Del Enero 2021, el Cuerpo Gobernante ya anuncia el release del nuevo libro para na Bible study, el Queda Alegre Hasta Para Cuando! a Cosa tu ya sinti con ese anuncio? Si Matthew, de Canada, ya habla: “Excited gayot yo! Y mas ya queda yo excited cuando ya mira yo con el maga talk y video que ta explica si porque ya hace con este publicacion y si paquemodo con este yan field test. Quierre ya gayot yo con este mira y usa.”

 El Queda Alegre Hasta Para Cuando! ta introduci un nuevo manera para conduci maga Bible study. Pero, gendeh lang ese el cosa ta hace diferente con este nuevo libro na maga libro que ya usa kita de antes na Bible study. Si usa tu un printed copy del Queda Alegre Hasta Para Cuando! posible tu nota que diferente este na otro libro si agarra tu. Para mira si porque, sabe kita si paquemodo ya hace con este libro.

 Mas grueso papel. Porque este necesita? El Queda Alegre Hasta Para Cuando! tiene mas de 600 letrato que cerca diez beses mas pa na libro Enseña Kanaton! Mas pa, el maga pagina de este nuevo libro mas grande el space donde nuay escribido o nuay letrato. Si pino el papel, puede tu mira con el maga letrato na detras del pagina. Para evita con este, el maga hermano na International Printing Department (IPD), na Wallkill, New York, U.S.A., ya pruba cuatro clase de papel que ta usa ya kita na diaton maga printery. El Writing Committee del Cuerpo Gobernante ya examina con el cada sampol y ya iscuji con el papel que gendeh tanto claro el escribida o letrato na detras. El precio de este papel maga 16 por ciento mas pa na precio del papel que ta usa kita na mayoria del diaton maga publicacion. Pero por causa con este, el maga Bible study puede le con el cada pagina del Queda Alegre Hasta Para Cuando! que gendeh ta perde el focus por causa na maga letrato na detras del pagina.

 Diferente el cover. Diferente el material que ya usa na cover de este nuevo libro si compara na cover del diaton otro maga libro. El otro maga libro glossy o ta brilla el cover de este pero este nuevo libro matte. Poreso, mas claro puede mira con el letrato na cover. Ta ayuda tambien este protege con el libro para gendeh este pronto queda malo maskin pa cuanto beses con este usa. Pero, el matte laminate cinco beses pa mas caro contra na gloss laminate. Poreso, yan ayudajan el cuanto maga branch para puede cumpra matte cover que gendeh bien caro.

 Porque ya usa con el maga mas caro material? El un hermano quien ta sirvi na IPD ya explica: “Ta expecta kame que hay usa gayot con este libro poreso quierre kame que enbuenamente siempre el ichura de este maskin pa cuanto beses con este ya usa.” Si Eduardo, quien ta sirvi na Printery Office na Brazil branch, ya habla: “Alegre gayot kame cay ta puede kame mira que el organizacion de Jehova ta usa maga material que de calidad para hace bonito y durable con este libro mientras ta asigura que ta usa enbuenamente con el maga donacion.”

 Ya principia kita man print con el Queda Alegre Hasta Para Cuando! del Marzo 2021. Durante este del COVID-19 pandemic poreso ya enfrenta kita maga dificultad. Cay yan lockdown con el Bethel, el maga Bethel commuter gendeh puede trabaja na diaton maga printery y gendeh tambien puede invita maga nuevo hermano para sirvi como Bethelite. Como resulta, nuay bastante persona el quien puede trabaja na cuanto maga printery mientras ya cerra con el otro maga printery por causa na restriccion del gobierno.

 Paquemodo ya puede enfrenta con este maga dificultad? Cuando puede ya usa otravez con el maga printery, temporario yan assign con el maga hermano y hermana estaba na otro maga departamento na Bethel para ayuda na printing. “Cay ya hace sila maga sacrificio y conforme aprende maga nuevo assignment, ya puede se ayuda kanamon para cumpli con el trabajo,” ya habla si Joel, quien ta sirvi na IPD.

 Maskin pa na maga dificultad, ya puede ya kita man print millones de copia del Queda Alegre Hasta Para Cuando! Para puede hace con ese, ya usa kita otro-otro maga material, incluido el maga printing plate, laminate film, papel, ink y maga cosas para hace pilit. Na primer cinco mes del printing, ya gasta ya kita mas de $2.3 millon (U.S.) para na maga material pa lang. Para puede man save sen, tan print lang kita si cuanto libro el necesita el congregacion.

 Cosa ta sinti el maga quien ta conduci Bible study y el diila maga estudiante na este nuevo publicacion? Si Paul, un hermano na Australia, ya habla: “Bale gayot usa con el Queda Alegre Hasta Para Cuando! poreso pirmi yo excited conduci maga Bible study. Bien bonito el diseño del libro y puede gayot este ayuda con el maestro y con el estudiante. Tiene este maga claro informacion, pregunta que ta alcanza na corazon, video, letrato, chart y si cosa puede hace el estudiante. Un bonito tool gayot este que ya motiva conmigo para mejora con el de mio enseñada.”

 El un Bible study na United States ya habla: “Quierre gayot yo con el nuevo libro. El maga letrato ya ayuda conmigo para entende con el maga importante punto. El maga video ya alcanza gayot na de mio corazon y ya motiva conmigo para actua.” Este estudiante dos beses ta estudia na un semana y regular ta atende na maga miting na congregacion.

 Millones de copia del Queda Alegre Hasta Para Cuando! el para man print pa na manada lengguaje. Gane, na presente, el Cuerpo Gobernante ya aproba que man publish con este libro na 710 lengguaje—que 340 lengguaje mas pa na cosa ya aproba na libro Enseña Kanaton!

 Paquemodo kita ya puede paga con el maga gasto del printing? Por medio na maga donacion na worldwide work, donde manada de este ya hace por medio na donate.pr418.com. Ta aprecia kame con el de ustedes pagka-bondadoso que ya puede ayuda kanamon para produci maga publicacion que ta usa para na Bible study para con aquellos quien quierre aprende acerca con Jehova y queda alegre “hasta para cuando.”—Salmo 22:26.