Alas cinco del aga, ya dispierta kanda Hermano Femi Durodola y de suyu mujer que si Yana cay ya llama kanila el un anciano. “El anciano ya habla: ‘No ustedes man lingasa, basta prepara lang. Para na Kyiv ya el maga soldao de Russia!’” ya habla si Yana. “Aquel tiempo, ya nervia gayot yo.”

El nuevo casao man maridable ya muda, ya toma con el diila cafe por ultimo vez na diila casa y ya le con el texto para na aquel dia. El texto de aquel dia amo: “Puede ustedes tene fuerza si esta ustedes calmao y dale mira confianza.” (Isaias 30:15) Con todo corazon si Femi ya reza con Jehova. Despues, ya saca sila con el diila maga go bag y ya deja con el todo cosa sila tiene para evacua na Netherlands. Si Femi de Nigeria y si Yana de Ukraine.

Amo tambien se el cosa ya experiencia el mayoria del diaton maga hermano y hermana quien ya hace personal decision que sale na Ukraine despues ataca el Russia del Febrero 24, 2022. Tiene maga 130,000 Testigo de Jehova na Ukraine. Ahora, mas de 36,000 Testigo ya el ya decidi que sale na diila maga casa y mas de 16,000 el ya evacua para na otro maga nacion. Manada el ya deja con el diila casa, trabajo y congregacion. Durante el guerra, gendeh ta permiti con el maga hombre de Ukraine que el edad 18 hasta 60 año para sale na nacion. Pero, gendeh incluido alli el maga hombre quien citizen de otro maga nacion.

Llevando con el cosa lang sila necesita, aquellos quien ta evacua ta munta maga train y bus para anda na lugar que lejos na peligro. Tiene vez, no sabe sila si onde gayot sila guinda. El diila fuerte fe con Jehova ya dale kanila fuerza para sale na maga ciudad onde tiene guerra maskin pa no sabe sila si puede ba sila bira.

“Ya deja kame manada cosas y poco lang kame ya lleva,” ya habla si Yana. “Este situacion ya hace acorda kanamon que el importante lang gayot amo el de tuyu relacion con Jehova.”

Na de suyu casa na Kyiv, si Hermana Lilia Antoniuk ta puede oi con el sirena que ta suena que ta dale aviso que tiene bomba y con el maga rebentada. Na maga camino, tiene maga quemao coche y pedazo de maga materiales que estaba na maga building y puente que ya bungca.

Si Lilia y el de suyu 17 año anak mujer que si Oleksandra, ya decidi que sale na nacion. Por cuanto dia, ya viaja sila para na Poland por medio na un train que donde dalasukan el maga gente. Poco lang el comida que tiene sila y necesita sila esta parao por cuanto hora. Ya perde umpoco el lingasa del maga hermana cuando ya llega sila na Przemyśl, Poland.

“Cuando ya mira kame con el maga hermano que ta lleva ‘JW.ORG’ sign, sabe kame que hay cuida sila kanamon,” ya habla si Lilia. Ya lleva con el maga hermana na un Kingdom Hall donde ya puede sila come y descanza. Despues, ya lleva kanila na un casa donde puede sila esta.

Despues del cuanto tiempo, ya cambia sila na Germany. “Ya sinti kame el amor de Jehova y ya queda fuerte el diamon fe,” ya habla si Lilia. “Ta rindi gayot yo gracias con Jehova por causa na de suyu amor y por causa na maga hermano y hermana quien preparao ayuda na maga dificil tiempo.”

Si Hermana Anastasiia Kovalyova ya relata si paquemodo el maga soldao de Russia ya ataca con el ciudad de Zaporizhzhia. Na de suyu apartment, ta puede le mira con el maga grande armas que ta tira maga bomba y ta puede le oi con el maga rebentada. Por causa cay pirmi tiene rebentada de bomba, yan trauma el subrino y subrina de Anastasiia que el edad siete y tres año. Poreso, ya decidi el diila familia que sale alla. “Ciendo umpoco lang el cosa kame puede lleva, falta el diamon maga ropa y otro cosas,” ya habla si Anastasiia. “Pero, nuay kanamon deja el maga hermano. Ya tiene kame el todo cosa kame necesita y mas pa.” Si Anastasiia, el de suyu cuñada que si Anya y el maga bata ya viaja para na Germany estaba na Poland.

Si Hermana Anastasiia Shchukina y el de suyu nana, si Hermana Olha Lysenko, ta esconde na basement del diila diutay casa cada vez ta puede sila oi que ta suena el sirena. Maga pioneer sila quien ta sirvi na un diutay pueblo de Brailiv, Vinnytsia Oblast donde grande el necesidad. Yan dificil sila decidi si sale ba o gendeh pero na uliji, ya decidi sila que sale cay ya queda mas grabe el situacion. Llevando el cosa lang sila necesita, ya viaja sila por medio na train por dos dia maskin falta sila durmida. Dificil para con Hermana Olha que man viaje cay 58 año ya le y tiene maga problema na salud. Ya llega sila na Rzeszów, Poland, alas dos del aga. Tiene maga hermano y hermana yan welcome kanila alla. “Maskin pa madrogada, talla el maga hermano para espera kanamon,” ya habla si Anastasiia. “Ta rindi gayot kame gracias con Jehova y con el maga hermano y hermana.”

Na ciudad de Sumy, si Hermano Andrzej Chyba—un citizen de Poland—y el de suyu mujer, si Elizabeth que de Britain, ya esconde na basement del casa del un hermano y tiene sila cinco uban. Ta puede sila oi con el maga jet que ta pasa, maga tiro y maga rebentada de bomba. Ya mira sila con el un drama que base na Biblia O Jehovah, . . . I Trust in You que ta dale mira con el istoria de Rey Ezequias cuando para ataca ya el maga Asiriano con el Jerusalem y ya puede quel anima kanila.

“El maga hermano ya imbia kanamon maga mensaje que base na Biblia. Uno alli ya anima kanamon para le con el Salmo 27,” ya habla si Andrzej, quien talla ahora na Poland junto con el de suyu mujer.

Tiene kita confianza que si Jehova hay bendici con el diaton maga hermano quien ‘ya conforma perde todo maga cosa-cosa’ mientras ta espera con el un futuro que nuay mas guerra.—Filipo 3:8, El Nuevo Testamento na Chavacano.