Na este ultimo maga dia, ta expecta kita que kita “ay oi . . . maga guerra y maga noticia de guerra.” (Mateo 24:6, El Nuevo Testamento na Chavacano) Pero si ta queda afectao el maga hermano na ese maga suceso, ta ricibi sila el ayuda que necesita sila. El 2022 Update del Cuerpo Gobernante #3 ya dale informacion si paquemodo ta dale ayuda na Eastern Europe con aquellos quien ya sale afectao na guerra na Ukraine. Paquemodo ta dale con el ayuda maskin pa tiene guerra cerca na ese lugar? Cosa el efecto de ese na diaton maga hermano na Ukraine?

 Del Febrero 24, 2022, cuando ya principia el guerra na Ukraine, el Coordinators’ Committee ya aproba con el un budget para asisti con el diaton maga hermano na Ukraine. El branch na Ukraine ya principia dayun cumpra na diila lugar maga cosas que necesita y ya distribui con ese por medio na 27 Disaster Relief Committee.

 Mas pa con ese, el maga hermano na World Headquarters del maga Testigo de Jehova ya principia dayun identifica si cosa maga practical ayuda sila puede dale. El Coordinators’ Committee y Publishing Committee del Cuerpo Gobernante ya pidi con el Global Purchasing Department para trabaja junto con el maga hermano de branch office na Ukraine y Poland para mira con el necesidad y plaña si paquemodo dale con ese. El maga hermano na Purchasing, Shipping y Legal department na ese maga branch junto con el maga miembro del Branch Committee de Ukraine y maga hermano na Global Purchasing Department tan miting cada dia para organiza con el trabajo.

 “Una, necesita kame identifica si cosa el necesidad,” ya habla si Jay Swinney de Global Purchasing Department. “Quierre kame dale comida y maga cosas que necesita para na salud y limpieza del maga hermano que anad ya sila usa na diila lugar. Pero puera que necesita kame identifica si cosa el necesidad, necesita tambien kame determina si paquemodo safe y paspas puede lleva con el ayuda na Ukraine mientras ta sucede el guerra.”

 Del Marzo 9, 2022, ya puede ya identifica si cosa el maga necesita. Hay distribui maga cajon que ta contene maga comida igual na de lata, grano, arroz y beans, incluido el maga cosas que necesita na limpieza y salud igual na jabon y toilet paper. Aquel tiempo, ya carcula que maga $65 (U.S.) el valor del cuatro semana supply para na un persona. Ciendo miles de maga hermano el necesita con ese, el Coordinators’ Committee ya aproba un grande budget para usa na ese proposito. Pero paquemodo puede lleva con ese maga supply na manera que gendeh pone na peligro con el vida del maga hermano?

 Del Marzo 13, tiene dos hermano de Poland quien ya pruba lleva ayuda estaba na branch office na Poland para na un warehouse cerca na Lviv, Ukraine. Na maga dia antes sila sale, el maga hermano na branch office de Poland y Ukraine ya ayuda kanila para prepara para na diila viaje. El branch office ya hace con el todo papeles que necesita para puede sila cruza na border para dale ayuda. Ya asigura sila que claro el maga marca na vehiculo del maga hermano para dale mira que ta lleva sila maga ayuda. Ya pidi tambien sila ayuda na maga hermano na Ukraine para determina si cosa el de con todo corto ruta que puede pasa el maga hermano si cruza ya sila na border. Por causa na buen preparacion y na ayuda de Jehova, ya puede distribui con el ayuda na maga Disaster Relief Committee adentro lang na 24 hora desde yan deliver con este na Lviv y safe ya puede bira el maga hermano na Poland.

 Maskin enbuenamente sila ya puede lleva ayuda na diila primer viaje, nuay alcanza un tonelada el cosa ya puede lleva el maga hermano. Ya carcula que maga 200 tonelada pa de ayuda el necesita! Paquemodo puede paspas lleva y distribui ansina de manada ayuda?

 Despues puede le con el maga noticia na jw.org acerca si paquemodo ya sale afectao el maga hermano na suceso na Ukraine, manada gente na entero mundo el quierre ayuda. Manada de aquellos quien ta queda lejos ya dale maga donacion na trabajo que ta hace na entero mundo el maga Testigo de Jehova cay sabe sila que usa enbuenamente con el diila maga donacion. Aquellos quien ta queda na maga nacion cerca na Ukraine ya dale con el diila tiempo, fuerza y material cosas para asisti. Nota con el cuanto maga ejemplo.

 Na Poland, el maga voluntario yan pack miles de maga ayuda y el maga bata ya hace maga card. “Manada beses yo ya puede le con el cosa ta habla na Salmo 110:3, que el maga siervo de Jehova ‘hay ofrece con el diila mismo cuerpo,’” ya relata si Bartosz Kościelniak, un miembro del Purchasing Department na branch na Poland. “Pero cuando ya puede yo mismo mira con el grande suporta y el manada voluntario quien ya anda dayun para ayuda, ya puede yo mira que deverasan gayot ese maga palabra.”

 Tiene un Testigo de Jehova quien dueño del un international logistics company quien ya manda usa con el de suyu maga truck y ya dona gasolina para puede con ese usa. Ele ya habla: “Para conmigo, un oportunidad este para puede yo dale mira el de mio amor para con el de mio maga hermano y con Jehova. Alegre gayot yo cay ya puede yo ayuda.” Ya carcula que mas de 7,700 litro de gasolina el ya dona y cerca 48,000 kilometro el ya viaja el maga hermano para puede lleva con el maga ayuda!

