“Del una, dol imposible ricibi espiritual comida na maga digital format.” Tan uyun ba tu con ese? Amo se el cosa ya habla si Geoffrey Jackson na un talk na 2020 Update del Cuerpo Gobernante #6. Ele ya continua: “Pero ahora baka man dificil kita enfrenta con este pandemic si nuay el maga tool igual con el JW Library. Si Jehova ya prepara ya daan kanaton todo para na maga situacion igual con este ahora.”

 Paquemodo kanaton ya prepara si Jehova? Paquemodo ya hace con el JW Library app y cosa el necesita para mentena y hace mas bonito con este?

 Del Mayo 2013, ya pidi el Cuerpo Gobernante con el MEPS Programming, un departamento na world headquarters, que hace un app que ta contene el revised New World Translation. “Aquel tiempo, nuay pa kita hace sale un mobile app na maskin cosa app store,” ya habla si Paul Willies, quien ta trabaja na MEPS Programming. “Pero ya hace kame un team, ya descanza anay hace con el cuanto proyecto y ya trabaja junto con el otro maga departamento para diseña y hace con el app y el maga laman de este. Pirmi kame ta reza de aquel tiempo. Y na ayuda de Jehova, despues lang del cinco meses, ya puede man release con el app durante el annual meeting!”

 Para queda este un deverasan library, necesita este tene mas manada publicacion na mas manada lengguaje. Del Enero 2015, available ya na app el mayoria del diaton maga publicacion na English y despues lang de seis meses, puede ya man download con ese maga publicacion na mas de cien maga lengguaje.

 Desde aquel tiempo, el maga hermano ya hace mas bonito con el app na manada manera. Ya omenta sila maga video, ya pone con el todo maga publicacion y media para na miting bajo lang na un tab y ya hace posible que puede man access con el maga referencia na Research Guide alli mismo na un versiculo na Biblia.

 Ta usa con el JW Library na 8 millon gadget cada dia y na mas de 15 millon gadget cada mes! Cosa el necesita para puede man function enbuenamente el app na ese maga gadget? Si Hermano Willies ya habla: “Gendeh gayot ta acaba el trabajo para na un mobile app. Pirmi kame ta omenta maga nuevo feature y ta busca manera para mas facil con este usa. Cay pirmi tan update con el maga operating system del maga gadget, necesita kame man adjust con el app para man function siempre este na maga nuevo operating system. Necesita tambien kame mentena y man upgrade con el diaton internal software mientras ta queda mas manada el diaton maga publicacion y maga recording na JW Library.” Si cunta con el todo maga material na diferente maga lengguaje, tiene ya kita maga 200,000 publicacion y mas de 600,000 audio y video recording na JW Library!

 Para continua mentena con el app, gendeh lang computer hardware el necesita. Necesita tambien cumpra maga software license. Para na un license pa lang, ta gasta kita $1,500 (U.S.) cada año. Mas pa, el MEPS Programming ta gasta maga $10,000 (U.S.) cada año na maga gadget estaba na otro-otro maga manufacturer para asigura que tan function enbuenamente el app na este maga nuevo computer, tablet y cellphone.

 Por causa na JW Library, grande el ya menora na gasto para man print, man bind y imbia maga literatura. El un ejemplo amo el booklet Examining the Scriptures Daily. Yan print kita cerca 12 millon copia de Examining the Scriptures—2013. Pero para na 2020 edicion, yan print kita maga cinco millon copia lang—maskin ya omenta 700,000 publisher na entero mundo. Porque ya hace con ese cambio? Cay manada del maga hermano y hermana ahora el ta le con el daily text na JW Library. a

 Grande tambien el ayuda del JW Library con aquellos quien ta usa con este. Para con Geneviève, quien ta queda na Canada, este app ya ayuda con ele para queda mas regular el de suyu personal estudiada. Ele ya habla: “El deverasan, si necesita pa yo hace sale manada maga libro para estudia, ta mira yo, gendeh yo puede estudia cada aga. Pero por causa na app, ta saca lang yo con el de mio tablet y talli ya el todo cosa yo necesita. Este regular estudiada ya puede hace mas fuerte con el de mio fe y ya hace mas hondo con el de mio espiritualidad.”

 Grande gayot el ayuda del app especialmente na este COVID-19 pandemic. Si Charlyn que de United States ya habla: “Por causa cay yan calayat el COVID-19 na entero mundo, mas de un año ya yo nuay puede mira con el diaton maga nuevo publicacion na printed format. Pero por medio na JW Library, ta ricibi siempre kita maga espiritual comida y ta rindi yo gracias con Jehova por causa con este amable provision.”

 Manada el quien ta sinti igual con Faye que ta queda na Pilipinas. Ele ya habla: “Ta usa yo con este app para na de mio espiritual rutina. Amo este el primer cosa que ta le yo cada aga. Este el cosa yo ta oi si ta hace maga trabajo na casa. Este el cosa yo ta usa para prepara para na miting y para na de mio Bible study. Aqui yo ta mira maga video si tiene yo vacante tiempo. Aqui yo ta le con el maga articulo o con el Biblia mientras tan pila. Grande ayuda gayot este regalo.”

 Grande ayuda tambien este app na ministerio. Por ejemplo, mientras ta predica, el un hermana na Cameroon quierre usa con el un texto que ya usa el un hermana maga cuanto semana ya el ya pasa. Pero, gendeh le ta acorda si cosa quel versiculo. Ele ya habla: “Bueno ya lang ya acorda yo con el cuanto maga palabra na aquel texto. Ya abri yo con el app y despues con el Biblia, y ya pone yo na search box con aquel maga palabra. Acabar, ya sale dayun el texto. Por causa con este app, ta puede yo incuntra manada maga texto que ta ulvida yo tiene vez.”

 El maga donacion que ya dale ustedes por medio na maga manera que ya menciona na donate.pr418.com ya puede ayuda kanamon para hace, mentena y hace mas bonito con el JW Library app para na diaton maga hermano y hermana na entero mundo. Gracias na de ustedes pagka-bondadoso.

1. Octubre 2013—Yan release con el app que ta contene con el revised New World Translation

2. Enero 2015—Ya pone con el otro maga publicacion na English y despues, ya omenta na mas de cien maga lengguaje

3. Noviembre 2015—Puede ya man highlight

4. Mayo 2016—Ya omenta un tab para na miting

5. Mayo 2017—Puede ya pone maga note

6. Deciembre 2017—Ya omenta maga feature para na Study Bible

7. Marzo 2019—Puede ya man download con el maga audio recording, man stream con el maga video y man access con el maga referencia na Research Guide

8. Enero 2021—Ya omenta maga feature para na Queda Alegre Hasta Para Cuando!