Manada gobierno na entero mundo el ya pidi que man physical distancing y ya prohibi que man junto-junto el maga gente na publico. El maga Testigo de Jehova determinao sigui con ese mientras ta continua man junto na miting que gendeh ta pone na peligro el diila salud. Para hace se, el maga congregacion ta usa con el maga videoconferencing app, igual na Zoom.

 Para regular hace con el diaton maga miting y safe el coneccion de este, el Cuerpo Gobernante ya aproba que usa con el donacion para cumpra Zoom account para na maga congregacion. Grande ayuda este para na cuanto congregacion que gendeh puede paga con el precio de videoconference account cay el cantidad ta llega maga ₱750-₱1,000 o mas pa. Este maga congregacion ta usa maga libre app que limitao lang el quien puede conecta o gendeh safe el coneccion de este. El todo congregacion quien ta usa con el Zoom account del organizacion ya beneficia cay tiene este facil security setting y mas manada gente el puede conecta na cada miting. Ahora, mas de 65,000 congregacion na mas de 170 nacion el ta usa con este maga account.

 El congregacion de Kairagi, na Manado, North Sulawesi, Indonesia nuay mas ya usa con el libre videoconferencing app y ya cambia na Zoom account del organizacion. Si Hermano Hadi Santoso ya habla: “Maskin el maga hermano y hermana quien no sabe usa maga gadget, alegre ya ahora na maga miting cay gendeh mas sila necesita man log in manada beses durante el un miting.”

 Si Lester Jijón, Jr., un anciano na Guayacanes Oeste Congregation na Guayaquil, Ecuador, ya habla: “Por causa na situacion na financial del manada maga hermano y hermana, imposible para na cuanto congregacion que paga con el Zoom license para puede atende el entero congregacion na maga miting. Ahora cay mas manada ya el puede conecta na Zoom account, ta puede ya kame invita con otro na maga miting y gendeh ta tiene miedo que baka alcanza na connection limit.”

 Si Johnson Mwanza, un anciano na Ngwerere North Congregation na Lusaka, Zambia, ya escribi: “Manada maga hermano y hermana el pirmi ta habla que ‘por medio na Zoom account del organizacion, gendeh lang este ta manda sinti kanaton que cerca kita con el diaton maga hermano y hermana sino ta manda este sinti kanaton que ta ama y ta cuida kanaton si Jehova.’”

 Ya cumpra con este maga account usando el pondo para na disaster relief. Ese maga pondo estaba na maga voluntario donacion para na trabajo na entero mundo. Manada de este maga donacion ya hace por medio na donate.pr418.com. Gracias na de tuyu maga donacion que ya puede tambien ayuda con otro na entero mundo.—2 Corinto 8:14.