigo de Jehova ta manda ya sabe con el verdad na Biblia usando el “maga abultao caracter”—el braille. Y ta hace siempre kita con ese hasta ahora! Tiene ya kita ahora literatura na braille na mas de 50 lengguaje. Paquemodo con este ta hace?

 Para produci braille, una, tan transcribe o ta cambia con el maga palabra na maga caracter na braille. “De antes, ta cumpra kita software y ta usa con ese para man transcribe na braille. Pero gendeh se tan function na todo maga lengguaje que necesita kita,” ya habla si Michael Millen quien ta trabaja na Text Processing Services na Patterson, New York. “Ahora ta usa kita con el Watchtower Translation System que puede usa para man transcribe na braille con el mayoria de maga lengguaje na mundo. Para conmigo, nuay otro program igual con este.”

 El literatura de braille ta inclui, gendeh lang maga palabra na articulo, sino maga explanacion tambien acerca na maga letrato. Por ejemplo, este el cosa ta menciona acerca na letrato na cover del Queda Alegre Hasta Para Cuando! na braille: “Un hombre ta camina na camino donde tiene maga bonito siembra y maga monte alrededor.” Ya habla si Jamshed que un bulak siervo ministerial y pioneer, “Grande ayuda gayot conmigo este maga explanacion acerca na maga letrato.”

 Despues man transcribe, ta imbia con este na maga branch office que ta puede hace maga publicacion na braille. Alla, ta man emboss o ta hace abultao con el maga caracter na duro papel. Cay duro este, gendeh este queda malo mientras tan emboss con este o maskin manada beses con este usa. Despues, ta hace junto con el maga pagina, tan bind y ta imbia con este junto na maga literatura para na maga congregacion o como “free matter for the blind” si tiene ansina servicio el post office. Si necesita, ta hace tambien manera el maga branch para paspas puede imbia con este y tiene cosa puede usa na miting el maga hermano y hermana que bulak o tiene problema na diila vista.

 Todo este trabajo necesita grande tiempo y sen. Por ejemplo, na diaton printery na Wallkill, New York, igual lang el largor de tiempo que ta usa para puede hace 50,000 standard Biblia na tiempo que ta usa para man emboss 2 Biblia lang na braille. Tiene 25 volume el cada grade-two English Biblia na braille y 123 beses mas caro el materiales que necesita para produci con este maga volume contra na cosa necesita para produci un standard Biblia. a Gane, el gasto para na maga cover pa lang del un set de 25 volume ta llega ya maga $150 (U.S.)!

 Cosa ta sinti aquellos quien ta ayuda para produci con el maga publicacion na braille acerca na diila trabajo? Ya habla si Nadia quien ta sirvi na South Africa branch: “Gendeh facil el vida del diaton maga hermano y hermana quien bulak o tiene problema na diila vista. So para conmigo, un bendicion este que puede hace un cosa para ayuda kanila. Claro que ta ama gayot kanila si Jehova.”

 Pero paquemodo si el un bulak no sabe le braille? Cuanto año pa lang el ya pasa, yan release kita con el Learn to Read Braille, un workbook que tiene braille y maga printed palabra. Ya diseña con este para puede usa junto el un persona quien ta puede mira y un bulak. Junto na este brosyur el un positive slate y stylus (maga device que ta usa para escribi na braille). Ta usa este el quien ta aprende braille para man emboss con el cada caracter na braille. Ayuda se con ele para mas acorda con el cada caracter y para identifica con el maga caracter si agarra le con este.

 Paquemodo ya puede beneficia na este maga publicacion el maga hermano y hermana quien bulak o tiene problema na diila vista? De antes, si ta atende miting si Ernst que de Haiti, nuay le maskin cosa publicacion na braille. Por causa con ese, necesita le man memorize para puede le dale el de suyu maga assignment y maga comento na miting. “Pero ahora,” ele ya habla, “puede ya yo alza con el de mio mano y dale maga comento maskin cuando yo quierre. Ta sinti yo que unido gayot yo na maga hermano y hermana. Igual ya el espiritual comida que ta ricibi kame todo!”

 “Mas ta entende yo con el diaton maga publicacion contra na otro maga publicacion na braille que ya le yo,” ya habla si Jan, un anciano de Austria quien tiene problema na vista. Ta conduci le con el estudiada del El Torre de Guardia y el Estudiada del Congregacion na Biblia. “Por ejemplo, tiene este maga page number, maga footnote que pronto lang incuntra y maga claro explanacion acerca na maga letrato.”

 Si Seon-ok, un pioneer de South Korea, amo un bulak y apa. De antes, ta depende lang le na tactile signing na maga miting, pero ahora ta puede ya ele le mismo con el maga Bible study aid na braille. Ele ya habla, “Dificil le con el otro maga publicacion na braille cay falta-falta el maga dot, tiku el maga linea o bien pino el papel. Pero buen clase de papel el ta usa el maga Testigo de Jehova y mas abultao el maga dot poreso mas facil con este le.” Ele ya omenta: “De antes, ta puede lang yo estudia con el maga publicacion que base na Biblia si tiene quien ta ayuda conmigo. Pero ahora, ta puede ya yo estudia solo. Alegre yo cay ta puede yo prepara para na maga miting cada semana y ta puede participa con este. Ta le yo con el todo diaton publicacion na braille. ‘Maka-addict’ ga’t le con este.”

 Igual na diaton maga publicacion que yan print, el diaton maga publicacion na braille ta inclui tambien este maga palabra: “Este publicacion ta distribui como un parte del programa de educacion estaba na Biblia que ta hace na entero mundo y ta suporta por medio del voluntario donacion. Este gendeh ta vende.” Gracias na maga donacion que ya dale ustedes por medio na maga manera que ya menciona na donate.pr418.com. Por causa na de ustedes pagka-bondadoso, ta puede dale espiritual comida con todo, incluido con el maga bulak y aquellos quien tiene problema na vista.