Adentro na mas de 130 año, el maga Testigo de Jehova tan junto-junto cada año na maga asemblea de region. Na este maga programa, tiene mas de 40 maga talk, musica, interview y video. Para puede beneficia aquellos quien ta atende, necesita claro sila puede “mira y oi” con el programa. (Lucas 2:20, El Nuevo Testamento na Chavacano) Paquemodo ta usa con el de tuyu donacion para aquellos quien ta atende na asemblea hay beneficia maskin onde man sila?

 Manada na maga moderno stadium el tiene ya el diila mismo audio/video system. Pero porque ta pone pa kita el diaton mismo audio y video equipment si ta arquila kita con ese maga facilidad? Si David, quien ta trabaja junto na World Headquarters Broadcasting Department, ya habla: “El diaton maga programa ta tarda por mas de seis hora y necesita kita oi con el quien ta converza na programa. Pero, poco lang na maga facilidad el ya diseña para na ansina. Por ejemplo, el audio y video system del maga facilidad onde ta hace maga juego ya diseña para lang hace maga corto anuncio y tuca maga corto musica. El diila maga video screen tan display lang con el maga score, advertisement y maga replay del juego. Pero, quierre kita que puede mira enbuenamente el maga audience con el maga largo video y oi y entende enbuenamente con el maga palabra que ta habla el speaker na stage.”

 Diferente el maga facilidad para na cada asemblea poreso necesita plaña con el audio y video system que necesita usa para na cada uno de ese. Si ya puede ya decidi si onde hace con el asemblea, el Broadcasting Department na branch office ta determina si cuanto el posible atende, si onde sila sinta y el capacidad del lugar. Despues, ta plaña el maga hermano si onde pone con el maga speaker y maga video screen. Acabar, decidi sila si paquemodo con aquel conecta y lista sila con el maga equipment que necesita para asigura que el todo quien atende hay puede mira y oi con el programa.

 Mas complicao el maga audio y video system na maga asemblea donde necesita presenta con el programa na manada lengguaje. Si man translate con el programa na otro lengguaje, debe puede mira y oi el maga interpreter con el audio y video. Despues, necesita hace pasa con el cosa sila ta habla na un radio channel donde puede oi aquellos quien ta entende con ese lengguaje. Por causa na maga especial media player, ta puede ya man play con el maga video na ocho diferente lengguaje. “Bien complicao gayot este maga system,” ya habla si David, “y el maga voluntario quien tan operate con este necesita gayot pasa training.”

 Mayoria na maga branch office el tiene maga audio y video equipment que ta usa na maga asemblea cada año. Ta imbia sila se para na un asemblea y despues para na sunod. Na United States branch pa lang, ta gasta ya mas de $200,000 a cada año para imbia con el maga equipment na maga asemblea. Pero mas barato siempre se contra cumpra y mentena maga nuevo equipment. Si Steven, quien ya ayuda mira con el audio y video system na un asemblea na Canada, ya habla, “El audio y video team ya hace gayot esfuerzo para asigura que completo el maga turnillo, wire y otro pa maga gamit. Ya recuji sila con ese enbuenamente para preparao ya se na sunod asemblea.”

 Bien caro gayot si ta arquila con el maga audio/video equipment y mas mucho gendeh bonito el calidad de este y gendeh na buen condicion. Por causa con ese, ta cumpra ya lang kita con el maga equipment que necesita. Ahora, maga $24,000 el precio del LED video wall que tiene cinco por tres metro y maskin el 15 metro wire del microphone talli na maga $20. Poreso antes cumpra con el maskin cosa equipment, ta consulta el Broadcasting Department na Purchasing Department para “carcula el maga gastos.” (Lucas 14:28) Por ejemplo, ta considera sila con este maga pregunta: Paquemodo de manada el beneficia con el equipment? Mas bueno ba si cumpra maga nuevo equipment? Tiene ba kita onde pone con ese y tiene ba kita maga gamit y maga voluntario con quien yan train para mentena con ese?

 Para dura puede usa con el maga audio y video equipment y para menora el gasto, regular kita ta mentena y ta compone con ese. Y si ta imbia kita con el maga equipment, ta pone kita con este na maga cajon para gendeh este man damage y ta compone tambien kita con el maga cajon si necesita.

 Manada maga gendeh Testigo el yan bilib na calidad del diaton audio y video na diaton maga asemblea. Por ejemplo, na un asemblea, ya puede nota con ese el un empleado del uno del de con todo grande broadcasting company na entero mundo. “Nuay gayot le expecta cuando ya sabe le que el quien tan set up y el quien tan operate con el audio y video equipment na asemblea amo maga voluntario lang y gendeh maga professional,” ya relata si Jonathan, quien uno del maga voluntario. “Ya habla aquel empleado que ta necesita cinco dia el diila compania para man install con el cosa kame yan install na uno y media dia lang.” Na otro asemblea, el manager del facilidad ya habla, “Manada ya maga experto na musica y na video el ya anda aqui pero ahora lang yo ya mira maga gente quien bien professional y experto na cosa sila ta hace!”

 Paquemodo tu ya beneficia na audio/video system na maga asemblea? Posible ta sinti tu igual con David, quien ta queda na England. Ele ya habla: “Ochenta y ocho año ya yo y ta atende ya yo na maga asemblea desde antes pero mas facil ya ahora man focus na asemblea. Por causa na maga bonito video, mas claro y mas ta puede yo entende con el mensaje del programa.” Si Micheal, quien ta queda na Nigeria, ya habla, “Por causa cay gendeh mas ta tormenta el maga hermano y hermana oi con el speaker y mira con el maga video, mas ta puede sila man focus na programa.”

 Mientras ta atende tu con el “Predica el Buen Noticia!” Asemblea de Region y Especial Convencion, dale tiempo para considera si cosa ya hace posible para puede tu oi y mira enbuenamente con el programa. Ta aprecia gayot kame que el de ustedes maga donacion, incluido con el maga donacion que ya hace por medio na donate.pr418.com, ya hace con este posible. Gracias.