“Quierre-quierre yo anda na Kingdom Hall!” ya habla si Nicole, un joven hermana de Colombia. “Aqui yo ta puede man junto con el de mio maga hermano y hermana.” Ansina ba tambien tu ta sinti?

 Na entero mundo, tan junto-junto el maga Testigo de Jehova na maga 63,000 Kingdom Hall. Un bonito lugar este onde puede adora con Dios. Pero gendeh lang ese el proposito de este maga building. El un regular pioneer de Colombia que si David ya habla: “Por causa na diaton maga Kingdom Hall, mas ta queda interesao el maga gente na diaton mensaje. Manada el tan bilib cay ta puede kita mentena con el buen condicion del diaton building.” Nuay lang se basta sucede. Ta hace kita esfuerzo para limpia y mentena con el diaton maga Kingdom Hall. Paquemodo se kita ta puede hace?

 Responsibilidad del maga congregacion quien ta usa con el un Kingdom Hall para mentena con este. Poreso, regular ta limpia el maga hermano y hermana con el diila Kingdom Hall. Ta asigura tambien sila que na buen condicion este y ta compone con ese si necesita.

 Para ayuda con el maga congregacion mentena con el diila Kingdom Hall, yan assign el Local Design/Construction Department (LDC) maga hermano para sirvi como maga maintenance trainer. Yan assign con el cada maintenance trainer para mira con el seis hasta diez Kingdom Hall. Ta visita le na maga congregacion y tan train con el maga publisher si paquemodo cuida con el diila Kingdom Hall. Cada tres año, ta chequia le con el cada building para mira si safe pa ba con este usa o si tiene cosa necesita compone.

 Ta aprecia gayot el diaton maga hermano y hermana con el training que ya ricibi sila estaba na maga maintenance trainer. Si Indhumathi, un hermana na India, ya habla: “Bonito gayot el training. Un privilegio para aprende si paquemodo mentena con el diamon Kingdom Hall.” Si Evans, un hermano na Kenya, ya habla: “Ya puede kame aprende que grande gale ta puede man save si compone kame con el maga diutay problema antes pa se queda grande.”

 El gasto na usada y mentenada del un Kingdom Hall cada año ta llega hasta miles de dollar, a depende na lugar, cuanto año ya el building y si cuanto congregacion el ta usa con este. Paquemodo kita ta puede paga con este maga gasto?

 Ta puede mentena con el maga Kingdom Hall por medio na diaton donacion. Si Alexander, un hermano de Kazakhstan, ya habla: “Ta usa con el pondo para paga Internet, agua y corriente. Puera con ese, ta cumpra kita paper towel, glove, maga cosas que ta usa na limpiada y pintura.” Si tiene sobra sen, ta dona con ese na worldwide work para puede usa na mas grande y mas caro proyecto de mentenada na entero mundo.

 Si el gasto para na mentenada hay man lampas na cosa ta gasta el maga hermano na Kingdom Hall adentro del dos o tres meses, hay consulta el maga hermano na LDC maintenance trainer. Si ya aproba con ese el LDC, mas mucho ta saca con ese pondo na donacion para na worldwide work. Durante el 2023 service year, 8,793 de ese maga proyecto el ya puede hace y el gasto ya alcanza $76.6 millon. Considera con el dos de ese maga proyecto.

 El un Kingdom Hall na Angola 15 año ya plantao y manada ya cosa necesita compone. Malo ya el electrical system, tiene ya crack el maga pader y ya habla el maga vecinos que el agua estaba na Kingdom Hall ta alcanza ya na diila casa. Ya principia un proyecto el LDC para compone con este. El gasto diila ya alcanza $9,285. Alegre el maga vecinos y yan bilib sila si paquemodo ya hace con el trabajo.

 Na Poland, tan tulu ya el techo del un Kingdom Hall y malo ya el carpet. Ya aproba el LDC un proyecto para compone con el techo y cambia con el carpet. Ya alcanza $9,757 el diila gasto. Como resulta, gendeh mas necesita man renovate con este Kingdom Hall adentro del manada año.

 Por causa na mentenada, gendeh lang kita tan save sen sino ta puede tambien kita dale alabanza con Jehova. Si Shaun, un hermano na Tonga, ya habla: “Por causa na diaton mentenada, ta puede kita adora con Jehova na un limpio, presentable y enbuenamente Kingdom Hall, y ta dale se buen impresion na maga gente acerca con Jehova. Alegre kita invita con el maga gente na diaton Kingdom Hall.”

 Todo kita puede ayuda limpia y mentena con el diaton lugar de adoranza. Si Marino, un maintenance trainer na Australia, ya habla: “Todo kita puede tene el privilegio que ayuda cuida con el diaton maga Kingdom Hall. Si ta hace kita se, ta puede kita ayuda para man save sen que puede usa onde con ese mas necesita.”

 Si Joel, un hermano na India, alegre ayuda mentena con el diila Kingdom Hall. Ele ya habla: “Si ta trabaja yo junto na maga hermano y hermana, ta puede yo imagina si cosa el vida na nuevo mundo.” Si Nicole que ya menciona enante ya habla: “De este nuevo lang, ya ayuda yo man mop con el piso mientras ta compone el maga hermano con el leaking na CR. Maskin pa nuay yo ayuda compone, ya puede yo ayuda evita accidente.”

 Si quierre tu ayuda mentena con el de ustedes Kingdom Hall, atraca na de ustedes maga anciano. Mas pa, el de tuyu maga donacion ta puede ayuda gendeh lang na mentena del de ustedes Kingdom Hall sino pati na otro maga Kingdom Hall na entero mundo. Puede tu dona por medio na maga cajon de contribucion na de ustedes Kingdom Hall o por medio na donate.pr418.com. Ta aprecia gayot kame con el de tuyu pagka-bondadoso.