Uno na maga bien bonito cosas que ya puede beneficia el maga Testigo de Jehova este año amo el Episode 1 del El Buen Noticia Asegun con Jesus. Millones ya el ya puede mira con ese. Y primero pa lang se na 18 episode de este serie! Cosa esfuerzo ya hace el maga hermano y hermana para hace con este serie y paquemodo el de ustedes donacion ya puede ayuda na este proyecto?

 Na Australasia branch ta hace con el mayoria de este serie de maga video. Maga 50 hasta 80 gente el ta trabaja si ta saca con el cada ecsena. a Ta dale come media dia, merienda y denoche con el todo maga voluntario y ta plaña adelantao el maga hermano si cosa comida dale kanila. “Ta cumpra kame maga ingrediente na diferente maga supplier para puede kame asigura que bueno el calidad de ese pero barato,” ya habla si Esther quien ta trabaja na Food Service Department. “Tan adjust tambien kame pirmi con el maga recipe para asigura que nuay comida que tan usik.” Cada dia, ta gasta kita maga cuatro dollar para na cada persona na este proyecto.

 Puera que dale kanila comida, necesita tambien protege con el maga hermano na calor del sol. Na Australia, mas manada tiempo que soles y caliente. Mas pa con ese, alto el level del ultraviolet radiation alla. Para gendeh pirmi na sol el maga hermano y para menora el diila cansancia por causa na calor, tiene maga voluntario quien ta asisti para hace maga tent y otro pa maga lugar donde puede refresca el maga ta trabaja. Ta asigura tambien sila que pirmi tiene maga sunscreen, payung y agua. Si Kevin quien ta trabaja na Audio/Video Services ya habla: “Mayoria del maga quien ta asisti amo maga commuter Bethelite. Humilde sila y alegre ta hace con el diila maga trabajo. Gendeh gayot kame puede cumpli con este proyecto si nuay sila.”

 Gendeh realistico el cuanto ecsena si saca con ese na filming set o na studio na branch office. Poreso tiene vez, ta anda sila na otro maga locacion. Para saca con el cuanto ecsena na tiempo del Biblia, mas mucho, necesita el maga hermano man viaje na maga lejos lugar donde nuay linea de corriente, cementao camino o maga building. Necesita tambien man empaque con el maga costume, props y equipment, y lleva con ese na lugar onde saca con el ecsena. Antes principia el shooting, ta asigura el maga assistant production coordinator que tiene maga CR, generator y limpio agua para toma. El maga actor y otro pa maga voluntario ta esta na casa del maga hermano na ese lugar, na maga trailer, na maga hotel o na maga casa que puede arquila.

 Si ta anda el maga hermano na otro locacion para man shooting, grande tiempo el necesita, grande el gasto y grande trabajo este para na todo quien envuelto. Poreso del 2023, ya aproba el Cuerpo Gobernante que cumpra un video wall que tiene valor de 2.5 millon dollar (U.S.). Bien claro el video na este maga screen y tiene este maga luz que puede man adjust para hace sale que dol apuera ya saca con el ecsena. Como resulta, tiene vez, puede gendeh ya anda na un locacion para man shooting y gasta grande. Si Darren, un miembro del Australasia Branch Committee, ya habla: “Si ta usa con el video wall, gendeh tanto ta cansa el maga actor y manada beses puede saca otravez el maga hermano con el cuanto maga ecsena. Por ejemplo, si tan shooting kame apuera, cuanto minuto lang kame tiene para saca con el sunset. Pero usando el video wall, puede kame pruba manada beses hasta puede saca con el justo sacada del ecsena.”

 Bien manada maga actor y voluntario el ta trabaja para na cada episode de este serie. Cosa sila ta sinti na todo esfuerzo del maga hermano y hermana para atende kanila?

 Si Amber, un hermana estaba na Melbourne quien ya viaja mas de 700 kilometro para ayuda na este proyecto, ya habla: “Desde cuando ya llega yo na airport, ya cuida gayot conmigo el maga hermano de Bethel. Manada maga Bethelite el ya invita conmigo para come o toma cha junto kanila. Si tan shooting kame, comfortable yo y ta sinti yo el amor del todo. Bien manada gayot yo bendicion ya ricibi na este assignment. Poreso ta sinti yo que dol nuay lang yo cosa ya sacrificia!”

 Si Derek quien ta ayuda na hacida de este maga video ya habla: “Desde na principio de este proyecto, bien manada departamento el ya ayuda kanamon. Tiene maga hermano y hermana quien ya sacrificia con el diila tiempo, material cosas y fuerza para na este proyecto y alegre yo cay ya puede yo trabaja junto kanila. Preparao sila suporta, dale ayuda y amable sila. Claro que ya bendici si Jehova kanamon todo. Convincido yo que ta aprecia si Jehova gendeh lang con el resulta del diamon trabajo sino si paquemodo tambien kame ya cumpli con ese.”

 Gracias na de ustedes suporta na este serie de maga video. Ya queda este posible por causa na de ustedes maga donacion, incluido ya el maga donacion que ya hace por medio na donate.pr418.com.