Na bien manada gente quien ta queda na Latin America, el millones tiene el diila mismo lengguaje y maga tradicion. Manada de este maga persona amo el diaton maga espiritual hermano y hermana, donde precioso kanila el diila cultura. Para puede ayuda con el maga gente aprende el verdad estaba na Biblia, yan translate y ya distribui sila maga publicacion del maga Testigo de Jehova na mas de 130 lengguaje de Latin America. a Maskin pa ansina, el cuanto ya enfrenta oposicion cay ya iscuji sila sirvi con Jehova y cay nuay sila participa na maga tradicion que gendeh base na Biblia que comon na diila comunidad. Paquemodo ya usa con el de ustedes donacion para ayuda kanila?

 Na Mexico, el diaton maga hermano y hermana na comunidad de Huichol na maga monte de Jalisco State nuay participa na maga religioso practica que tan contra con el diila conciencia. b Por causa con este, ya rabia el cuanto na diila comunidad. Del Deciembre 4, 2017, el un grupo de maga violente gente ya ataca con el un grupo de maga Testigo y con el otro pa que junto kanila. Este maga gente forzao ya manda sale kanila na diila comunidad, ya destroza con el diila propiedad y ya amenaza que mata kanila si bira sila.

 El maga Testigo na maga cerca barrio ya dale dayun el necesidad del diaton maga hermano y hermana. Pero, cosa hace para puede sila bira na diila casa? “Nuay kame bastante sen para paga abogao,” ya habla el un hermano que si Agustín, “y no sabe kame si con quien pregunta acerca na diamon situacion.”

 Ciendo ya sangga con el libertad del diaton maga hermano para adora, el Central America branch ya hace dayun accion. Una, ya pidi sila con el maga local oficial que investiga con este maga crimen. Despues, el Coordinators’ Committee del Cuerpo Gobernante del Maga Testigo de Jehova ya aproba que el Central America branch y el Legal Department na world headquarters hay man ayudajan y planta caso para na diaton maga Huichol hermano y hermana. El caso ya alcanza na Supreme Court of Justice of the Nation—el de con todo alto corte na Mexico.

 El un grupo de maga abogao que estaba na diferente nacion ya prepara un claro argumento donde ya explica sila que igual si paquemodo el otro debe respeta con el cultura del diferente comunidad, el maga comunidad debe tambien respeta y protege con el libertad del todo miembro de este. El todo maga gente tiene derecho maskin onde pa sila ta queda.

 Del Julio 8, 2020, el Supreme Court of Justice ya rula afavor na maga Testigo de Jehova. Ya manda sila que todo aquellos con quien ya arria debe manda bira na diila comunidad. Si Agustín que ya menciona enante ya expresa el apresacion que ya sinti le y el otro: “Ta rindi gayot kame gracias y alegre na cosa ya hace el maga hermano para kanamon. Si nuay sila ayuda kanamon, nuay gayot era kame cosa ya puede hace.”

 Ya enfrenta tambien semejante oposicion el diaton maga hermano na San Juan de Ilumán, un barrio na Ecuador donde ta queda el manada maga gente de Otavalo Valley. Del 2014, despues sila obtene el maga permit que necesita, ya principia sila construi un Kingdom Hall. Pero, el un padre ya convida con el mas de 100 gente para hace descanza con el construida. Despues, el comunidad ya manda con el maga Testigo de Jehova que no mas ya man junto-junto para na adoranza.

 El legal department na Ecuador branch y na world headquarters yan ayudajan para defende con el congregacion y protege con el diila libertad de adoranza. El diaton maga hermano ya lleva con este issue na corte. Por causa con ese, el comunidad nuay mas man contra con el diaton maga hermano y ya permiti con el congregacion que man junto-junto na diila maga miting y hace acaba construi con el Kingdom Hall. Pero para protege con el derecho del diaton maga hermano na futuro, el diaton maga representante ya pidi con el mas alto corte que decidi acerca na un bien importante issue: Debe ba respeta el maga comunidad con el maga ley acerca na derecho del gente que ta sigui na entero mundo?

 Del Julio 16, 2020, el Constitutional Court of Ecuador, el de con todo alto corte na nacion, ya considera con el caso. El maga hermano que maga abogao na Ecuador amo el ya representa con el congregacion. Mas pa, yan cuento tambien na corte el cuatro del diaton maga hermano que maga experienciao abogao estaba na diferente nacion. Por causa na restriccion na COVID-19, yan cuento sila por medio na videoconference. Este el primer vez que el un corte ya permiti con el maga abogao que ta representa con el maga Testigo de Jehova na entero mundo para presenta con el diila argumento na este manera. c El maga abogao ya menciona maga internacional ley que ta sigui na entero mundo para confirma que gendeh ta perde el derecho del un persona por causa lang cay parte le de un comunidad.

 El diaton maga hermano na Otavalo Valley con ansias ta espera con el decision del Constitutional Court. Mientras tanto, ta rindi gayot sila gracias na ayuda que ya ricibi sila. Si César, quien ta sirvi como un anciano na Ilumán Quichua Congregation, ya habla: “Solamente si Jehova, por medio na de suyu organizacion, el conforme hace grande esfuerzo para lang na maga bien poco gente.”

 El maga abogao quien ya agarra con el caso amo todo maga Testigo de Jehova y alegre sila man share con el cosa sila sabe que nuay pago. Pero maskin pa ansina, necesita siempre tiempo y sen para man file con este maga caso, prepara con este y discuti na corte. El diaton maga abogao y otro maga hermano ya dale mas de 380 hora para prepara con el cosa sila habla y otro 240 hora para man translate maga documento que hay usa na hearing na Mexico. Cerca 40 abogao estaba na entero mundo el ya dale mas de cien hora para na este caso na Ecuador. Paquemodo kita ya puede paga con el maga gastos que necesita para defende con el diaton maga hermano? Por medio na maga contribucion que ya hace ustedes usando el diferente manera que ya explica na donate.pr418.com. Gracias na de ustedes pagka-bondadoso.