Como cosa ya menciona del ya pasa report, na año 2022, 25 año ya tiene oficial website el maga Testigo de Jehova. Pero diez año ya el ya pasa, del Agosto 27, 2012, ya tiene nuevo diseño el jw.org. Este serie que tiene tres parte hay discuti si paquemodo el nuevo jw.org ya puede ayuda con el millones de maga gente.

Video: Na maga convencion del 2012, yan release na DVD con el primer dos video del nuevo serie Queda Amigo de Jehova. Pero, gendeh mas tanto ta usa con el maga DVD y mas caro este para produci. Cuando ya queda available el nuevo website del 2012, tiene este buen manera para distribui maga video. Poreso del Enero 2013, yan release na digital format na jw.org con el sunod video del serie Queda Amigo de Jehova que tiene titulo Maskin Cuando Puede Reza. Desde aquel tiempo, mas de 40 video ya el ya puede man release.

Yan release tambien na website con el video Porque Debe Estudia con el Biblia? del 2013. Ese video ya queda gayot un grande ayuda na ministerio y parte del Teaching Toolbox. Desde aquel tiempo, ya queda un importante parte del predicacion que distribui maga video por medio na jw.org. Por ejemplo, cuando ya tiene campaña que distribui con el tract que tan advertise con el jw.org del Agosto 2014, maga 15 millon video el ya puede man download o ya puede mira na website.

El un hermano quien ya ayuda hace con el jw.org ya habla: “Ya queda gayot fuerte el diamon fe cuando ya mira kame si paquemodo si Jehova ya prepara kanaton para na maga suceso na futuro. Nuay kame idea aquel tiempo que na futuro, hay queda gale bien importante que tene un nuevo manera si paquemodo ta distribui con el maga video.” Por ejemplo, ya introduci del Octubre 2014 con el JW Broadcasting y ya puede man download mas de 37 millon video na aquel mes. Cuando ya principia el COVID-19 pandemic del 2020, mas manada video el ya puede man download o mira na jw.org. Del 2022, maga mas de 260 millon video el yan download na jw.org cada mes.

Publicacion na Digital Format: Na reciente maga año, mas manada el quierre le maga material online o na mobile app en vez de hard copy. Cuando ya cambia el diseño del website del 2012, el maga gente puede ya le con el maga magasin online—gane, antes pa sila puede ricibi con el printed edition. Cay ya produci ya maga publicacion na website, ya puede este ayuda para mas facil introduci con el JW Library app del 2013. Bien bonito tool gayot el app y website que puede ayuda con el maga gente para le y estudia con el maga publicacion na digital format.

Del primero, el maga publicacion que tan release na maga convencion na medio-medio del año ta queda lang available na website o na app na Enero pa del sunod año. Pero na maga asemblea de region del 2015, alegre gayot el maga quien ya atende cuando ya sabe sila que puede ya sila dayun man download con el maga digital edition del maga publicacion que yan release na ese asemblea. Incluido alli el maga publicacion Jesus—The Way, the Truth, the Life y Return to Jehovah, y el video What Is True Love? Pagka-sunod año, na Mayo 2016 JW Broadcasting program, si Hermano Anthony Morris del Cuerpo Gobernante yan release con el brosyur Contestacion na 10 Pregunta del Maga Jovenes y ya anuncia que puede ya dayun con este man download. Este el primer vez que yan release con el un publicacion na maga hermano y hermana na entero mundo na igual tiempo.

Desde antes pa, el organizacion de Jehova ta usa ya maga tecnologia para hace con el trabajo del Reino. Alegre gayot kita mira si paquemodo ta usa con el jw.org website para “dale [kanaton] come na hora justo.”—Mateo 24:45, El Nuevo Testamento na Chavacano.

• Maga video que tan download cada mes

• Maga ta visita con el website cada mes

• Release del Maskin Cuando Puede Reza, Enero 2013

• Release del JW Library app, Octubre 2013

• Campaña del tract que tan advertise con el jw.org, Agosto 2014

• Release del JW Broadcasting, Octubre 2014

• Available ya na website el maga release del convencion, Mayo 2015

• Release del Contestacion na 10 Pregunta del Maga Jovenes, Mayo 2016