 Por causa na esfuerzo del diaton maga hermano y hermana, del Marzo 28​—15 dia lang despues del primer viaje—100 tonelada ya de maga comida y maga cosas que necesita para na salud y limpieza el ya puede lleva na Ukraine! Y por causa na bondadoso donacion del maga hermano y maga supplier, ya menora gayot el cantidad que necesita para puede dale maga ayuda. Ahora, mas del 190 tonelada ya de maga ayuda el ya puede dale el maga Testigo de Jehova na Ukraine. Cosa el efecto de este na diaton maga hermano?

 Cuando ya llega el maga ayuda na Lviv, el maga Disaster Relief Committee na Ukraine ya distribui con ese con aquellos quien necesita. Ya distribui con ese na diferente maga ciudad donde el cuanto mas de 1,300 kilometro de lejos na Lviv. Maskin pa ya hace con este na de con todo pronto manera, necesita siempre tiempo para acaba lleva con el todo ayuda. a

 Si Markus Reinhardt, un miembro del Branch Committee na Ukraine, ya habla: “Durante este dificil situacion, manada maga hermano el ya puede mira el amor de Jehova y el beneficio si sigui enbuenamente con el maga direccion del de suyu organizacion—maskin antes pa sucede antes el calamidad. Por ejemplo, ya anima con todo que recuji supply de comida y agua que bastante por cuanto semana na diila maga casa. Acerca na este direccion, el un anciano na Kyiv que si Anton ya habla: ‘El organizacion de Jehova ya prepara kanaton para na maga critical situacion y ta rindi kita gracias por causa con ese. Cay tiene kame radio y supply de comida y agua, ya puede se ayuda para salva con el diamon vida.’ Ta rindi gayot kame gracias cay ya sigui el maga hermano con ese direccion cay ya puede pa tiene tiempo el branch office para organiza con el dalida de ayuda.”

 Cosa ya sinti el maga hermano cuando ya llega el ayuda? Kanda Mykola y Zinaida, quien ta queda na Kharkiv, ya habla: “Ta aprecia gayot kame con el de ustedes personal interes. Gracias gayot na comida y medicina. Claro gayot kame ta puede mira que ta cuida kanamon si Jehova.” Si Valentyna quien ta queda tambien na aquel lugar ya habla: “Desde ya principia el guerra, largo el pila na maga tienda. Tiene vez, gendeh tu puede cumpra el cosa tu necesita. Pero sabe si Jehova y ya puede mira con este problema. Ya iscuji le maga hermano para distribui maga ayuda na maga casa y ta contene gayot este el cosa kame necesita. Na este maga dificil situacion que donde dol nuay mas esperanza, puede gayot kita sinti na especial manera que ta cuida kanaton si Jehova y el de suyu organizacion. . . . Bien maka-alegre gayot que puede ricibi con el de suyu ayuda y suporta na justo tiempo.”

 Kanda Yevhen, Iryna y Mykyta, quien ya evacua estaba na Mariupol, ya habla: “Ta rindi gayot kame gracias na de ustedes cuidada y suporta na diamon familia. El deverasan, na justo tiempo gayot kame se ya puede ricibi. Sabe ustedes, del primero, pensaba kame maga producto lang el talli na maga cajon pero cuando ya abri kame se, ya puede kame realiza que ta contene tambien se el de ustedes amor para kanamon!”

 Asigurao ta puede tu mira si paquemodo si Jehova ta usa con el de suyu sagrao espiritu para guia con el maga hermano para puede sila dale maga ayuda maskin tiene “maga guerra y maga noticia de guerra.” Grande ayuda tambien el de ustedes maga donacion na trabajo del maga Testigo de Jehova na entero mundo que mas mucho ya hace por medio na donate.pr418.com. Ta aprecia gayot kame con el de ustedes pagka-bondadoso!

Ta Dale Maga Ayuda na Manera que Pronto y Safe

1. Febrero 24, 2022: El Coordinators’ Committee ya aproba un budget para na Ukraine que ya hace posible para puede el branch principia dale maga ayuda

2. Febrero 24–Marzo 8, 2022: El branch de Ukraine ya cumpra maga cosas na diila lugar y ya principia distribui con ese por medio na maga Disaster Relief Committee. Ya prepara tambien el branch office para ricibi y distribui maga ayuda estaba na Poland

3. Marzo 9, 2022: El Coordinators’ Committee ya aproba que lleva ayuda na Ukraine

4. Marzo 10–12, 2022: Ya hace maga plano para na primer viaje para lleva maga comida y supply estaba na Poland para na Lviv, Ukraine

5. Marzo 13, 2022: El primer vez que ya lleva maga comida y supply estaba na Poland para na Lviv, Ukraine

6. Marzo 14–16, 2022: Na un Assembly Hall cerca na Poznan, Poland, el maga voluntaio del Local Design/Construction ya hace maga relief package

7. Marzo 17, 2022: Cuatro dia despues del primer viaje, ya principia lleva con el 13 tonelada de maga ayuda para na border del Ukraine

8. Marzo 21–27, 2022: Igual del una, ta hace con el maga relief package na Poland y ta lleva na Ukraine, y despues, ta distribui con ese na maga lugar onde necesita adentro na 24 hora

9. Marzo 28, 2022: Adentro na 20 dia despues aproba con el dalida de ayuda, ya puede lleva 100 tonelada de maga comida y maga cosas que necesita para limpieza y salud na Ukraine

 Ahora, mas de 190 tonelada ya de maga ayuda el ya puede lleva el maga Testigo de Jehova na Ukraine.