Cuando ya principia el guerra na Ukraine, si Iryna Makukha, un 46 año single hermana, ya anda na estacion de tren na Kharkiv. Ya decidi le que mas bueno anda na otro nacion. Bien trambulicao gayot aquel tiempo y ta munta na tren el maga gente maskin no sabe sila onde anda. El tren que ya munta si Iryna, tapao el maga bentana para menora el peligro que ataca kanila. Cuando ya sale el tren na estacion, amo pa le ya sabe que para na Slovakia gale el viaje de este.

Ta queda ahora si Iryna na Prague, el centro del ciudad del Czech Republic, principia del Marzo 3, 2022. Ya puede le incuntra un trabajo como un custodial worker y tan renta un apartment junto con el dos hermana de Ukraine que maga refugee tambien. Si Iryna ta aprende Czech y ya continua le otravez sirvi na full-time que amo el cosa le ta hace por 20 año.

“Ya puede yo mismo mira si paquemodo si Jehova ta cuida kanaton por medio na de suyu maga siervo. Ya hace gayot se fuerte con el de mio fe,” ya habla si Iryna.

Cerca 23,000 del diaton maga hermano y hermana el ya hace personal decision para cambia na otro maga nacion. Maskin pa ya puede incuntra mas safe lugar onde esta aquellos quien ya decidi queda na otro nacion necesita siempre sila busca trabajo, lugar onde esta, obtene maga legal documento y man enroll con el diila maga anak na nuevo escuela mientras ta aprende un nuevo lengguaje. El diila espiritual rutina y el maga amable hermano y hermana amo el cosa gayot ya puede ayuda kanila durante na este bien dificil tiempo.

El tres miembro del familia Perceac que si Anatoli, Olena y 17 año que si Alina, ya cambia na Romania despues rebenta el bomba na Mykolaiv Oblast, Ukraine. Ya cambia sila alla del Marzo 6, 2022. Cay de Moldova si Anatoli, ya permiti con ele que lleva con el de suyu familia para na Romania. Ya compara si Olena el sentido que deja con el diila nacion igual como “ta arranca con el un pono junto con el maga reiz de este para cambia na otro lugar.”

Na ayuda del maga hermano y hermana de Romania, el familia Perceac tiene ya diila mismo apartment ahora. Omento pa, si Anatoli y Olena ya puede ya incuntra trabajo y si Alina ya puede ya completa con el de suyu maga assignment online onde le ta entra escuela na Ukraine.

Puera que ta dale practical necesidad del familia, el maga hermano y hermana de Romania ta dale tambien el diila emocional y espiritual necesidad. El maga hermano y hermana regular ta dale tiempo para man junto con el familia para gendeh sila sinti solo-solo. Si Olena y Alina ta aprende el lengguaje de Romania por medio na JW Language app y participacion na ministerio junto con aquellos na diila nuevo congregacion. Si Anatoli ya engranda que sabe converza Romanian.

“Ya puede kame mira el mano de Jehova desde el principio,” ya habla si Anatoli. “Por medio con el organizacion y suporta del maga hermano y hermana, ya sinti kame el amor de Jehova.”

Si Alina Havryliuk que viuda ya antes pa el guerra y el de suyu 16 año anak hombre que si Vladyslav, ya llega na Suwałki, Poland, estaba na Vinnystia, Ukraine, del Febrero 27. “Del una, malingasa yo si onde kame del de mio anak queda y si paquemodo kame suporta con el diamon mismo cuerpo. Pero ta confia tambien kame que hay cuida kanamon si Jehova,” si Alina ya habla.

Si Alina que 37 año, ya principia dayun busca trabajo que gendeh ta sangga con el de suyu atendida na maga miting. Ya puede le incuntra trabajo como un custodial worker na escuela. “El de con todo importante na este trabajo amo cay tiene yo mas manada oportunidad para participa na ministerio y ta puede tambien yo suporta con el de mio familia,” ya habla le.

Si Alina y Vladyslav ta aprende Polish y ta sirvi como maga continuous auxiliary pioneer na un congregacion que Polish el lengguaje. Si Vladyslav yan enroll tambien na high school.

El diaton maga hermano y hermana de Ukraine ta experiencia grabe dificultad y cambio pero ta continua dale kanila si Jehova el necesita fuerza. Ya puede sila mira que deverasan gayot el cosa ta habla na 2 Corinto 4:8: “Mucho el diamon maga tormento, pero gendeh ese ta destroza canamon. Gende came ta puede encontra solucion na diamon maga problema, pero gendeh kame ta perde el esperanza.”