“El Cuerpo Gobernante ya decidi que puera si tiene maga restriccion de gobierno, ta anima kame con el todo congregacion que principia conduci con el maga miting na personal na semana del Abril 1.” Cuando yan post con ese anuncio na jw.org del Marzo 2022, ya queda bien alegre el maga Testigo de Jehova na entero mundo. Pero nuay pa acaba el COVID-19 pandemic. a Cosa maga cambio y gamit el necesita para protege desde na virus con aquellos quien atende? Preparao ya ba para usa con el maga Kingdom Hall ciendo maga dos año ya kita nuay man miting na personal?

 Actualmente, ya prepara ya daan el maga hermano por manada mes para puede otravez man miting na personal na maga Kingdom Hall.

 Un mes lang despues kita descanza man miting na personal del 2020, el Worldwide Design/Construction Department (WDC), na Warwick, New York, ya principia ya examina si paquemodo el COVID-19 hay afecta con el diaton usada del Kingdom Hall y si cosa necesita hace para esta kita safe si tan miting.

 Mas mucho, gendeh igual el cosa necesita na cada parte del mundo. Si Matthew De Sanctis quien ta trabaja na WDC ya explica: “Na cuanto maga nacion, el un problema amo nuay sila lugar onde para laba mano. Si nuay agua na maga Kingdom Hall, necesita pa cumpra agua o saca con ese na un rio o pozo. Na otro maga nacion, el gobierno ya hace maga cambio na diila ley acerca na air-conditioning, ventilation y si cosa maga caratula el pone acerca na salud y limpieza.”

 Paquemodo el maga hermano ya enfrenta con ese maga dificultad? Ya puede sila mira que para na manada Kingdom Hall, “bien efectivo el cuanto maga solucion que simple y barato,” ya habla si Matthew. Por ejemplo na Papua New Guinea, ta usa maga bidon que tiene gripo que ta puede contene 20 litro de agua para usa laba mano. Poreso, el diaton maga hermano ya gasta lang $40 (U.S.) para prepara con el cada Kingdom Hall. Na Africa, ya cumpra mas de 6,000 maga handwashing station estaba na un supplier na Asia para usa na maga Kingdom Hall.

 Ya pone tambien o ya cambia con el maga ventilador para tene mas fresco aire na maga Kingdom Hall. Manada maga congregacion el ya cumpra maga largo handle de microphone para gendeh manada el quien agarra con ese. Ya hace maga arreglamiento para puede menora y regular man sanitize con el maga touch point, igual na maga door knob y gripo, donde puede hace calayat con el maga virus. Na cuanto maga congregacion, ya usa sila maga automatic gripo na diila maga CR. Na Chile, para hace con el maga necesita cambio, ya gasta maga $1,400 (U.S.) para na cada Kingdom Hall.

 Maskin prioridad que queda safe el maga hermano na Kingdom Hall, ya pricura tambien man save con el pondo de maga donacion. Por ejemplo na cuanto maga lugar, tiene tax exemption para na maga handwashing station y handle de maga microphone. Ya trabaja junto el maga branch office para man save sen cay mas barato si puede cumpra junto mas manada supply. Mas mucho, el maga branch y el Global Purchasing Department ta cumpra derecho na maga manufacturer para mas barato y mas pronto se sila puede ricibi.

 El maga arreglamiento ya puede protege con aquellos quien ta atende miting na Kingdom Hall y ya dale kanila asiguranza que safe sila. Si Dulcine, un hermana na Peru, ya admiti que tiene le “miedo” cuando ya sabe le que bira ya kita na Kingdom Hall. “Ya tiene yo COVID cuando ya principia el pandemic,” ele ya habla. “Poreso, gendeh yo comfortable anda na Kingdom Hall cay baka tene yo COVID otravez. Pero cuando ya llega yo alla, ya nota yo que el maga anciano ya hace maga arreglamiento para esta safe el todo. Tiene maga hand-sanitizing station, ta usa maga handle de microphone y tan disinfect con el Kingdom Hall antes y despues del cada miting. Por causa con ese, ya sinti yo safe.” b

 Si Sara, un hermana na Zambia, ya enfrenta otro dificultad. Ele ya habla: “Cuanto meses ya el ya pasa, ya muri el de mio marido na COVID-19. Malingasa yo si cosa yo sinti si atende yo na miting na personal por primer vez que gendeh le junto conmigo.” Cosa le ya sinti cuando ya anda le na Kingdom Hall? Ele ya habla: “El maga miting na personal ya dale prueba conmigo que junto kanaton si Jehova na este ultimo maga dia. Ahora, mas ta sinti yo que ta ricibi gayot yo el amor y suporta que necesita yo estaba na maga anciano y na otro maga hermano y hermana.”

 Alegre el diaton maga hermano y hermana na entero mundo cay ya puede ya sila bira na diila maga Kingdom Hall. Gracias na de ustedes maga donacion que manada ya hace por medio na donate.pr418.com. Este maga donacion ya puede ayuda para asigura que comfortable kita y safe el diaton maga lugar de adoranza.