Alegre si Jehova que enseña con el de suyu maga siervo. Como resulta, el de suyu organizacion ya establicia manada escuela para man train con el maga estudiante si paquemodo cumpli con el diila maga assignment. Uno de ese amo el School for Kingdom Evangelizers (SKE). Del reciente maga año, el organizacion del Dios yan focus gendeh lang si paquemodo mejora con el curriculum sino con el maga facilidad tambien donde ta hace con el maga escuela. El goal de este amo man improve con el maga facilidad para na maga estudiante y instructor. Paquemodo el de tuyu maga donacion ta puede ayuda para puede con ese hace?

 Por manada año, ta hace con el maga teocratico escuela na maga Kingdom Hall y Assembly Hall. Porque kita ahora ta construi o ta man renovate omento maga facilidad para usa solamente para na maga teocratico escuela? Considera con el tres razon.

 Mas grande necesidad. “El maga branch office ya reporta que necesita mas manada hermano y hermana para ayuda na field,” ya explica si Christopher Mavor, un ayudante de Service Committee del Cuerpo Gobernante. “Por ejemplo, del 2019, ya carcula el Brazil branch que necesita maga 7,600 omento SKE graduate para ayuda na maga necesidad na teritorio del diila branch.” El United States branch ya reporta que tiene grande necesidad para na maga cualificao pioneer quien puede man train con otro para na special metropolitan public witnessing, harbor witnessing y prison witnessing. Ta necesita tambien maga hermano quien puede sirvi na Local Design/Construction Department y na Hospital Liaison Committee. Aquellos quien ya gradua na SKE puede ayuda na este maga trabajo.

 Mas manada el quien tan apply. Na manada maga branch, mas manada maga estudiante el quien tan apply contra na cuanto lang sila ta puede inclui na escuela. Por ejemplo, na Brazil, el branch ya ricibi maga 2,500 SKE application na un año lang. Pero por causa cay limitao lang el maga facilidad, el branch ta puede lang saca 950 estudiante.

 Necesita mas bueno lugar onde puede esta. Si ta atende el maga estudiante na un escuela que ta hace na Kingdom Hall o Assembly Hall, mas mucho ta esta sila na casa del maga hermano y hermana. Bonito se arreglamiento para na maga lugar donde cuanto clase lang el ta hace na cada año. Pero na maga lugar donde manada clase el ta hace, posible el maga hermano gendeh puede ricibi con el maga estudiante na diila casa por manada mes. Poreso ya construi maga facilidad que cerca onde ta hace con el clase y especifico ya diseña con ese para na necesidad del maga estudiante.

 Para puede construi un facilidad que tiene un classroom y onde puede esta el maga instructor y maga 30 estudiante, necesita mas de maga millon dollar (U.S.), depende na lugar y na otro pa maga cosas.

 Mas mucho, ta construi con el maga facilidad na un silencio lugar que apuera na ciudad pero donde facil incuntra publico transportacion. Mas ta iscuji kita maga lugar donde tiene manada hermano y hermana quien puede ayuda para mentena y hace pa otro maga trabajo na facilidad de escuela.

 El facilidad tiene maga library, lugar onde puede estudia, computer, printer y otro pa maga gamit. Mas mucho, tiene un dining room onde puede come junto el maga estudiante y instructor. Tiene tambien maga lugar onde puede man ejercicio y man relax.

 Ya diseña tambien enbuenamente con el maga classroom. “Ya consulta kame con el Theocratic Schools Department si paquemodo diseña con el maga classroom para ayuda con el maga estudiante para mas facil aprende,” ya habla si Troy quien ta trabaja na Worldwide Design/Construction Department na Warwick, New York. “El maga hermano ya dale kanamon maga instruccion acerca na grandor y forma del maga classroom, incluido ya si cosa maga luz y audio-video equipment sila necesita.” Acerca na maga audio equipment, si Zoltán, un SKE instructor na Hungary, ya habla: “Del primero, nuay kame maga microphone poreso necesita kame pirmi habla con el maga estudiante que converza suena. Pero ahora cay tiene ya microphone na cada mesa, ya solva ya el problema!”

 Cosa el efecto de este maga cambio na maga instructor y estudiante? “Bien bonito gayot este lugar,” ya habla si Angela quien ya atende na SKE na Palm Coast, Florida, U.S.A. “Enbuenamente gayot ya plaña con el todo, incluido el diamon classroom y diamon maga cuarto, para puede kame man focus na diamon estudiada.” Si Csaba que un instructor na Hungary ya aprecia con el oportunidad que puede come junto con el maga estudiante. Ele ya habla que na ese maga ocasion, “el maga estudiante ta puede man cuento acerca na diila mismo cuerpo y na diila maga experiencia. Na ansina manera, ta puede [sila] mas conoce con el maga estudiante. Como resulta, ta puede [sila] mas efectivo discuti con el curriculum asegun na diila necesidad.”

 Ta mira el maga estudiante y instructor con el maga nuevo facilidad como un bendicion estaba na diaton “Grande Instructor,” si Jehova. (Isaias 30:20, 21) El un hermana na Pilipinas quien ya atende na SKE na un facilidad que ya man renovate para hace un escuela ya habla: “El facilidad ya manda acorda kanamon que gendeh lang kame basta estudiante sino maga especial visita de Jehova. Quierre le que queda kame alegre mientras enbuenamente ta estudia con el de suyu Palabra.”

 Ya puede kita construi, man renovate y mentena maga facilidad de escuela por causa na de ustedes maga donacion que mas mucho ya dale ustedes por medio na donate.pr418.com. Muchas gracias na de ustedes pagka-bondadoso.