Del Mayo 20 hasta Junio 11, 2023, ya hace con el FIFA U-20 World Cup na cuatro ciudad na Argentina. Mas de 400,000 persona el quien ya atende estaba na Argentina y na otro maga nacion. Tiene ya pone maga literature cart na diferente maga locacion. Maga 500 hermano y hermana el quien ya participa con este actividad y mas de 500 literatura el ya puede distribui. Manada gente con quien ya puede invita para visita con el jw.org para busca contestacion na diila maga pregunta acerca na Biblia.

El un hombre quien ta queda na aquel lugar ya atraca na cart y ya habla que quierre-quierre le oi maga podcast mientras tan ejercicio. El un hermano ya dale con ele mira el jw.org website y ya explica con ele si paquemodo man download con el diaton maga publicacion na audio format. El hombre ya habla que hay inclui le con el diaton maga publicacion na de suyu playlist.

Para saca el interes del maga visita que estaba na otro nacion, ya usa maga cart de nueve diferente maga lengguaje. Omento pa, manada publisher el quien ya aprende si paquemodo man greet na otro lengguaje para puede man cuento con aquellos quien ta atraca na cart. El uno del diaton maga hermano quien ya participa na este actividad ya habla: “Este todo trabajo que ya hace para predica con el maga gente de diferente maga nacion ya ayuda conmigo para mira que bien bueno y imparcial si Jehova. Ya hace gayot este conmigo bien alegre.”

El maga organizer de este juego ya permiti con el maga Testigo de Jehova para pone cart na maga lugar donde con el cuanto lang ta permiti entra por causa na seguridad. El uno del maga organizer ya menciona si porque sila ya hace con el decision. Ele ya habla, “Sabe kame que maga buen gente el maga Testigo de Jehova y gendeh sila ta causa peligro.” Como resulta, ya puede predica con el maga oficial quien ta vicia.

Bien maka-alegre mira que el maga siervo de Dios Jehova ta hace esfuerzo para alcanza con el todo clase de maga gente y ta siembra con el similla de verdad acerca na Reino na entero mundo.—Eclesiastes 11:6.