Del Abril 26, 2022, si Hermano Mark Sanderson, un miembro del Cuerpo Gobernante del maga Testigo de Jehova, ya anda na Poland para anima con el maga hermano y hermana quien ya queda afectao na guerra na Ukraine.

Invitao el todo congregacion na Poland y Ukraine na un especial programa que ya hace del Abril 30, 2022. Na Poland, ya invita con el maga refugee de Ukraine y con aquellos quien ta ayuda para personal puede mira con el programa na Assembly Hall na Warsaw. Tiene mas de 250,000 el quien ya atende na Poland y Ukraine incluido ya aquellos quien conectao por medio na videoconference.

“El maga hermano y hermana na entero mundo ta pensa con ustedes y ta reza para con ustedes,” ya habla si Hermano Sanderson. “Na world headquarters, el maga hermano ta reza todo’l dia para na maga hermano y hermana na Russia y Ukraine, y ta reza kame para con ustedes na maga miting del Cuerpo Gobernante.” Ya asigura le con el maga quien ta atende que “el maga dificultad que ta experiencia ustedes gendeh quierre decir que ya perde el bendicion de Jehova con ustedes. Ta mira le con ustedes, ta ama le con ustedes y cerca le especialmente con aquellos quien ta sufri.”

Si Hermano Sanderson ya omenta: “Continua man focus na de ustedes relacion con Jehova. El diaton goal gendeh lang para sobrevivi sino quierre kita que queda mas fuerte el diaton fe y queda mas cerca con Jehova despues experiencia este maga dificultad. Ese el cosa si Jehova ta enseña kanaton.”

Si Serhiy, un anciano na Odessa, Ukraine, ya habla: “Del ya pasa maga semana, nuay yo puede durmi enbuenamente cay ta sinti yo lingasa, tristeza y miedo. Pero, el especial program ya hace fuerte con el de mio conviccion que si Jehova ta cuida kanaton gendeh lang como un grupo sino como individual tambien.”

Si Tatiana, un refugee hermana estaba na Kyiv, Ukraine, ya habla: “Ahora, ya puede gayot yo sinti si paquemodo de cerca conmigo si Jehova. Ta abraza conmigo si Jehova y ta sinti yo el de suyu amor. Maskin onde kita, pirmi kanaton junto si Jehova.”

Ta ama gayot kita con el diaton maga hermano y hermana, y ta confia kita que este especial program ya hace acorda kanila que si Jehova tiene “amor leal” para na de suyu maga siervo.—Salmo 136:1.