Si Jesus ya habla con el de suyu maga dicipulo: “Ay queda ustedes dimio maga testigo . . . hasta na fin del Mundo.” (Maga Actividad 1:8, El Nuevo Testamento na Chavacano) Ahora, activo ta cumpli el maga Testigo de Jehova con ese mandato. Pero, tiene pa maga lugar donde nuay pa puede predica con el maga gente, incluido ya el cuanto maga lugar donde tiene grande populacion. Y na cuanto maga nacion, poco lang el maga Testigo de Jehova. (Mateo 9:37, 38) Cosa kita ta hace para puede predica na mas manada gente?

 Para cumpli con el mandato de Jesus, el Service Committee del Cuerpo Gobernante del maga Testigo de Jehova yan assign maga misionario na maga lugar donde tiene necesidad. Ahora, tiene 3,090 maga misionario na entero mundo. a El mayoria kanila ya ricibi training na uno del maga escuela del organizacion, igual na School for Kingdom Evangelizers. El maga misionario conforme deja con el diila maga lugar y cambia na otro nacion. Por causa na diila pagka-mature na espiritual, na training que ya ricibi sila y na diila experiencia, este maga fiel misionario grande gayot ayuda na predicacion del buen noticia y buen ejemplo sila para na maga nuevo na organizacion.

 Na cada branch office, el Field Ministers Desk del Service Department tan coordinate na Branch Committee para dale el maga necesidad del maga misionario, igual na simple casa, maga necesidad na diila salud y diutay allowance para na diila personal gasto. Del 2020 service year, el maga Testigo de Jehova ya gasta cerca $27 millon (U.S.) para cuida con el maga misionario. Por causa con este, ta puede man focus el maga misionario na diila ministerio y ta puede tambien sila hace fuerte con el congregacion.

 Paquemodo ya puede ayuda el maga misionario na predicacion? Si Frank Madsen, quien ta sirvi na Malawi Branch Committee, ya habla: “Por causa na diila animo y maga abilidad, el maga misionario ya puede ayuda con el maga congregacion para predica na maga dificil teritorio, igual na maga privado comunidad y maga lugar que tiene foreign language. Mas pa, el diila esfuerzo para aprende con el lengguaje y cultura na diila teritorio ta dale buen ejemplo con otro. Grande influencia tambien sila para na maga jovenes para pensa tambien el maga jovenes que sirvi full-time. Ta rindi kame gracias con Jehova por causa con este maga misionario.”

 El un miembro del Branch Committee de otro nacion ya habla: “Ta dale prueba el maga misionario que el maga siervo de Jehova unido na entero mundo. Maskin el maga gendeh Testigo ya puede mira que gendeh kita dividido por causa na maga cultura sino unido kita por causa na maga enseñanza na Biblia.”

 Paquemodo ta puede ayuda el maga misionario con el maga hermano y hermana na congregacion? Si Paulo, de Timor-Leste, ta aprecia con el maga misionario que ya man assign na diila congregacion. Ya habla le: “El diamon lugar bien caliente. Pero maskin pa estaba na frio lugar el maga misionario, ta continua sila siempre predica. Todo’l aga sila ta atende na maga miting para na predicacion. Pirmi yo kanila ta mira ta man RV hasta media dia donde bien caliente el sol y tambien de noche. Mucho ya sila con quien ya puede ayuda aprende el verdad, incluido ya yo. Ta usa sila el diila entero vida para activo sirvi con Jehova y este ta motiva con el entero congregacion para sirvi pa mas con ele.”

 Si Ketti que un regular pioneer de Malawi ya habla si paquemodo el un man maridable misionario ya ayuda con el de suyu familia: “Cuando ya man assign con el un man maridable misionario na diamon congregacion, iyo lang el Testigo na diamon familia. Pero ya ayuda este man maridable conmigo y ya queda sila bien cerca na diamon familia. El diila buen ejemplo ya ayuda con el de mio maga anak para mira si paquemodo el servicio con Jehova ta resulta na alegre vida. Por causa con ese, regular pioneer ya el de mio tres anak mujer y ta atende ya miting el de mio marido.”

 Onde estaba el pondo que ta usa para suporta con el maga misionario? Na maga donacion para na worldwide work. Mas mucho, ta dale con este maga donacion usando el maga manera que ta menciona na donate.pr418.com. Ta aprecia gayot kame con este maga donacion.