Ta pensa gayot kita el bien del diaton maga hermano y hermana. (1 Pedro 2:17) Si Tannis, un hermana de Kenya, ya habla, “Quierre gayot yo sabe si cosa ta pasa con el de mio maga hermano y hermana na entero mundo.” Igual con Tannis, ansina tambien el cosa kita quierre. Paquemodo si Tannis y el millones del maga Testigo de Jehova ta sabe si cosa ta pasa con el diila maga hermano y hermana? Principia del 2013, ta puede se kita sabe por medio na seccion Maga Noticia na diamon website, jw.org.

 El seccion Maga Noticia tiene maga report acerca na maga Testigo de Jehova na maga topico igual na maga release del Biblia, dalida del maga ayuda na tiempo del calamidad, maga proyecto de construida y otro pa maga importante suceso na organizacion. Ta dale este kanaton informacion acerca na diaton maga hermano y hermana quien yan preso por causa na diila fe. Ta contene tambien este maga bonito experiencia acerca na campaña de predicacion y el Comemoracion del muerte de Jesus. Quien tan research con este maga articulo y paquemodo sila con este ta produci?

 El Office of Public Information (OPI) amo el quien ta mira con el seccion Maga Noticia. Este departamento talla na world headquarters y ta trabaja este bajo na direccion del Coordinators’ Committee del Cuerpo Gobernante. Tiene mas de 100 maga hermano y hermana quien tan volunteer na OPI—manada kanila maga remote volunteer. Tiene kanila maga writer, researcher, visual artist y maga translator. El otro ta comunica con el maga oficial del gobierno, maga professor y maestro y na media. Ta asisti con el OPI el mas de 80 Public Information Desk (PID) na maga branch na entero mundo.

 Para produci un noticia, el OPI ta trabaja junto con el maga PID. Si ya puede ya sila determina que el un istoria puede queda un potencial noticia, tan research sila con el topico y ta saca maga justo informacion. Posible, necesita sila man interview y man cuento con el maga experto. Despues sila obtene maga justo informacion, ta escribi sila con el noticia, tan edit, tan proofread, ta produci maga letrato y despues, ta imbia este na Coordinators’ Committee para aproba.

 Cosa ta sinti el diaton maga hermano y hermana acerca con este provision? Si Cheryl, un hermana de Pilipinas, ya habla, “Antes yo hace otro cosas, quierre-quierre yo le el maga noticia acerca na organizacion de Jehova y na de suyu maga siervo.”

 Manada el quien ta habla que diferente el seccion Maga Noticia na jw.org contra na otro maga noticia na media. Si Tatiana, de Kazakhstan, ya habla: “Ta rindi yo gracias que puede yo confia con el maga noticia na jw.org. Verdad el maga noticia.” Un hermana de Mexico que si Alma ya habla: “Si compara con el maga mal suceso que ta puede kita oi na media, el seccion Maga Noticia ta puede gayot anima conmigo.”

 Puera que puede confia con el seccion Maga Noticia, ta hace tambien este fuerte con el diamon fe. Si Bernard, de Kenya, ya habla: “Este ya puede ayuda conmigo para mira con el maga hermano y hermana na entero mundo como de mio familia, maskin de onde pa man sila. Ta puede yo menciona con el diila maga nombre y con el diila maga especifico situacion na de mio maga rezo.” El un hermana que si Bybron que de Kenya tambien, ya habla: “Pirmi yo ta queda excited si ta puede yo mira maga articulo acerca na maga release del Biblia na diferente maga lengguaje! Este maga articulo ta hace acorda conmigo que imparcial si Jehova.”

 Maskin el maga noticia acerca na maga hermano con quien ya persigui puede anima con otro. “Si ta medita yo con el diila coraje, ta puede gayot se hace fuerte con el de mio fe,” ya habla si Jackline, de Kenya. “Pirmi yo ta pricura mira si cosa kanila ya ayuda para aguanta. Ya puede yo aprende si paquemodo el maga ‘simple’ cosas—igual con el rezo, lehida del Biblia y maskin el cantada—bien importante para puede esta fuerte el maga hermano.”

 Si Beatriz, un hermana de Costa Rica, ta aprecia con el maga noticia acerca na maga natural calamidad. Ya habla le: “Por medio con este, ta puede yo mira si paquemodo el organizacion ta dale ayuda na paspas, efectivo y amable manera con el maga hermano. Ese ta convinci conmigo que este el organizacion de Jehova.”

 Ta rindi gayot kita gracias que ta puede kita ricibi el de con todo reciente noticia acerca na diaton maga hermano y hermana na entero mundo! Ya queda ese posible por causa na de ustedes maga donacion que ta dale para na trabajo que ta hace na entero mundo que mas mucho ta dale por medio na donate.pr418.com. Gracias na de ustedes con todo corazon maga donacion.