Cada mes, ta espera gayot kita con el maga espiritual programa y video que ta man release na JW Broadcasting. Pero, manada del diaton maga hermano na Africa el gendeh ta puede mira con este maga programa na Internet. Porque?

 Mucho del maga gente na Africa el tan dificil conecta na Internet. Y si ta puede sila conecta, mas mucho hinay este o bien caro. Por ejemplo, el un circuit overseer na Madagascar yan download un JW Broadcasting program na un Internet café. Ya paga le maga ₱800 ($16) que mas grande pa na incuntrada del cuanto maga gente na un semana! a

 Maskin pa na este maga dificultad, millones ahora na Africa el puede ya mira con el JW Broadcasting maskin nuay Internet. Paquemodo?

 Desde 2017, puede ya mira con el JW Broadcasting aquellos quien ta queda na sub-Saharan Africa por medio na un satellite-television channel. Libre lang puede mira con este channel, 24 hora na un dia, 7 dia na un semana y na 16 lengguaje.

 Para puede este hace, el maga Testigo de Jehova ya paga un television broadcast service para puede hace sale diaton maga programa por medio na satellite. El satellite que ya usa ta cubri maga 35 nacion na sub-Saharan Africa. Mas de ₱600,000 ($12,000) el ta paga cada mes. Ta paga tambien kita otro pago para man broadcast maga live event na un separtao channel. Por causa con ese, miles el ta puede beneficia na maga convencion o especial programa durante el branch visit.

 Manada maga gente, incluido el maga gendeh Testigo, el ta mira con el JW satellite channel na un television na casa. Pero, manada del diaton maga hermano el gendeh puede cumpra el maga gamit que necesita para puede mira con el satellite channel. Para ayuda kanila, ya pone maga satellite-receiving equipment con el mas de 3,670 Kingdom Hall para puede mira alla el maga hermano y hermana con el JW Broadcasting. El gasto puede llega, incluido el delivery, maga ₱3,500 ($70) si el Kingdom Hall tiene ya TV o projector. Si nuay se sila gamit, el gastos ta alcanza maga ₱26,500 ($530).

 El diaton maga hermano y hermana ta aprecia gayot con el channel. El un anciano na Cameroon ya habla: “Igual este como mana entre medio del desierto para na diamon familia.” Si Odebode, un hermano na Nigeria, ya habla: “Ta mira kame con el channel tres beses na un semana como un familia. Ta espera gayot el diamon maga anak con ese maga ocasion. Ta pidi pa gane sila que mira kame con el JW channel maskin na otro maga tiempo.” Si Rose que de Nigeria tambien ya habla: “Bien alegre gayot yo cay en vez mira maga noticia, JW satellite channel ya yo ta mira. Si ta mira yo maga noticia, pronto lang yo ta irita y ta subi el de mio presion. Pero, el JW Broadcasting ta puede gayot anima! Este ya el de mio favorito channel. Un grande bendicion gayot este estaba con Jehova.”

 El un circuit overseer na Mozambique ya reporta que na de suyu circuito, tiene ya pone maga equipment na maga Kingdom Hall para conecta na satellite channel. El maga hermano y hermana na este maga congregacion ta anda un hora o mas pa antes principia el miting para mira con el JW Broadcasting por medio na satellite.

 Para na 2019 internacional convencion na Johannesburg, South Africa, ya usa con el channel para dale mira con el cuanto maga talk—incluido aquellos que ya dale el miembro del Cuerpo Gobernante—para na otro nueve locacion. Si Sphumelele, de local Broadcasting Department na South Africa, ya habla: “Del antes, necesita kame imbia con el maga talk por medio na Internet. Pero, necesita este un fuerte Internet y tiene pa pago. El JW satellite channel mas barato y mas enbuenamente el coneccion.”

 Gracias na de ustedes maga donacion na worldwide work. Ahora, manada na diaton maga hermano y hermana na Africa el puede ya mira con el JW Broadcasting por medio na satellite. Ta aprecia gayot kame con el de ustedes maga donacion que ya hace por medio na diferente manera que puede mira na donate.pr418.com.