Quierre si Dios Jehova que el todo gente, maskin cosa el diila circumstancia, hay aprende acerca con ele y con el de suyu Reino na cielo. (1 Timoteo 2:3, 4) Poreso el maga Testigo de Jehova ta produci maga Biblia y maga publicacion que base na Biblia para na manada maga gente, incluido el maga apa. Gane, el diaton organizacion ya hace miles de maga sign-language video a que puede obtene na mas de 100 lengguaje de señas! Paquemodo kita ta hace y ta distribui con este maga video? Cosa maga improvement kita ya hace mientras ta pasa el tiempo?

 Ta hace con el maga video de lengguaje de señas por medio na maga translation team na entero mundo. El maga miembro del cada team ta estudia enbuenamente con el publicacion que necesita sila man translate. Acabar, ta decidi sila si cosa el de con todo buen manera para man translate con el informacion na lengguaje de señas. Despues de ese, tan record sila con el diila translation. Ahora, tiene 60 team quien regular tan translate con el maga publicacion para na lengguaje de señas y tiene otro 40 team que tan translate tiene vez.

 De antes, grande gayot el ta gasta para produci maga sign-language video. Mas caro el maga video camera y otro maga equipment de antes compara ahora. Mas pa, tan record con el maga video na studio na un building que el organizacion mismo el ya construi o yan renovate. Ta gasta maga mas de $30,000 b para man set up con el todo cosa necesita el un sign-language translation team.

 Para puede usa enbuenamente con el maga donacion, el diaton organizacion ya busca maga manera para man improve y hace simple con el proceso de translation. Ya usa el organizacion maga equipment que moderno, usable y gendeh tanto caro. En vez usa un studio, el maga translation team puede ya usa verde background que ta llama green screen y man record con el maga video na diila oficina. Si necesita manada signer na un video, el maga hermano y hermana puede man record con el diila porcion na video na diila oficina o casa; gendeh mas sila necesita anda na un studio.

 Ya hace tambien un software para ayuda con el maga signer na diila trabajo. Como resulta, media ya lang del tiempo que ta usa el maga translation team para na un publicacion de antes el ta usa sila para produci un sign-language video ahora. Ya aprecia gayot el diaton maga hermano con este maga improvement. El un hermano que si Alexander ya habla: “Compara de antes, pirmi ya ahora tan release maga sign-language video. Alegre gayot yo por causa con ese. Ta mira yo con el maga video cada dia.”

 Ahora, gendeh alcanza $5,000 el ta gasta para dale el cosa necesita el un translation team. Como resulta, ta puede ya produci con el maga sign-language video na mas manada lengguaje.

 Si ta acaba man record el team con el sign-language video, necesita distribui con ese con aquellos quien ta necesita. De antes, ta produci el organizacion maga videocassette y DVD. Pero caro este y ta necesita grande tiempo y esfuerzo para produci con este. Ta imbia con el maga recording na un compania para hace manada copia de ese. Despues, ta imbia con el maga videocassette y DVD na maga congregacion. Del 2013 pa lang, mas de $2,000,000 el ya gasta para produci maga sign-language DVD.

 Ya aprecia gayot el maga apa con ese maga provision. Pero, gendeh pirmi facil usa con ese maga video, especialmente cay ya queda mas manada el maga cassette y DVD. Na cuanto situacion, necesita manada DVD para lang na un libro del Biblia. El un hermano na Brazil que si Gilnei ya habla: “Si quierre kame le un texto, necesita anay kame busca con el justo videocassette y despues, busca con el texto. Bien dificil gayot quel.” El un hermana que si Rafayane, quien ya usa maga sign-language DVD, ya habla: “Cansao man personal study de antes. Grande tiempo gayot kame ta usa para lang busca con el maga texto o referencia.” Y si na predicacion el maga hermano y hermana, mas mucho ta lleva sila maga DVD o videocassette, y tan play con ese na TV del maga interesao persona. Gane, el cuanto maga hermano ta lleva con el diila mismo DVD player. Nuay dura, ya tiene maga portable DVD player que tiene screen y ya usa se el manada hermano. Si Bobby, quien ta queda na United States, ya habla: “Si despues tu man share un texto y quierre pa tu man share otro texto, mas mucho necesita tu cambia DVD. Ta come se grande tiempo y tan dificil kame usa con el Biblia na predicacion.”

 Del 2013, el organizacion de Jehova yan release con el JW Library Sign Language app que donde puede man download y man play sign-language video el maga hermano y hermana na diila maga gadget. Del primero, yan release con el app para na American Sign Language. Despues, del 2017, yan update con este para puede inclui con el todo maga lengguaje de señas. Ya queda gayot alegre el maga hermano y hermana na entero mundo. Si Juscelino, un hermano na Brazil, ya habla: “Gendeh gayot maka-creé! Pirmi yo ta pensa que ta ama gayot el Cuerpo Gobernante kanamon maga apa y quierre sila que progresa kame na verdad igual con aquellos quien ta puede converza. Bien excited gayot yo. Este app ya manda move conmigo para estudia pa mas con el Biblia.”

 Ahora ta produci el organizacion con el todo maga sign-language video online y ta distribui con ese na diaton website y na JW Library Sign Language app. Como resulta, puede ya man translate, man record y distribui con el maga sign-language video adentro lang na cuanto dia en vez de cuanto maga mes o año. Gane na manada lengguaje de señas, ta puede ya man release con el maga video junto na maga escribido publicacion na otro lengguaje.

 Nota con el cosa ya habla el cuanto maga hermano y hermana quien apa. El un hermana que si Klízia ya habla: “Tiene pa ba otro organizacion quien ta ama gayot con el maga apa que ta dale espiritual comida na manera que facil para kanamon que obtene? Nuay gayot otro organizacion que ta hace igual na cosa ta hace el organizacion de Jehova para kanamon.” Si Vladimir ya habla: “El maga video ya dale conmigo mira que si Jehova ta ama gayot con el maga apa igual si paquemodo le ta ama con aquellos quien ta puede converza.”

 Na diaton maga sign-language video, mas mucho tiene ta menciona: “Este publicacion ta distribui como un parte del programa de educacion estaba na Biblia que ta hace na entero mundo y ta suporta por medio del voluntario donacion.” Ta aprecia gayot kame con el de ustedes maga donacion. Y manada de ese ya hace por medio na donate.pr418.com. Por causa con este pondo, ta puede el organizacion produci maga Biblia y maga publicacion que base na Biblia para na todo, incluido aquellos quien ta usa lengguaje de señas.