Mas de diez año ya, manada maga gente el ya puede nota con el diaton literature cart y ya queda ya este parte del diaton ministerio. Na entero mundo, ta puede mira el maga gente con este maga cart y sabe ya dayun sila si quien kita. Puera que bonito el cart, pronto tambien con este usa. Posible man uyun tu con Asenata, un hermana na Poland, quien ya habla: “Simple lang el diseño del cart pero bonito con este mira. Pronto con este man set up y lleva maskin onde.”

 Ya pensa ba tu si paquemodo ya diseña y ya hace con este maga cart?

 Del 2001, ya aproba el Cuerpo Gobernante que el diaton maga hermano y hermana na France hay principia usa diferente manera na public witnessing, incluido ya el usada del maga cart. Ya pruba sila otro-otro maga diseño. Por ejemplo, ya copia sila con el diseño del luggage y grocery trolley para onde man display y pone con el diaton maga publicacion. Na uliji, ya iscuji el branch del France con el un especifico diseño que ya usa el maga publisher por manada año.

 Alegre el maga hermano na France na maga resulta del diila public witnessing. Poreso del 2011, ya aproba el Cuerpo Gobernante con el nuevo proyecto de public witnessing na New York City, U.S.A., usando el maga cart y mesa. El maga pioneer quien ya participa na ese proyecto ya puede dayun realiza que manada beneficio si ta usa maga cart. Por ejemplo, pronto con este lleva maskin onde. Ya dale tambien maga practical sugestion el maga pioneer si paquemodo hace mas bonito con el diseño del maga cart. Pesao el maga cart que hacido de palo poreso tormento con este lleva. Por causa con ese, ya hace con este mas liviano pero gendeh sobra de liviano que tumba ya este por causa na viento. El nuevo diseño tiene tambien mas grande y durable rueda para mas facil con este lleva maskin na lubak camino. Mas pa, ya pone con este un diutay cajon para onde pone con el otro maga publicacion.

 Bonito el resulta de ese nuevo proyecto! Poreso del 2012, ya aproba el Cuerpo Gobernante que usa maga literature cart na entero mundo. Ya incuntra el maga hermano un manufacturer quien puede hace manada maga cart usando el maga materiales que liviano pero durable.

 Mientras ta pasa el tiempo, ya hace maga diutay cambio con este maga cart. Por ejemplo, del 2015, ya omenta con este un cover para gendeh este muha na ulan. Si Dina, quien ta queda na nacion de Georgia, ya gusta con este diseño. Ele ya habla, “Dol tiene ‘raincoat’ este cart para protege con el maga publicacion.” Del 2017, tiene maga magnetic poster el available na cuanto lengguaje. Si Tomasz, un hermano na Poland, ya habla: “Si ta usa kame maga adhesive poster, tormento con este cambia. Poreso, un bonito gayot idea que usa maga magnetic poster.” Del 2019, manada siempre maga cambio el ta hace na maga materiales y si paquemodo hace maga cart para hace con este mas durable.

 Un manufacturer lang el quien ta hace con el maga literature cart y ta imbia con este na maga congregacion na entero mundo. Ahora, $43 U.S. el precio del un cart, gendeh pa entrao el shipping y otro pa maga gasto. Na presente, mas de $16 millon U.S. el ya gasta para na maga cart y mas de 420,000 maga cart el ya puede imbia na maga congregacion na entero mundo.

 Para usa enbuenamente con el maga donacion, bultu de maga literature cart el ta cumpra. Omento pa, el maga congregacion puede man order maga pieza y man repair con el maga cart en vez de cambia con ese.

 Ta gusta gayot usa maga literature cart el maga publisher na entero mundo. Si Martina que de Ghana ya habla: “Mayoria na diaton ministerio, kita el ta atraca na maga gente. El cosa yo ta gusta acerca na cart witnessing amo que el maga gente el ta atraca kanaton. Puede kita dale testigo maskin con el maga quien ta pasa lang.”

 Na otro nacion na Africa, el un hombre ya atraca na cart y ya saca maga publicacion na de suyu lengguaje. Ya bira le otravez despues del un semana y ya habla: “Ya le yo con el todo maga publicacion. Bien importante gayot el maga informacion aqui. Hay habla yo con este con el de mio maga familia na de mio lugar,” que maga 500 kilometro de lejos. Despues del dos meses, ya bira le y ya habla: “El maga gente na de mio lugar ya le con el maga publicacion y bien alegre sila acerca na cosa sila ya le. Quierre sila queda maga Testigo de Jehova. Pero tiene sila maga pregunta. Por ejemplo, ta entende sila que necesita kanila hace tusmuk na agua para bautiza. Pero nuay kame rio cerca na diamon lugar. Necesita ba kame anda aqui para bautiza?” El maga publisher ya pidi con el un hombre pioneer quien ta converza na lengguaje del hombre que man contact con ele. Desde aquel tiempo, regular ya el diila discusion na Biblia.

 Bonito gayot mira que ta usa con el maga literature cart “para man testigo con todo el maga nacion.” (Mateo 24:14, El Nuevo Testamento na Chavacano) Paquemodo kita ta paga para con este maga gasto? Por medio na maga donacion na worldwide work que manada ta hace por medio na donate.pr418.com. Gracias na de ustedes pagka-bondadoso.