Como cosa ya anuncia na breaking news na jw.org, tiene maga bomba ya rebenta na un asemblea de region que ya hace na Kerala, India, del Domingo, Octubre 29, 2023. Maka-triste, puera na dos hermana que ya muri, ya muri tambien el un 12 año mujer por causa na maga grabe irida que ya tiene le. Tiene tambien 55 hermano y hermana que ya sale irido y el cuanto kanila grabe ya quema el laman.

Critical ahora el condicion del tres hermana y dos hermano na hospital. El maga autoridad ya confirma que tiene maga tres bomba el ya rebenta durante na primer rezo maga 9:40 del aga. El suspechao quien ya hace con este bajo ya na custodia del polis y ta continua pa el investigacion.

Ta aprecia gayot kita con el maga emergency personnel quien ya anda dayun na locacion del asemblea para ayuda y con el maga hospital staff quien ya cuida con aquellos quien ya sale irido.

Aquellos quien ya atende ta aprecia gayot el amor y suporta que ya dale mira el maga hermano y hermana, y ya puede se kanila anima. El un hermana que na facilidad cuando ya rebenta el bomba ya habla: “Ya reza dayun yo con Jehova. El maga attendant y otro maga hermano ya cuida kanamon y ya actua dayun para asigura que safe kame. Ta dale este mira el amor y personal interes de Jehova con el cada uno kanamon.”

El maga representante del branch office del India, maga circuit overseer y maga anciano ta continua dale espiritual y practical ayuda con aquellos quien ya sale afectao. El un anciano estaba na branch office quien ya viaja para na Kerala para dale comforta con el maga hermano y hermana quien ya sale afectao ya puede observa: “Maskin manada del maga hermano y hermana el ya sale espantao, dolorido y yan trauma, ya puede anima conmigo el diila pagka-positivo. Yan cuento yo con el manada kanila. Cuando ya mira yo si paquemodo sila ta confia con Jehova, ya hace tambien este fuerte con el de mio fe.”

Como un familia na entero mundo, ta reza kita para na familia del maga victima y con aquellos quien ya sale afectao na este terrible tragedia na India. Ta dale kanaton comforta y paz el promesa na Biblia donde na futuro nuay mas violencia, sufrimiento y muerte. Determinao kita que continua pone el diaton todo confianza con Jehova.—Salmo 56:3.